Ինչու են կարծիքները կարևոր

Կարծիքներն ու գնահատականները հյուրերին օգնում են պլանավորել իրենց ճամփորդությունը։ Airbnb-ի տվյալները վկայում են, որ հյուրերն ավելի հակված են ամրագրելու որևէ տարածք, եթե այն ունի ավելի բարձր վարկանիշ։*

Ամեն մեկնումից հետո հյուրընկալողներն ու հյուրերը հնարավորություն ունեն միմյանց մասին կարծիք հայտնելու։ Յուրաքանչյուրը 14 օր ժամանակ ունի կարծիք գրելու համար, որը թաքցված է մնում այնքան ժամանակ, մինչև երկու կողմն էլ ներկայացնեն իրենց կարծիքները, կամ ավարտվի կարծիքի ներկայացման 14-օրյա ժամկետը։ Այնուհետև կարծիքները հրապարակվում են հյուրի պրոֆիլում և հյուրընկալողի հայտարարության ու պրոֆիլի էջերում։

Կարծիք գրելուց բացի՝ հյուրերը կարող են իրենց ընդհանուր փորձառությունը գնահատել մեկից հինգ աստղ միջակայքում։ Գնահատականը ցուցադրվում է յուրաքանչյուր կարծիքի կողքին՝ հյուրերի արձագանքը լավագույն համատեքստով ներկայացնելու համար։ Ձեր ընդհանուր գնահատականը հայտնվում է հայտարարությունում, երբ երեք հյուրից կարծիքներ եք ստանում։

Գնահատականը կարևոր գործոն է սուպերտանտիրոջ կարգավիճակ ստանալու համար։ Սուպերտանտերերը պետք է ունենան առնվազն 4,8 աստղ միջին ընդհանուր գնահատական՝ առնվազն 10 ուղևորությունների կամ 100 գիշեր ընդհանուր տևողությամբ 3 ամրագրումների արդյունքում։

Ձեր գնահատականներն ու կարծիքները կարևոր են նաև Հյուրերի սիրելի բաժնում ընդգրկվելու համար, որը թարմացվում է ամեն օր։

Նրանք կարող են ավելացնել նաև գնահատական և մի քանի կատեգորիաներում նշել, թե ինչն է լավ եղել կամ կարող էր ավելի լավ լինել։ Օրինակ՝ եթե ձեր տարածքը չափազանց մաքուր է, հյուրը կարող է ընտրել հինգ աստղ և «կատարելապես մաքուր լոգասենյակ» բնութագիրը։ Կամ հնարավոր է, որ ավելի ցածր գնահատական ստանաք «Շփում» կատեգորիայում, եթե, հյուրի կարծիքով, մեկնման վերաբերյալ ձեր ցուցումները չափազանց շատ պահանջներ են պարունակում։

Կատեգորիաների գնահատականները չեն ազդում սուպերտանտիրոջ կարգավիճակի կամ ձեր ընդհանուր վարկանիշի վրա, բայց դրանք ազդում են «Հյուրերի սիրելի» նշանակի տրամադրման վրա։ Այդ կատեգորիաներն են․

• Ժամանում․ հյուրերը գնահատում են, թե արդյոք դուք ապահովել եք ժամանման հստակ և պարզ գործընթաց, ինչը կարևոր է հյուրի դրական փորձառության համար։

• Մաքրություն․ հյուրերն ակնկալում են ժամանել մաքուր և կոկիկ տարածք, որը տեսել են ձեր հայտարարության լուսանկարներում։

• Ճշգրտություն․ հյուրերը կարող են հաշվի առնել, թե արդյոք տրամադրել եք հայտարարության ճշգրիտ մանրամասները, այդ թվում՝ հարմարությունների վերաբերյալ թարմացված տեղեկություններ։

• Շփում․ հյուրերը գնահատում են հյուրընկալողների հետ հաղորդակցման իրենց փորձառությունը, այդ թվում՝ արդյոք մեկնումից առաջ կատարելիք առաջադրանքները պարզ և հստակ են եղել։

• Տեղադրություն․ հյուրերը կարող են կարծիք հայտնել այն մասին, թե արդյոք ձեր տարածքի տեղադրությունը ճշգրիտ է ներկայացված հայտարարությունում։

• Գին/որակ հարաբերակցություն․ հյուրերը գնահատում են ձեր տարածքը՝ հիմնվելով իրենց պատկերացումների վրա, թե արդյոք ձեր գները համապատասխանում են առաջարկվածին։

Հյուրերը կարող են իրենց կարծիքի շրջանակներում անձնական նշում ուղարկել ձեզ։ Այն կտեսնեք միայն դուք։ Հյուրերը կկարողանան ձեզ հետ կիսվել մտքերով, որոնք չեն ազդի ձեր վարկանիշի կամ կարծիքի վրա։ Դուք նույնպես կարող եք անձնական նշում ուղարկել հյուրերին։

Հյուրերը կարող են արտահայտել տեսակետներ, որոնց մասին գուցե չէիք մտածել։ Փորձեք բացասական կարծիքներին վերաբերվել որպես ձեր տարածքը կամ հյուրընկալությունը բարելավելու հնարավորությունների։

Դուք միշտ ունեք ձեր տարածքի վերաբերյալ հրապարակային կարծիքներին պատասխանելու հնարավորություն։ Կառուցողական պատասխանը ցույց կտա, որ լրջորեն եք վերաբերվում հյուրերի կարծիքներին և կարևորում եք դրանք։

Հյուրերի մասին կարծիք թողնելը հնարավորություն է տալիս արտահայտելու ձեր երախտագիտությունը և ապահովելու հետադարձ կապ։ Այդ կերպ նաև հիշեցնում եք հյուրերին, որ կարծիք գրեն ձեր մասին։

Ահա որոշ խորհուրդներ, որոնք անհրաժեշտ է հիշել հյուրերի մասին կարծիք հայտնելիս.

• Եղեք հարգալից։

• Հնարավորության դեպքում ներառեք կոնկրետ օրինակներ (օրինակ՝ «Այս հյուրը պահպանել է մեր հանգստի ժամերն ու ամբողջովին հետևել մեկնման վերաբերյալ ցուցումներին»)։

• Զգայուն թեմաներին անդրադառնալիս հնարավորինս նրբանկատ եղեք կամ հյուրին անձնական կարծիք ուղարկեք։

*Հաշվարկը հիմնված է Airbnb-ի՝ 2022 թվականի նոյեմբեր ամսվա ներքին տվյալների վրա։

Այս հոդվածում պարունակվող տեղեկությունները կարող են փոխված լինել հրապարակումից հետո։