Այս բովանդակությունը հասանելի չէ ձեր ընտրած լեզվով, ուստի այն ցուցադրում ենք դրան ամենամոտ լեզվով։

Airbnb-ում խտրականության դեմ պայքարի նոր եղանակ

Ներկայացնում ենք Project Lighthouse նախագիծը, որն ուղղված է խտրականության բացահայտմանը, գնահատմանը և հաղթահարմանը։
Հեղինակ՝ Airbnb, ամսաթիվ՝ 15 հնս, 2020 թ.
8 րոպե ընթերցում
Թարմացվել է՝ 13 դեկ, 2022 թ.

Առանձնահատկություններ

  • Project Lighthouse նախագիծը կօգնի մեզ հասկանալ, թե երբ և ինչպես է ռասայական խտրականություն տեղի ունենում Airbnb-ում

  • Մենք աշխատում ենք քաղաքացիական իրավունքների պաշտպանության խմբերի հետ, որպեսզի այս կարևոր քայլերը կատարենք մտածված ձևով

  • Մենք աշխատում ենք նաև գաղտնիության ապահովման առաջատար կազմակերպությունների հետ՝ հոգալու յուրաքանչյուրի գաղտնիության մասին

Նշում․ մենք նոր թարմացում ենք հրապարակել 2022-ի դեկտեմբերին՝ մանրամասնելով Project Lighthouse-ի շնորհիվ արված նախնական բացահայտումները, ինչպես նաև խտրականության հաղթահարմանն ուղղված լրացուցիչ աշխատանքները։ Ծանոթացեք մանրամասներին։

Մեր առաքելությունը միշտ եղել է ստեղծել մի աշխարհ, որտեղ յուրաքանչյուրն ամենուր իրեն կզգա, ինչպես տանը։ Ռասիզմը, ատելությունը և խտրականությունը հակասում են այն ամենին, ինչին մենք հավատում ենք որպես ընկերություն և համաշխարհային համայնք։ 2016 թվականից ի վեր մենք 1,3 միլիոն մարդ ենք հեռացրել Airbnb-ից ուրիշներին կողմնակալ վերաբերվելու պատճառով, բայց անելիք դեռ շատ կա։

Խտրականության դեմ մեր շարունակական պայքարում կարևոր է հասկանալ, թե երբ և ինչպես է այն տեղի ունենում։ Այդ նպատակով ներկայացնում ենք Project Lighthouse նախագիծը՝ սկզբունքորեն նոր նախաձեռնություն, որը մեկնարկում է Միացյալ Նահանգներում և ուղղված է Airbnb-ի միջոցով ամրագրելու կամ հյուրընկալելու ժամանակ խտրականության բացահայտմանը, գնահատմանը և հաղթահարմանը։

Գիտենք, որ Project Lighthouse նախագծի և դրա նշանակության վերաբերյալ հարցեր կարող եք ունենալ, և հնարավորինս պատասխանել ենք դրանց այստեղ։

Ինչպե՞ս է գործելու Project Lighthouse-ը
Խտրականությունը հիմնված է ընկալման վրա, իսկ Airbnb-ում մարդիկ ռասան ընկալում են անուններից և պրոֆիլների լուսանկարներից։ Քաղաքացիական իրավունքների պաշտպանության այնպիսի կազմակերպությունների հետ միասին, ինչպիսիք են Color Of Change-ը և Upturn-ը, մենք սկսում ենք նախաձեռնությունը հետազոտություններից, որպեսզի հասկանանք, թե երբ և որտեղ է մեր հարթակում տեղի ունենում ռասայական խտրականություն, և արդյոք դրա դեմ պայքարի մեր քաղաքականություններն արդյունավետ են։

Ինչպե՞ս է Airbnb-ն մշակել Project Lighthouse-ը
Որպեսզի այս կարևոր աշխատանքն իրականացնենք մտածված կերպով՝ պահպանելով յուրաքանչյուրի գաղտնիությունը, մենք Project Lighthouse-ը մշակել ենք՝ համագործակցելով քաղաքացիական իրավունքների և գաղտնիության պաշտպանության առաջատար կազմակերպությունների հետ, որոնց թվում՝ Asian Americans Advancing Justice - AAJC, Center for Democracy & Technology, Color Of Change, The Leadership Conference on Civil & Human Rights, LULAC, NAACP, National Action Network և Upturn։

Ո՞վ է համապատասխանում մասնակցության պահանջներին
Այս պահին նախագիծը ներառում է միայն ԱՄՆ-ում բնակվող տանտերերին և հյուրերին։

Ե՞րբ կմեկնարկի Project Lighthouse-ը
Հետազոտությունը նախատեսվում է սկսել սեպտեմբերին, և բոլոր հյուրընկալողներն ու հյուրերը հնարավորություն կունենան հրաժարվելու մասնակցությունից։ Հունիսի 30-ից մենք տեղեկություններ ենք ուղարկել գործընթացի և այն մասին, թե ինչպես կարող եք հրաժարվել մասնակցությունից։ Բացի այդ, բոլորը ծանուցում կստանան նախագծի մեկնարկից 30 օր առաջ՝ հրաժարվելու համար, եթե որոշեն չմասնակցել։

Ինչպե՞ս է Airbnb-ն ուզում օգտագործել իմ տվյալները
Այս նախագիծը չափում է ընկալման վրա հիմնված խտրականությունը։ Մարդիկ հաճախ ենթադրում են ինչ-որ մեկի ռասան՝ հիմնվելով նրա անվան և տեսքի վրա։ Այս ընկալումները ստանալու համար մենք Airbnb-ի պրոֆիլի լուսանկարներն ու դրանց հետ կապված անունները կտրամադրենք Airbnb-ից անկախ գործընկեր-կազմակերպության։ Այս կազմակերպությունը գործում է գաղտնիության խիստ պայմանագրով, և նրան արգելված է այդ տեղեկությունները փոխանցել որևէ այլ անձի։

Մեր գործընկերը կնայի այս լուսանկարներին ու անուններին և կնշի իր պատկերացումները կամ այն, թե ինչ ռասա են ենթադրում մեր տրամադրած տեղեկությունները։ Նա Airbnb-ի մասնագիտացված թիմի հետ կկիսվի այս պատկերացումներով՝ բացառապես խտրականության դեմ պայքարի նպատակներով։ Նախքան տվյալների տրամադրումը, սակայն, ընկալվող ռասան հաշվի հետ կապող բոլոր տեղեկությունները հեռացվում են՝ ներառյալ լուսանկարը, անունը և այլ մանրամասներ, որոնք կարող են օգտագործվել՝ պարզելու, թե որ Airbnb հաշվին են դրանք պատկանում։ Airbnb-ն ընկալվող ռասայական պատկանելությունը չի կապի կոնկրետ հաշիվների հետ և ձեզ չի թիրախավորի այս տեղեկությունների հիման վրա։

Մենք կօգտագործենք մեր գործընկերոջ պատկերացումները, օրինակ, պարզելու, թե արդյոք որոշակի ռասայի պատկանող անձանց ամրագրումներն ավելի հաճախ են մերժվում, քան մյուսներինը։ Դա մեզ կօգնի նոր գործառույթներ և կանոններ մշակել ցանկացած տարբերակման դեմ պայքարելու համար։ Մենք համագործակցում ենք քաղաքացիական իրավունքների և գաղտնիության պաշտպանության կազմակերպությունների հետ, որպեսզի համոզվենք, որ այս աշխատանքը կատարում ենք մտածված կերպով և հարգելով յուրաքանչյուրի գաղտնիությունը։

Արդյո՞ք Airbnb-ն օգտագործելու է ալգորիթմ, դեմքի ճանաչման տեխնոլոգիա կամ մեքենայական ուսուցում
Ոչ։ Մենք կարծում ենք, որ ռասայի մասին ընկալվող տեղեկությունները որոշելու լավագույն միջոցը մարդկային ընկալումն է, այլ ոչ թե մեքենայական ուսուցումը։ Ալգորիթմների, դեմքի ճանաչման տեխնոլոգիայի կամ մեքենայական ուսուցման օգտագործումը այնպիսի զգայուն բանի համար, ինչպիսին ռասան է, պահանջում է զգուշավոր մոտեցում և ջանքերի ներդրում, այդ թվում՝ քաղաքացիական իրավունքների և գաղտնիության պաշտպանության կազմակերպություններից։ Եթե մտածեինք այդ մասին, կդիմեինք նրանց՝ խորհրդի ու աջակցության համար, ինչպես նաև նախապես ձեզ կտեղեկացնեինք այդ մասին։

Պրոֆիլի լուսանկարները չեն ցուցադրվում, քանի դեռ ամրագրումը հաստատված չէ։ Ինչո՞ւ եք պլանավորում հետազոտության մեջ օգտագործել պրոֆիլի լուսանկարները
Թեև ամրագրման փուլում պրոֆիլի լուսանկարները թաքցված են, մենք ուզում ենք հասկանալ, թե ինչպես դրանք կարող են ազդել հարթակում օգտատերերի շփման մյուս ասպեկտների, օրինակ՝ չեղարկումների և կարծիքների վրա։

Ինչպե՞ս է Airbnb-ն պահպանելու իմ գաղտնիությունը
Նախքան ռասայի մասին ընկալվող տեղեկությունները վերլուծելը բոլոր տեղեկություններն առանձնացվում են ձեր պրոֆիլից, ինչը նշանակում է, որ դրանք չեն փոխանցվում որևէ կոնկրետ Airbnb հաշվի։ Մենք այս տեղեկությունները չենք օգտագործի որևէ մեկի անհատական փորձառությունը Airbnb-ում որպես հյուրընկալող կամ հյուր փոխելու համար, մարկետինգային կամ գովազդային նպատակներով կամ այլ նպատակով, բացի խտրականության դեմ պայքարից։ Մենք ավելի մեծ մասշտաբով կվերլուծենք օրինաչափությունները։

Ինչո՞ւ է Airbnb-ն Project Lighthouse-ի մասին հիմա հայտարարում
Մենք այս նախագծի վրա աշխատել ենք մոտ երկու տարի և նախատեսում էինք այն մեկնարկել 2020 թվականի երկրորդ կեսին։ Սակայն վերջին իրադարձությունները ԱՄՆ-ում ստիպեցին մեզ ավելի արագ գործել։ Թեև Airbnb-ն արդեն ուսումնասիրում է խտրականության մասին օգտատերերի հաղորդած անհատական դեպքերը, սակայն ներկա պահին մենք չունենք ընդհանուր միտումներն ու օրինաչափությունները չափելու միջոց։ Այդ առանձին դեպքերը կարող են ավելի մեծ, համակարգային խնդրի նշան լինել, և մենք ուզում ենք պայքարել նաև դրա դեմ։

Ի՞նչ կպատահի, եթե Airbnb-ն անհավասարություններ բացահայտի
Project Lighthouse-ը Airbnb-ում խտրականության կանխարգելման և դրան արձագանքելու ուղղությամբ մեր շարունակական աշխատանքի մի մասն է։ Ցանկացած գաղափար կօգտագործվի նոր գործառույթներ և կանոններ մշակելու համար, որպեսզի մեր հարթակում ավելի արդար պայմաններ ապահովվեն։ Մենք ցանկանում ենք ևս մեկ քայլ կատարել մեր առաքելության ուղղությամբ՝ օգնելու յուրաքանչյուր մարդու իրեն ընդունված զգալ։

Գոյություն ունեն խտրականության այլ տեսակներ։ Ինչո՞ւ է Airbnb-ն կենտրոնանում ռասայի վրա
Մենք դեմ ենք խտրականության բոլոր տեսակներին, ոչ միայն ռասայական կամ մեկ կոնկրետ համայնքի նկատմամբ խտրականությանը։ Մենք աշխատում ենք ռասայի, գույնի, ազգային ծագման, տարիքի, սեռի, գենդերային ինքնության, կրոնի, սեռական կողմնորոշման, հաշմանդամության և ընտանեկան կարգավիճակի հիմքերով խտրականությունների դեմ։ Սրանք բոլոր այն խնդիրներն են, որոնք ազդում են ամբողջ աշխարհում հյուրընկալողների և հյուրերի վրա։ Սա ավելի մեծ պայքարի մի մասն է։

Ինչպե՞ս կարող եմ հրաժարվել Project Lighthouse նախագծին մասնակցելուց
Կարող եք ցանկացած պահի ձեր գաղտնիության և փոխանակման կարգավորումներում փոփոխել հրաժարման կարգավորումները, և եթե հրաժարվեք, ձեր տեղեկություններն այդ պահից ի վեր այլևս չեն հավաքվի Project Lighthouse-ի համար։ Բայց իմացեք, որ այս նպատակով ձեր տվյալները տրամադրելով՝ դուք օգնում եք մեզ ստեղծել նոր նշաձող Airbnb-ում խտրականության բացահայտման, գնահատման և հաղթահարման համար։ Նախքան ռասայի վերաբերյալ տեղեկությունների ընկալման վերլուծումը բոլոր տեղեկությունները կառանձնացվեն ձեր պրոֆիլից, այսինքն՝ դրանք կցված չեն լինի անմիջապես ձեր Airbnb հաշվին։

Ինչպե՞ս է Airbnb-ն օգնում մյուս ընկերություններին պայքարել խտրականության դեմ
Տեխնոլոգիական ընկերությունները հսկայական պատասխանատվություն ունեն՝ բոլորի համար հավասար պայմաններով փորձառություն ապահովելու։ Մենք ուզում ենք, որ Project Lighthouse-ի ազդեցությունը դուրս գա Airbnb-ի սահմաններից։ Այդ պատճառով հրապարակում ենք այս նախագծի մեթոդաբանությունը հանրությանը հասանելի փաստաթղթում։ Հուսով ենք, որ այն հիմք կծառայի մյուս ընկերությունների համար, սկիզբ կդնի հետագա նորամուծությունների, որոնցով խտրականությանը կտրվի խիստ գնահատական, միևնույն ժամանակ կպահպանվի օգտատիրոջ գաղտնիությունը։

Մինչ այժմ ի՞նչ է արել Airbnb-ն խտրականության դեմ պայքարելու համար
Վերջին մի քանի տարիների ընթացքում խտրականության հաղթահարմանն ուղղված մի քանի փոփոխություն ենք կատարել Airbnb-ում, այդ թվում՝

  • Խտրականության դեմ քաղաքականություն։ Airbnb-ն օգտագործող ցանկացած ոք պետք է համաձայնի մեր Համայնքի պարտավորությանը և Խտրականության դեմ քաղաքականությանը։ Եթե դուք առնչվել եք խտրականության, մենք կուսումնասիրենք խնդիրը, միջոցներ կձեռնարկենք, իսկ անհրաժեշտության դեպքում կօգնենք ձեզ գտնել մեկ այլ մնալու տեղ։
  • Պրոֆիլի լուսանկարների պաշտպանություն։ Բոլորս էլ երբեմն կողմնակալություն ենք դրսևորում։ Բայց Airbnb-ի պես ընկերությունները կարող են անել ավելին՝ ստեղծելու գործիքներ, որոնք օգնում են կանխել կողմնակալ որոշումների կայացումը։ Այդ իսկ պատճառով՝ հյուրերի պրոֆիլի լուսանկարները չեն ցուցադրվում հյուրընկալողներին մինչև ամրագրման հաստատումը։ Այդ կերպ մենք դրդում ենք հյուրընկալողներին ավելի անաչառ որոշում կայացնել։
  • Օբյեկտիվ ամրագրումներ։ Ակնթարթային ամրագրումը հնարավորություն է տալիս անմիջապես ամրագրել տարածքը՝ հեշտացնելով գործընթացը հյուրընկալողների համար և ապահովելով, որ այն օբյեկտիվ լինի հյուրերի համար։ Միլիոնավոր հայտարարություններ կարող են ամրագրվել այս եղանակով, և դրանց թիվն անընդհատ աճում է։
  • Խտրականության դեմ պայքարող հատուկ թիմ։ Airbnb-ն ունի մասնագիտացված թիմ, որի նպատակն է՝ իրականացնել խտրականության կանխմանն ու վերացմանը ուղղված նախաձեռնություններ, ինչպիսիք են Project Lighthouse-ը և պրոֆիլի լուսանկարների պաշտպանությունը։

Միայն Project Lighthouse-ը վերջ չի դնի խտրականության մեր հարթակում, բայց այն կարևոր քայլ է, որը կարող է օգնել մեզ բացահայտել խտրականությունը, որը հակառակ դեպքում չբացահայտված կմնա։ Եվ սա այն բազմաթիվ նախաձեռնություններից մեկն է, որի միջոցով ուզում ենք Airbnb-ում հավասար պայմաններ ապահովել բոլորի համար։

Շնորհակալություն, որ մեր համայնքի անդամ եք և որ մեզ հետ միասին աշխատում եք՝ ստեղծելու մի աշխարհ, որտեղ յուրաքանչյուրն ամենուր կզգա իրեն ինչպես տանը։

Այս հոդվածում պարունակվող տեղեկությունները կարող են փոխված լինել հրապարակումից հետո։

Առանձնահատկություններ

  • Project Lighthouse նախագիծը կօգնի մեզ հասկանալ, թե երբ և ինչպես է ռասայական խտրականություն տեղի ունենում Airbnb-ում

  • Մենք աշխատում ենք քաղաքացիական իրավունքների պաշտպանության խմբերի հետ, որպեսզի այս կարևոր քայլերը կատարենք մտածված ձևով

  • Մենք աշխատում ենք նաև գաղտնիության ապահովման առաջատար կազմակերպությունների հետ՝ հոգալու յուրաքանչյուրի գաղտնիության մասին

Airbnb
15 հնս, 2020 թ.
Հոդվածն օգտակա՞ր էր։