Օգտագործեք Airbnb-ի համահյուրընկալման գործիքները

Հաջողակ փորձառու համահյուրընկալող լինելու համար կարևոր է որոշելը, թե ինչպես եք դուք և հյուրընկալողը բաժանում հայտարարության կառավարման աշխատանքները։

Հյուրերին հաղորդագրություններ գրելու եք և՛ դուք, և՛ հյուրընկալո՞ղը, թե՞ ձեզնից մեկն է ստանձնելու այդ պարտավորությունը։ Ամբողջ հայտարարությո՞ւնն եք կառավարելու՝ հյուրընկալողի հետ կապ հաստատելով միայն որոշակի խնդիրների դեպքում, օրինակ՝ փոխհատուցման հայտերի։ Ինչ էլ որոշեք, Airbnb-ն առաջարկում է գործիքներ, որոնք կօգնեն հեշտացնել համահյուրընկալումը։

Երբ որևէ հյուրընկալող ձեզ հրավիրի համահյուրընկալելու իր հայտարարությունը, նրանից կպահանջվի ընտրել, թե ինչն է հասանելի լինելու ձեզ։ Տարբերակներն են՝

• լիակատար մուտք
• մասնակի մուտք
• մուտք դեպի միայն օրացույց

Լիակատար մուտք ունենալու դեպքում կարող եք՝ 

• ստեղծել նոր հայտարարություն
• հաղորդագրություններ ուղարկել հյուրերին և ստանալ ծանուցումներ
• թարմացնել օրացույցը
• դիտել վճարումների պատմությունը
• կառավարել հայտարարությունը՝ ներառյալ գները և այլ մանրամասներ
• կառավարել ամրագրումները, այդ թվում՝ ընդունել և մերժել ուղևորությունների հայտերը, չեղարկումները և Խնդիրների լուծման կենտրոնի հայտերը
• ներկայացնել փոխհատուցման հայտ
• ավելացնել կամ հեռացնել այլ համահյուրընկալողների, փոփոխել թույլտվությունները և ձեզ կամ մեկ այլ համահյուրընկալողի նշանակել որպես հայտարարության հիմնական հյուրընկալող

Խնդրում ենք նկատի ունենալ, որ նույնիսկ լրիվ մուտք ունենալու դեպքում դուք չեք կարող՝

• սահմանել կամ փոփոխել այլ համահյուրընկալողների վերջնավճարները

• կառավարել փոխհատուցման հայտերը դրանց ներկայացվելուց հետո  

• դիտել կամ փոխել հայտարարության տիրոջ կամ այլ համահյուրընկալողի վերջնավճարի եղանակը կամ հարկ վճարողի տվյալները

Լավ կլինի ծրագիր կազմել հյուրընկալողների հետ, որպեսզի իմանաք, թե ով է պատասխանելու հյուրերին և զբաղվելու հաղորդակցման այլ հարցերով։ Հնարավոր է՝ հյուրընկալողները ցանկանան զբաղվել այդ ամենով կամ գուցե նախընտրեն բաժանել աշխատանքը։

Հաղորդակցման վերաբերյալ հարցերը, որոնք պետք է հաշվի առնել, ներառում են՝

• ամենօրյա հաղորդագրություններ փոխանակելը, հարցերին պատասխանելը և ծագող խնդիրներին լուծումներ տալը

• ամրագրման հայտերին պատասխանելը, եթե հայտարարության մեջ ակնթարթային ամրագրումն անջատված է

• փոխհատուցման հայտեր ներկայացնելը (թեև ներկայացնելուց հետո այս հայտերը կարող են կառավարել միայն հայտարարությունների տերերը)

• օգնության համար համայնքի աջակցման թիմին դիմելը

• այլ համահյուրընկալողներին կառավարելը

Կոլորադո նահանգի Դենվեր քաղաքում փորձառու համահյուրընկալող Սաբրինայի կարծիքով՝ օգտակար կլինի, որ հյուրերի հետ հաղորդակցությամբ զբաղվի մեկ հոգի, «որպեսզի մշտապես ապահովվի կանոնների հարցում հետևողականությունը, օրինակ՝ զեղչերի, գումարների վերադարձի և հյուրերի հետ կապված խնդիրների»,- ասում է նա։

Եթե չկա հստակ ծրագիր, կարող են առաջանալ խնդիրներ։ «Երբ այսպիսի աշխատանքը բաշխվում է երկու հոգու միջև, կարող է շփոթմունք առաջանալ»,- ասում է փորձառու համահյուրընկալող Դոմինիկը (Կոռնուոլ, Անգլիա)։ «Դա հենց այն դեպքն է, երբ որոշ բաներ աչքից վրիպում են, հավաքարարների աշխատանքը չի համակարգվում, և այլ նմանատիպ խնդիրներ են ծագում»։

Հյուրընկալողներն ըստ ցանկության կարող են օգտագործել համահյուրընկալման վերջնավճարի գործիքները, որպեսզի յուրաքանչյուր ամրագրման համար ձեզ տոկոս կամ ֆիքսված գումար տրամադրեն Airbnb-ի միջոցով։Նրանք կարող են ընտրել վերջնավճարի չորս տարբերակներից մեկը՝ 

• կիսվել մաքրման վճարով 

• տրամադրել մաքրման վճար՝ գումարած ամրագրման գումարի որևէ տոկոս

• տրամադրել յուրաքանչյուր վերջնավճարի տոկոս

• տրամադրել ֆիքսված գումար յուրաքանչյուր վերջնավճարից

Միայն հայտարարությունների տերերը կարող են սահմանել վերջնավճարներ։ Հյուրընկալողի և համահյուրընկալողի գտնվելու վայրից կախված՝ հնարավոր են որոշ սահմանափակումներ։

Երբ հյուրընկալողը սահմանում է համահյուրընկալման վերջնավճար, այն հաստատելու կամ մերժելու համար ունեք 14 օր։ Ընդհանուր առմամբ, դուք հյուրընկալողի հետ քննարկելու և համաձայնեցնելու եք ձեր վերջնավճարի գումարն ու եղանակը, նախքան նա կուղարկի իր հայտը, բայց եթե մերժեք սահմանված վերջնավճարը, հյուրընկալողը պետք է նոր առաջարկ ուղարկի։ 

Վերջնավճարը հաստատելուց հետո դուք կսկսեք ամրագրումների համար վճարումներ ստանալ ժամանումից մոտ 24 ժամ հետո։ Եթե հայտարարության տերը փոխի ընթացիկ վերջնավճարը, այն կկիրառվի միայն այն ամրագրումների համար, որոնք մեկնարկում են փոփոխությունը ձեր կողմից հաստատվելուց հետո։

Այս հոդվածում պարունակվող տեղեկությունները կարող են փոխված լինել հրապարակումից հետո։