Ինչպես ստանալ 5 աստղանի կարծիքներ

Կարծիքները կարող են օգնել ճշգրտումներ մտցնել հայտարարության մեջ, ավելի բարձր դիրք զբաղեցնել որոնման արդյունքներում և համապատասխանել սուպերտանտիրոջ կարգավիճակ ստանալու պահանջներին։ Ուստի միանգամայն բնական է, որ ցանկանում եք հինգ աստղ ստանալ ամեն անգամ, երբ ինչ-որ մեկը մնում է ձեր տարածքում։

Քանի որ սուպերտանտերերը պահպանում են 4,8 կամ ավելի բարձր վարկանիշ, նրանք գիտեն, թե ինչպես ստանալ հինգ աստղանի կարծիքներ։ Մեր տեսանյութում մենք զրուցել ենք Օհայո նահանգի Կոլումբուս քաղաքում գործող սուպերտանտերեր Քեթրինի և Բրայանի հետ, որոնք կիսվել են իրենց լավագույն խորհուրդներով, թե ինչպես ստանալ գերազանց կարծիքներ։

«Ամենաարդյունավետ միջոցներից մեկը, որով կերաշխավորեք հյուրերի գոհունակությունն իրենց այցից, ակնկալիքներ ձևավորելն է, նախքան նրանք կսեղմեն «Ամրագրել» կոճակը»,- ասում է Քեթրինը։ «Մենք ցանկանում ենք հնարավորինս շատ տեղեկություններ տրամադրել մեր հայտարարության էջում, նույնիսկ եթե դա լինի այսպես՝ «Տունը 100-ից ավելի տարեկան է՝ ճռճռացող դռներով»։

«Դեկորի և տարածքի ձևավորման հարցում ամենակարևորն այն է, որ հյուրերն զգան, որ տունն իրենցն է»,- ասում է Քեթրինը։ «Հեռացրեք ձեր բոլոր անձնական լուսանկարներն ու անպետք իրերը»։ Այս ամենն արվում է, որպեսզի հյուրերը հարմարավետ զգան իրենց, թեև միշտ էլ օգտակար կլինի ավելացնել լրացուցիչ շտրիխներ, որպեսզի ջերմություն հաղորդեք տարածքին։

Բծախնդրորեն մտածված ձևավորումը նույնպես կնպաստի, որ հյուրերը լավ զգան իրենց։ «Դա չի նշանակում, որ պետք է ամբողջովին վերափոխեք խոհանոցը»,- ավելացնում է Բրայանը։ «Ընդամենը հարկավոր է, որ միջավայրը լինի հարմարավետ, գեղեցիկ, անկաշկանդ և մաքուր»։

«Երբ մարդիկ գալիս և մնում են ձեր տարածքում, դուք կիսվում եք ոչ միայն տնով, այլև քաղաքով»,- ասում է Քեթրինը։ Նա և Բրայանը հյուրերին տրամադրում են տեղական շամպուն, մազերի կոնդիցիոներ և դեմք լվանալու միջոց, ինչպես նաև անհատ ձեռնարկատիրոջ հրատարակած գրքերի հավաքածու տարածաշրջանի նկարիչների մասին։ «Մենք սիրում ենք Կոլումբուսը հյուրերին ներկայացնել այնպես, ինչպես մենք ենք տեսնում»,- ասում է Քեթրինը։

«Որքան էլ ջանք գործադրեք, որպեսզի լինեք հինգ աստղանի հյուրընկալող, ինչ-որ պահի ինչ-որ բան անխուսափելիորեն սխալ է ընթանալու»,- ասում է Քեթրինը։ Բրայանը համաձայնում է՝ ավելացնելով. «Մենք ունեցանք մի իրավիճակ, երբ խողովակ պայթեց, և այն ողողեց ամբողջ առաջին հարկը»։

Հյուրերը, որոնք նշում էին իրենց հարսանեկան գիշերը, չկարողացան կապ հաստատել նրանց հետ։ «Այդ փորձությունից հետո մենք վարձեցինք մի համահյուրընկալողի, որպեսզի նա կարգավորի նման խնդիրները, եթե մենք կրկին զանգ բաց թողնենք հյուրից»,- ասում է Քեթրինը։

Անկախ այն բանից, թե ինչպիսի տարածք եք առաջարկում Airbnb-ում, հյուրերի կարծիքները կարող են օգտակար լինել և վստահություն հաղորդել։ «Երբ ինչ-որ մեկը գերազանց կարծիք է թողնում մեր մասին, դա պարզապես հաստատում է, որ ամեն ինչ ճիշտ ենք անում, և մեր աշխատանքը լիովին փոխհատուցվում է»,- ասում է Քեթրինը։ «Շնորհիվ այդ աշխատանքի՝ մենք ապրում ենք մի կյանքով, որը մեզ դուր է գալիս»։

Իմացեք ավելին սկսնակների համար նախատեսված մեր ամբողջական տեսաուղեցույցում

Այս հոդվածում պարունակվող տեղեկությունները կարող են փոխված լինել հրապարակումից հետո։