Ինչպես տարածքը հայտնի դարձնել սոցցանցերում
Առանձնահատկություններ
Ընտրեք հիշվող և լավ մտածված անուն, որը կտարբերակի ձեր տարածքը
Տեղադրեք գեղեցիկ, բարձրորակ լուսանկարներ, որպեսզի ոգեշնչեք մարդկանց և ստանաք ամրագրումներ
Համագործակցեք տեղացի ինֆլյուենսերների հետ՝ նրանց առաջարկելով զեղչված գնով հանգիստ՝ բովանդակության դիմաց
Ձեռք բերեք հետևորդներ և դարձեք առցանց դեսպան ձեր տարածաշրջանում
- Կարդալով մեր ամբողջական ուղեցույցը՝ դուք կպարզեք, թե ինչպես կարող եք բարելավել հյուրընկալման ձեր հմտությունները
Սոցցանցեր մտնելիս կարող է թվալ, թե մոլորվել եք անտառում։ Որտեղի՞ց սկսել։ Ինչպե՞ս ստեղծել հետաքրքիր բովանդակություն։ Եվ ինչպե՞ս կարող է դա ավելի շատ ամրագրումներ ապահովել։ Վաշինգտոնի Սքայկոմիշ քաղաքում գտնվող Թայ հաուսի սեփականատեր Թոմ Ֆելդմանը պատմում է՝ ինչպես ձեռք բերել հետևորդներ և այնպես անել, որ բոլորը ցանկանան այցելել ձեր տունը։
«Մենք սկսել ենք հյուրընկալել 2012 թվականից, երբ գնեցինք մեր առաջին տուն-քոլիկը՝ Թայ հաուսը։ Մենք կարգի բերեցինք այն, Airbnb-ում հայտարարություն տեղադրեցինք և Instagram-ում հաշիվ բացեցինք մեր տան և տարածաշրջանի կինեմատոգրաֆիկ տեսարանների նկարներով, տեղադրեցինք նաև մեր արշավների, տեղի տեսարժան վայրերի և այն ամենի նկարները, ինչը մեզ դուր էր գալիս այդ տեղանքում։ Դրանից կարճ ժամանակ անց՝ հայտնի լուսանկարիչ Ալեքս Սթրոլը կապվեց մեզ հետ և առաջարկեց համագործակցել։ Մենք նրան հյուրընկալեցինք երկու ամիս, որը այսպես կոչված ստեղծագործական հանգիստ էր, փոխարենը ունեցանք լուսանկարներ՝ մեր լրահոսում ներկայացնելու համար։ Երբ սկսեցինք հրապարակել Ալեքսի լուսանկարները, մեր պահանջարկը մեծ թափով աճեց։ Դա նախատեսվող բազմաթիվ համագործակցություններից ու մրցույթներից առաջինն էր։
«Ես և ընտանիքս այժմ երեք եռանկյունաձև տներ ենք վարձակալությամբ տալիս և շարունակում ենք հյուրընկալել ինֆլյուենսերների՝ աշխարհի տարբեր մասերից։ Մեր լրահոսում ներկայացնում ենք նրանց հեղինակային բովանդակությունը և փոխարենը տալիս ենք մնալու տեղ, որպեսզի ուսումնասիրեն, արկածներ որոնեն և հանգստանան։ Սա դարձել է մեր հիմնական մարկետինգային մեթոդներից մեկը։ Մեր զբաղվածության ցուցանիշը 30%-ից մոտեցել է 100%-ի․ մեզ մոտ զբաղված է լինում ինչպես աշխատանքային օրերին, այնպես էլ մեռյալ սեզոնի ամիսներին։ Մենք նաև մոտ 115 000 առցանց հետևորդ ենք ձեռք բերել։ Ահա մեր խորհուրդները, թե ինչպես կարող եք ձեր տունը ճանաչելի դարձնել սոցցանցերում»։
1. Անվանեք ձեր տարածքը
«Ձեր տունը ճանաչելի դարձնելու առաջին քայլը կարող է փոքր թվալ, բայց այն կարևոր է. դա տարածքի համար անվանում գտնելն է։ Գտեք տարբերվող, հիշվող և լավ մտածված անվանում։ Դրանից հետո կարող եք ստեղծել տան բրենդը և ձեր օգտանունը գրանցել Instagram-ում։
«Ահա մի քանի հարցեր, որոնք կօգնեն անվանում մտածել.
- Ի՞նչ տեսակի տուն ունեք։ Շալե՞ է, թե՞ լողափնյա սեփականություն։ Թյուդորական ոճի տո՞ւն է, թե՞ լոֆթ։
- Ունի՞ ինչ-որ թեմա։ Ձեր ինտերիերն ունի՞ որոշակի ոճ։ Գուցե այն ծովահենային թեմատիկա՞ ունի (կա՛ այդպիսին)։
- Ի՞նչ կապ կա ձեր գտնվելու վայրի, քաղաքի կամ տեղանքի հետ։ Կարո՞ղ եք այն ներառել հայտարարության անվան մեջ։
- Ունի՞ որևէ պատմական նշանակություն։ Կատարյալ անվանումը գուցե անցյալում է թաքնված։
«Առցանց ուսումնասիրություն կատարեք և պարզեք, թե ինչ անվանումներ ունեն այլ հայտարարություններ, ինչպես նաև՝ ինչ անուններ կան սոցցանցերում։ Մեր առաջին տնակն անվանեցինք մոտակա գետերից մեկի՝ Թայ գետի անունով։ Անվան երկրորդ մասը՝ «հաուսը» ընտրելիս մեզ ոգեշնչեց Լևենվորթ կոչվող, բավարական ոճով հարևան քաղաքը։ Միասին ստացվեց Թայ հաուս»։
2. Սկսեք գեղեցիկ լուսանկարներից
«Անվանում մտածելուց և սոցցանցերում գովազդման ձևերը ճշտելուց հետո կցանկանաք հայտարարությունը զարդարել գեղեցիկ նկարներով։ Մի սկսեք, կրկնում եմ, մի սկսեք անորակ լուսանկարներով։ Ձեր լրահոսի նկարները մարդիկ առաջինն են տեսնում, իսկ ձեր ցանկությունն է, որ նրանք ոգեշնչվեն դրանցից։ Հենց այդ նկարներից է կախված, թե հյուրերին որքանով կհետաքրքրի ձեր հայտարարությունը։ Լուսանկարները պետք է լինեն.
- Համահունչ. պահպանեք լուսանկարների միանման տեսքն ու ազդեցիկ գեղագիտությունը։
- Բարձրորակ. տեղադրեք պարզ, վառ, բարձր որակի նկարներ և տեսանյութեր, խուսափեք հատիկավոր կամ աղոտ լուսանկարներից։
- ճշգրիտ. լուսանկարներում պետք է լավ արտացոլվի ձեր սեփականությունը։
«Փորձեք նկարել այն, ինչն առանձնացնում է ձեր տունը։ Ի՞նչն է դա՝ ինտերիե՞րը, ո՞ճը, թե՞ գտնվելու վայրը։ Գտեք, թե ինչն է իսկապես հետաքրքիր դարձնում ձեր տարածքը։ Հիշեք, որ դուք ոչ միայն ձեր տարածքն եք գովազդում, այլև այն, ինչի հետ հյուրերը կարող են առնչվել ձեր տարածքն այցելելով. դա տեղադրությունն է, ձեր տարածաշրջանի տեսարժան վայրերն ու միջոցառումները։ Եթե լավ չեք լուսանկարում, վարձեք պրոֆեսիոնալ լուսանկարիչ»։
3. Եղեք ստեղծարար և համագործակցեք
«Ձեր լրահոսի համար գեղեցիկ բովանդակություն ստեղծելու մեկ այլ միջոց է ինֆլյուենսերների (օրինակ՝ լուսանկարիչների, բլոգերների և տեսանկարահանողների) հետ համագործակցելը և բովանդակության դիմաց զեղչով գիշերակաց առաջարկելը։ Խորհուրդ ենք տալիս գտնել տեղացի լուսանկարիչների, բլոգերների, տեսանկարահանողների ու բովանդակություն ստեղծողների և համագործակցել նրանց հետ։
«Այս ռազմավարությունը մեր էջի թրաֆիկի մեծացման մեթոդներից մեկն է։ Երբ ինֆլյուենսերները կիսվեն ձեր տարածքի վերաբերյալ իրենց գրառումներով, նոր օգտատերերը կտեսնեն դրանք և կբացահայտեն ձեր տունը։
«Ինֆլյուենսերներին դիմելիս կարևոր է.
- Լինել պրոֆեսիոնալ։ Եղեք պատրաստված և տեղեկացված։ Տվեք ճիշտ հարցեր, որոնք կօգնեն կառուցել համագործակցությունը։
- Լինել պարզ։ Կարելի է դիմել նույնիսկ այսպիսի պարզությամբ. «Ողջո՛ւյն, ինձ դուր է գալիս ձեր աշխատանքը։ Ես նոր եմ սկսում իմ բիզնեսն Airbnb-ում։ Ի՞նչ կասեք ստեղծագործական փոխանակման մասին՝ անվճար գիշերակաց՝ ձեր անունից հրապարակված նկարների կամ գրառման դիմաց։
- Հստակեցնել սպասելիքները։ Փոխադարձ համաձայնագիր կազմեք, որպեսզի պարզ լինի, թե ձեզանից յուրաքանչյուրն ինչ է սպասում և ինչ է ստանալու։ Այդ համաձայնագիրը պետք է ներառի մանրամասներ, ինչպիսիք են հանձնման ամսաթվերը, նկարների օգտագործման իրավունքները, պիտակների նշումը, նկարների և (կամ) տեսանյութերի քանակը, ֆայլերի տեսակները և այլն։
- Առաջնորդվել փոխշահավետության սկզբունքով։ Դա ընդունեք որպես համագործակցություն և աշխատեք, որ այն շահավետ լինի երկու կողմի համար։
Մեկ այլ առնչվող խորհուրդ՝ տարածքը երբեք դատարկ մի թողեք։ Եթե վերջին պահի ազատ ամսաթվեր ունեք, օգտվեք ամրագրումներ չունենալուց և այդ ժամանակն օգտագործեք մարկետինգի նպատակով։ Հրավիրեք որևէ տեղացի ինֆլյուենսերի՝ մնալու ձեր տարածքում, և այդ ժամանակն օգտագործեք ձեր լրահոսի համար լրացուցիչ բովանդակություն ստեղծելու համար։
4. Ձեռք բերեք հետևորդներ
Համացանցում ձեր ներկայությունը հաստատելուց և լրահոսը հիանալի նկարներով հարստացնելուց հետո ժամանակն է ճանաչելի դառնալու։ Դա կարելի է անել տարբեր ձևերով.
- Եղեք ձեր տարածաշրջանի առցանց դեսպանը։ Գտեք ձեզ համապատասխան առցանց խմբեր և ակտիվ եղեք դրանցում։ Թայ հաուսի դեպքում մենք սովորաբար հետևում ենք տեղական բիզնեսների սոցցանցային էջերին և հարևան վայրերի հեշթեգներին։ Օրինակ՝ հետևում ենք մոտակա լեռնադահուկային հանգստավայրի էջին և կարող ենք պատասխանել այլ մարդկանց թողած հարցերին կամ մեկնաբանել այսպես. «Հաջորդ անգամ քաղաքն այցելելիս մնացեք մեզ մոտ»։
- Համագործակցեք հայտնի ապրանքանիշով ընկերությունների հետ, կազմակերպեք մրցույթներ և խաղարկություններ։ Մեր հետևորդների թիվը մեծացնելու համար մենք նաև մրցույթներ և ակցիաներ ենք կազմակերպում։ Ցուցաբերեք ստեղծագործական մոտեցում և համագործակցեք ձեր «ապրանքանիշին» հարմար ընկերությունների հետ։ Մենք համագործակցել ենք վերմակներ, անկողնային պարագաներ և դանակ-պատառաքաղ արտադրող ընկերությունների հետ՝ միմյանց ներկայացնելու մեր լսարաններին։ Մենք դիմեցինք նրանց՝ ասելով. «Մենք մտադիր ենք մի քանի ինֆլյուենսերների հետ խոսել ձեր արտադրանքի մասին։ Կցանկանայի՞ք համագործակցել։ Ես կարող եմ անվճար մնալու տեղ առաջարկել»։ Սա նույնպես հիանալի հնարավորություն է էլփոստի հասցեների շտեմարան ստեղծելու համար։
5. Եղեք անկեղծ
Որպես կանոն՝ մարդկանց վանում է ինքնագովազդը՝ լինի դա առցանց, թե դեմառդեմ, ուստի, կարևոր է բոլոր շփումներում բնական լինելը։ Ինֆլյուենսերների գրառումները մի մեկնաբանեք նույն հաղորդագրությամբ՝ զուտ տեսանելի լինելու համար, կամ մի սկսեք սպամ ուղարկել ձեզ հանդիպող բոլոր հաշիվներին։ Սահմանագիծը շատ նուրբ է, և մարդիկ կարող են զգալ, որ ամեն կերպ ջանում եք ինչ-որ բան հրամցնել իրենց։ Եղեք անկեղծ և կգրավեք ճիշտ մարդկանց։
Ես մի պարզ ու աշխատող կանոն ունեմ. փորձում եմ չչարաշահել հեշթեգների օգտագործումը։ Լուսանկարի վրա մի քանի համապատասխան գրառում ենք նշում լրահոսից և յուրաքանչյուր գրառման համար միայն 5-10 հեշթեգ ենք օգտագործում։ Որոշ մարդիկ չափազանց շատ պիտակներ ու հեշթեգներ են օգտագործում լուսանկարում, որպեսզի տեսանելի լինեն, բայց ես ավելի զգույշ ու բնական մոտեցում եմ նախընտրում։
Հիշեք, որ հետևորդներ ձեռք բերելու համար ժամանակ է պահանջվում․ հնարավոր չէ նրանց մի գիշերում հավաքել։ Անպայման օգտվեք այս խորհուրդներից, եղեք ստեղծագործ և հաստատ կնկատեք, թե ինչպես է մեծանում ձեր սոցցանցային համայնքը, իսկ դրա հետ մեկտեղ կաճեն ձեր զբաղվածության ցուցանիշները։
Մաղթում ենք հաջող հյուրընկալում։
Թոմ
Առանձնահատկություններ
Ընտրեք հիշվող և լավ մտածված անուն, որը կտարբերակի ձեր տարածքը
Տեղադրեք գեղեցիկ, բարձրորակ լուսանկարներ, որպեսզի ոգեշնչեք մարդկանց և ստանաք ամրագրումներ
Համագործակցեք տեղացի ինֆլյուենսերների հետ՝ նրանց առաջարկելով զեղչված գնով հանգիստ՝ բովանդակության դիմաց
Ձեռք բերեք հետևորդներ և դարձեք առցանց դեսպան ձեր տարածաշրջանում
- Կարդալով մեր ամբողջական ուղեցույցը՝ դուք կպարզեք, թե ինչպես կարող եք բարելավել հյուրընկալման ձեր հմտությունները