Ինչպես օգնել կանգնեցնել թրաֆիքինգը

Որպես հյուրընկալող կամ հյուր՝ կարող եք քայլեր ձեռնարկել, որպեսզի բացահայտեք ձեր տարածքում մարդկանց թրաֆիքինգի որևէ հնարավոր իրավիճակ և արձագանքեք այդ իրավիճակին։ Սա հաշվի առնելով՝ հորդորում ենք մարդկանց թրաֆիքինգի կասկածելի դեպքերի մասին հայտնել ԱՄՆ-ում մարդկանց թրաֆիքինգի դեմ պայքարի ազգային թեժ գծի միջոցով։ Եթե դուք գտնվում եք ԱՄՆ-ից դուրս, կարող եք ամբողջ աշխարհում մարդկանց թրաֆիքինգի խնդրով զբաղվող կազմակերպություններ գտնել Ժամանակակից ստրկության համաշխարհային տեղեկատուում (GMSD)։

Մարդկանց թրաֆիքինգի սահմանումը

Թրաֆիքինգի սահմանումը կարող է տարբեր լինել՝ նայած, թե որ երկրում եք գտնվում, սակայն երկրների մեծ մասի սահմանումներում օգտագործվում են երեք հիմնական տարրեր, որոնք ձևակերպել է Միավորված ազգերի կազմակերպությունը։ Թրաֆիքինգ համարվող իրավիճակները պետք է ներառեն՝ 

1. Գործողություն՝ անձանց հավաքագրում, տեղափոխում, փոխանցում, պարտակում կամ ստացում 
2. Միջոց՝ ուժի սպառնալիք կամ կիրառում, առևանգում, խարդախություն, հարկադրանք կամ իշխանության չարաշահում։ 
3. Նպատակ՝ շահագործում, այդ թվում՝ այլ անձանց սեռական ծառայությունների շահագործում կամ սեռական շահագործման այլ ձևեր, հարկադիր աշխատանք կամ ծառայություններ, ստրկություն կամ ստրկությանը նմանվող գործունեություն, տաժանակրություն կամ օրգանների հեռացում։

Խոցելի անձինք

Թեև ցանկացած մարդ կարող է թրաֆիքինգի ենթարկվել, որոշ մարդիկ չբավարարված հիմնական պահանջմունքների պատճառով շատ ավելի խոցելի են, քան մյուսները։ Նրանք են՝ աղքատ կամ անկայուն բնակարանային պայմաններում ապրող մարդիկ և տրավմաների կամ կախվածության պատմություն ունեցող մարդիկ։ Արդի և պատմական խտրականության և անհավասարության պատճառով ավելի հավանական է, որ շահագործվեն և թրաֆիքինգի զոհ դառնան գունավոր մարդիկ, ներգաղթյալները և որպես ԼԳԲՏՔ+ նույնականացվող մարդիկ՝ այդ խոցելիություններով պայմանավորված։ 

Որպեսզի որևէ իրավիճակ համարվի մարդկանց թրաֆիքինգ, պետք է առկա լինեն ուժի կիրառման, խարդախության կամ հարկադրանքի նշաններ։ Դրանք կարող են արտահայտվել հետևյալ կերպ․

• Անձը չի կարող ազատորեն կամ անվտանգ կերպով դուրս գալ իրավիճակից և չունի վերահսկողություն իր դրամական միջոցների և անձնական իրերի նկատմամբ
• անձը հարկադրված է աշխատանք կատարել այնպիսի պայմաններով, որոնք տարբերվում են աշխատանքի ընդունվելու պահին սկզբնապես համաձայնեցված պայմաններից
• մեկ ուրիշը անձին ստիպում է օգտագործել թմրամիջոցներ կամ ալկոհոլ
• ֆիզիկական ուժ կամ բռնություն գործադրելու սպառնալիքներ 
• ֆիզիկական սահմանափակումների կիրառում
• մարմնական վնասվածքներ

Բնութագրեր, որոնք վկայում են տարածքում շահագործման մասին․

• Հարկադիր աշխատանք.
  • աշխատողն անչափահաս է
  • վատ սանիտարական պայմանների, թերսնուցման կամ ուժասպառության նշաններ
  • գործատուն աշխատողին տեղավորել է ոչ պատշաճ տարածքում (առանձնանալու հնարավորության բացակայություն, քնելու հանպատրաստից կամ ժամանակավոր հարմարություն)
  • աշխատողը փող է պարտք գործատուին կամ հավաքագրողին և (կամ) չի ստանում իրեն խոստացված վճարը կամ հասանելիք գումարը
  • աշխատողին չի թույլատրվում պատշաճ ընդմիջումներ անել
  • աշխատողն աշխատում է վտանգավոր կամ առողջության համար վնասակար աշխատանքային պայմաններում և չի ստացել պատշաճ պաշտպանիչ հանդերձանք կամ չի անցել վերապատրաստում
  • ուրիշների հետ խոսելիս կամ շփվելիս վերահսկվում է մեկ այլ անձի կողմից
• Թրաֆիքինգ սեռական շահագործման նպատակով.
  • տարածքի հասցեն նշված է կոմերցիոն սեքսի առցանց գովազդերում
  • օրվա տարբեր ժամերին կողմնակի հյուրերի հաճախակի այցերի մասին հաղորդումներ
  • սեքսի պարագաների չափազանց մեծ քանակություն
  • կոմերցիոն նշանակության տեսա- և լուսանկարահանման սարքերի առկայություն

Ինչ անել, եթե բախվեք իրավիճակի, որը կարող է կապ ունենալ թրաֆիքինգի հետ

Որպես հյուրընկալող կամ հյուր՝ կարող եք օգնել կանգնեցնել մարդկանց թրաֆիքինգը։ Եթե ձեր տարածքում հանդիպեք այնպիսի իրավիճակի, որը հնարավոր առնչություն ունի թրաֆիքինգին, կարող եք օգնություն ստանալ Մարդկանց թրաֆիքինգի դեմ պայքարի ազգային թեժ գծի միջոցով՝ զանգելով 1-888-373-7888 հեռախոսահամարին, «BeFree» տեքստային հաղորդագրություն ուղարկելով 233733 համարին, կամ՝ humantraffickinghotline.org/chat կայքէջում առցանց զրույցի միջոցով։ Թեժ գիծը հասանելի է շուրջօրյա, անվճար է, գաղտնի և գործում է 200-ից ավելի լեզուներով։ 

Հնարավոր թրաֆիքինգի դեպքի մասին պետք է հաղորդեք նաև Airbnb-ին։ Airbnb-ի Անվտանգության կենտրոնը հասանելի է հավելվածում և պարունակում է կարևոր ռեսուրսներ։ Դուք կարող եք Airbnb-ի հրատապ աջակցման գծին միանալ Անվտանգության կենտրոնի, ինչպես նաև արտակարգ իրավիճակների տեղական ծառայությունների միջոցով, որտեղ էլ գտնվեք։