Անցնել բովանդակությանը
    Անցեք առաջ՝ առաջարկվող արդյունքներին ծանոթանալու համար

    Հարգելի պատճառների կիրառման քաղաքականություն

    Նշում․ այս հոդվածում չեն դիտարկվում կորոնավիրուսի (COVID-19) համավարակի հետ կապված հանգամանքները։ Ուսումնասիրեք COVID-19-ի դեպքում հարգելի պատճառների մասին հոդվածը՝ COVID-19-ին առնչվող հանգամանքներին և հատկապես 2020 թ․ մարտի 14-ից հետո կատարված ամրագրումների ընդգրկման սահմանափակումներին ծանոթանալու համար։

    Այս քաղաքականությունը վերաբերում է 2021 թվականի հունվարի 19-ին կամ դրանից առաջ սկսվող ժամանումներին։ Այդ ամսաթվից հետո ժամանումների համար կկիրառվի ստորև ներկայացված թարմացված քաղաքականությունը։

    Ուժի մեջ է մինչև 2021 թվականի հունվարի 19-ը

    Ինչպես է դա աշխատում

    Հնարավոր է, որ կարողանանք վերադարձնել գումարը կամ չգանձենք չեղարկման տույժեր, եթե ստիպված լինեք չեղարկել անսպասելի և անվերահսկելի հանգամանքի պատճառով։ Ստորև ներկայացված է Հարգելի պատճառների կիրառման քաղաքականության մեջ ներառված հանգամանքների ցանկը։ Նախքան չեղարկելը ստուգեք՝ արդյոք ձեր պատճառը ներառված է ներկայացված ցանկում, և արդյոք կարող եք տրամադրել անհրաժեշտ փաստաթղթերը։

    Կարևոր է հիշել, որ առանց տույժերի չեղարկումներ հնարավոր են միայն այն հարգելի պատճառների դեպքում, որոնք առաջացել են նախքան ձեր ժամանման պաշտոնական ամսաթիվը։ Բացի այդ, Հարգելի պատճառների կիրառման քաղաքականությունը չի տարածվում Luxe կամ Luxury Retreats ամրագրումների վրա, որոնք կարգավորվում են առանձին Luxe հյուրերի փոխհատուցման քաղաքականությամբ։

    Հանգամանքներ, որոնց դեպքում անհրաժեշտ է փաստաթղթեր ներկայացնել

    Մահ՝ հյուրընկալողի, հյուրի, համահյուրընկալողի, լրացուցիչ հյուրի, ընտանիքի անմիջական անդամի կամ խնամողի։ Կպահանջվի տրամադրել հետևյալ փաստաթղթերից մեկը՝

    • Մահվան վկայական
    • Մահախոսական
    • Հանգուցյալի անունը նշող լրատվական հոդված
    • Ոստիկանական արձանագրություն

    Անսպասելի ծանր հիվանդություն կամ մարմնական վնասվածք՝ հյուրընկալողի կամ ճանապարհորդողի։ Կպահանջվի տրամադրել բժշկի տեղեկանք առ այն, որ անձը չի կարող հյուրընկալել կամ ճանապարհորդել անսպասելի, ծանր հիվանդության կամ մարմնական վնասվածքի պատճառով։ Բացի այդ, տեղեկանքը պետք է թվագրված լինի ամրագրման ամսաթվից հետո և տրված լինի չեղարկման պահից հետո 14 օրվա ընթացքում։ Հարգելի պատճառների կիրառման քաղաքականությունն առայժմ չի տարածվում մինչ ամրագրման պահը օգտատիրոջը հայտնի առողջական խնդիրների վրա։

    Կառավարության կողմից սահմանված պարտավորություններ, այդ թվում՝ պարտականությունը երդվյալ ատենակալների ժյուրիի կազմում, ճանապարհորդությունների սահմանափակումները, դատարան ներկայանալը և զորակոչումը։ Կպահանջվի տրամադրել ամրագրումից հետո թվագրված պաշտոնական ծանուցման պատճեն՝ ներառյալ պարտականությունը կատարող անձի անունը։

    Airbnb հայտարարության մեջ նշված սեփականությանը հասցված անսպասելի վնաս, պահպանմանը կամ հարմարություններին վերաբերող հարցեր, որոնք վտանգավոր են դարձնում հյուր ընդունելը կամ հյուրերին թույլ չեն տալիս օգտվել այնպիսի հիմնական հարմարություններից, ինչպիսին է հոսող ջուրը։ Սա չի վերաբերում պլանային վերանորոգմանը։ Կպահանջվի տրամադրել հետևյալ բոլոր փաստաթղթերը՝

    • Ապացույց, որ խնդիրը լուծվում է
    • Աշխատանքների ավարտի մոտավոր ժամկետը
    • Կատարվող վերանորոգման հաշիվ-ապրանքագիր
    • Վնասի լուսանկարները

    Տրանսպորտի աշխատանքի խափանումներ, որոնք անհնարին են դարձնում տվյալ ուղղությամբ ճամփորդելը, այդ թվում՝ ճանապարհների փակում, չվերթերի չեղարկում և այլընտրանքային միջոցների բացակայություն։ Սա ներառում է երկրաշարժերի կամ ուժեղ փոթորիկների պես բնական աղետների հետևանքով փակումները և չեղարկումները։ Կպահանջվի տրամադրել ճանապարհի փակման մասին ծանուցագիր կամ ավիաընկերության փաստաթուղթ այն մասին, որ չվերթը չեղարկվել է, ինչպես նաև՝ հիմնավորող փաստաթղթեր, որոնք կհաստատեն ուղևորության անհնարինությունը։

    Գնացքի, ավտոբուսի կամ լաստանավի չեղարկումներ այն դեպքում, երբ նույն օրը չեն եղել այլընտրանքային ռեյսեր։ Կպահանջվի տրամադրել փաստաթուղթ, որը հստակորեն կապացուցի, որ ուղևորափոխադրողը չի աշխատել այդ օրը։ Դա կարող է լինել ընկերության կայքի սքրինշոթ կամ ուղևորափոխադրողի պաշտոնական հայտարարության հղում։

    Հատուկ ստուգում պահանջող հանգամանքներ

    Այս հանգամանքների համար փաստաթղթեր չեն պահանջվում, բայց մեր մասնագիտացված թիմը կուսումնասիրի յուրաքանչյուր դեպք և կորոշի՝ արդյոք ուղղակիորեն տուժել եք։

    Open Homes ամրագրումներ, որոնք չեղարկվել են։ Լրացուցիչ տեղեկություններ Open Homes ծրագրի մասին։

    Բնական աղետներ, ահաբեկչական գործողություններ և քաղաքացիական կամ քաղաքական հուզումներ, որոնք խոչընդոտում են հյուրի ուղևորությանը կամ ոչ անվտանգ են դարձնում հյուրեր ընդունելը։

    Համաճարակ կամ հիվանդություն, որը հանկարծ տարածվում է տարածաշրջանում կամ ազդում է մարդկանց մի ամբողջ խմբի վրա։ Դա չի ներառում որևէ տարածաշրջանի հատուկ հիվանդությունները, օրինակ՝ մալարիան Թաիլանդում կամ մլակային տենդը Հավայան կղզիներում։ Հիվանդության բռնկման կապակցությամբ մեր քաղաքականության և դրա կիրառման շրջանակների ցանկացած փոփոխություն որոշվելու է Առողջապահության համաշխարհային կազմակերպության և տեղական իշխանությունների հայտարարությունների հիման վրա։

      Ճանապարհորդությունների սահմանափակումներ, որոնք դրվել են կառավարության, իրավապահ մարմինների կամ զինված ուժերի կողմից և սահմանափակում են ճանապարհորդությունը դեպի տարածքի կամ փորձառության գտնվելու վայր կամ վերադարձն այդ վայրից։

      Ապահովությանը և անվտանգությանը սպառնացող վտանգների մասին նախազգուշացումներ, որոնք վերաբերում են տարածքի կամ փորձառության գտնվելու վայրին կամ հյուրի մեկնման վայրին։

      Հիմնական կոմունալ ծառայությունների խափանումներ տարածքի կամ փորձառության գտնվելու վայրում։

      Վիզայի կամ անձնագրի վերաբերյալ պահանջների փոփոխություններ, որոնք անհնարին են դարձնում տվյալ ուղղությամբ ճամփորդելը։ Սա չի վերաբերում կորած կամ ժամկետանց ճանապարհորդական փաստաթղթերին։

      Ինչ անել հաջորդը

      Եթե հաստատել եք, որ ձեր հանգամանքը համապատասխանում է վերը նշված պահանջներին, նախ չեղարկեք ձեր տան ամրագրումը կամ Airbnb փորձառությունը։ Եթե ամրագրումը համապատասխանի որևէ ընդունված հարգելի պատճառի կիրառման պայմաններին, դուք կտեղեկացվեք, որ ձեր ամրագրումը բավարարում է առանց տուգանքի չեղարկման պահանջները, և կստանաք գումարի ամբողջական վերադարձ, եթե հյուր եք։

      Եթե ձեր ամրագրումը ավտոմատ կերպով չի բավարարում պահանջները, դարձյալ չեղարկեք ամրագրումը և կապվեք մեզ հետ՝ հայց ներկայացնելու համար։ Մենք ձեզ կբացատրենք հետագա քայլերը, մասնավորապես՝ ինչ փաստաթղթեր է անհրաժեշտ ներկայացնել, և որքան կտևի ձեր հայցի ուսումնասիրումը մեր թիմի կողմից։ Հայցերը պետք է ներկայացնել չեղարկումից հետո 14 օրվա ընթացքում։

      Նշում․ ստորև ներկայացված Հարգելի պատճառների կիրառման քաղաքականությունը վերաբերում է 2021 թվականի հունվարի 20-ին կամ դրանից հետո սկսվող բոլոր ժամանումներին։ 2021 թ. հունվարի 20-ին նախորդող բոլոր ժամանումների դեպքում կշարունակի կիրառվել վերը շարադրված գործող քաղաքականությունը։ Այս քաղաքականության կիրառումը COVID-19-ի նկատմամբ չի փոխվի, երբ նոր քաղաքականությունն ուժի մեջ մտնի 2021 թ. հունվարի 20-ից, և COVID-19-ին առնչվող հանգամանքների մեծ մասն առաջվա պես կբացառվի։

      Հարգելի պատճառների կիրառման քաղաքականություն

      Ուժի մեջ մտնելու ամսաթիվը՝ 2021 թվականի հունվարի 20

      Ընդհանուր տեղեկություններ

      Սույն Հարգելի պատճառների կիրառման քաղաքականությունը բացատրում է, թե ինչպես են կատարվում չեղարկումները, երբ ամրագրումից հետո ծագում են անկանխատեսելի իրադարձություններ, որոնք անվերահսկելի են և անիրագործելի կամ անօրինական են դարձնում ամրագրումն ավարտին հասցնելը։ Այս քաղաքականությունը վերաբերում է և՛ կացարանների, և՛ փորձառությունների ամրագրմանը։

      Երբ քաղաքականությունը թույլ է տալիս չեղարկում, այն վերահսկում է ամրագրման չեղարկման կանոնները և գերակայություն է ստանում դրանց նկատմամբ։ Սույն քաղաքականության մեջ ընդգրկված իրադարձությունից տուժած հյուրերը կարող են չեղարկել իրենց ամրագրումը և, հանգամանքներից կախված, հետ ստանալ գումարը, ստանալ ճամփորդական բոնուս և (կամ) այլ հատուցում։ Սույն քաղաքականության մեջ ընդգրկված իրադարձությունից տուժած հյուրընկալողները կարող են չեղարկել առանց բացասական հետեւանքների, բայց, հանգամանքներից կախված, հնարավոր է, որ չեղարկված ամրագրման ամսաթվերն արգելափակվեն նրանց օրացույցներում։

      Ինչ իրադարձություններ են ընդգրկված

      Այս քաղաքականության մեջ օգտագործվում է «իրադարձություն» տերմինը, որը վերաբերում է այն իրավիճակներին, որոնք առաջանում են ամրագրումից հետո, անկանխատեսելի են ամրագրման պահին և կանխում կամ օրենքով արգելում են ամրագրման ավարտումը։

      Կառավարության կողմից ճանապարհորդությունների նկատմամբ սահմանված պահանջների փոփոխություններ։ Պետական գործակալության կողմից սահմանված վիզային կամ անձնագրային պահանջների անսպասելի փոփոխություններ, որոնք թույլ չեն տալիս ճանապարհորդել դեպի նպատակակետ։ Դա չի ներառում կորած կամ ժամկետանց ճանապարհորդական փաստաթղթերը կամ հյուրի ճանապարհորդելու թույլտվությանն առնչվող այլ անձնական հանգամանքներ։

      Հայտարարված արտակարգ իրավիճակներ և համաճարակներ։ Կառավարության կողմից հայտարարված տեղական կամ համերկրային մասշտաբի արտակարգ իրավիճակներ, համաճարակներ, համավարակներ և առողջապահության ոլորտում արտակարգ իրավիճակներ։ Դա չի ներառում էնդեմիկ կամ սովորաբար որևէ տարածաշրջանի հատուկ հիվանդությունները, օրինակ՝ մալարիան Թաիլանդում կամ մլակային տենդը Հավայան կղզիներում։

      Կառավարության կողմից սահմանված ճամփորդական սահմանափակումներ։ Պետական գործակալության կողմից սահմանված ճամփորդական սահմանափակումներ, որոնք թույլ չեն տալիս կամ արգելում են ճանապարհորդել դեպի տարածքի գտնվելու վայրը, մնալ այդ վայրում կամ վերադառնալ այնտեղից։ Դա չի ներառում ոչ պարտադիր ճամփորդական նախազգուշացումներ և պետական մարմինների նմանատիպ ցուցումներ։

      Զինված ուժերի գործողություններ և այլ թշնամական գործողություններ։ Ռազմական գործողություններ, թշնամական գործողություններ, արշավանքներ, քաղաքացիական պատերազմ, ահաբեկչություն, պայթյուններ, ռմբակոծություններ, ապստամբություններ, զանգվածային անկարգություններ, խռովություններ, քաղաքացիական անկարգություններ և քաղաքացիական հուզումներ։

      Բնական աղետներ։ Բնական աղետներ, տարերային աղետներ, կենսապահովման հիմնական համակարգերի խոշորամասշտաբ խափանումներ, հրաբխային ժայթքումներ, ցունամիներ և եղանակային այլ ծանր և ոչ բնականոն երևույթներ։ Սա չի ներառում եղանակային կամ բնական պայմաններ, որոնք կանխատեսելի լինելու համար բավականաչափ սովորական են այդ վայրում, օրինակ՝ Ֆլորիդայում փոթորիկների սեզոնում տեղի ունեցող փոթորիկները։

      Ինչն ընդգրկված չէ

      Մնացած ամեն ինչ։ Այս քաղաքականությունը թույլ է տալիս միայն վերը նկարագրված իրադարձություններին վերաբերող չեղարկումներ։ Մնացած ամեն ինչ բացառվում է։ Իրավիճակների օրինակները, որոնց համար սույն քաղաքականությունը թույլ չի տալիս չեղարկում կատարել, ներառում են՝ անսպասելի հիվանդություն, վատառողջություն կամ մարմնական վնասվածք․ պետական պարտավորություններ, ինչպիսիք են երդվյալ ատենակալ լինելու քաղաքացիական պարտականությունը, դատարան ներկայանալը կամ զինվորական պարտականությունները․ ճամփորդական նախազգուշացումներ կամ պետական մարմինների այլ ցուցումներ (որոնք չեն նախատեսում ճանապարհորդության արգելք կամ արգելում)․ ամրագրված իրադարձության չեղարկում կամ ժամկետի տեղափոխում․ տրանսպորտի աշխատանքի խափանումներ, որոնք չեն առնչվում քաղաքականության մեջ ընդգրկված իրադարձությանը, օրինակ՝ ճանապարհների փակում, թռիչքի, գնացքի, ավտոբուսի և լաստանավի չվերթերի չեղարկումներ։ Եթե ամրագրում չեղարկեք այս դեպքերում, վերադարձված գումարի չափը կորոշվի ամրագրմանը վերաբերող չեղարկման կանոններով։

      Ինչ անել հետո

      Եթե ձեզ ծանուցենք կամ հրապարակենք տեղեկություններ, որոնք հաստատում են, որ այս քաղաքականությունը կիրառելի է ձեր ամրագրման նկատմամբ, խնդրում ենք հետևել մեր տրամադրած չեղարկման ցուցումներին։ Եթե արդեն ծանուցել ենք ձեզ կամ տեղեկություններ ենք հրապարակել այս քաղաքականության կիրառման կարգի վերաբերյալ, դուք պետք է որ հնարավորություն ունենաք չեղարկելու ազդեցություն կրած ամրագրումը սույն քաղաքականության համաձայն՝ այցելելով ձեր «Ուղևորություններ» էջը։ Եթե կարծում եք, որ այս քաղաքականությունը վերաբերում է ձեր ամրագրմանը, բայց մենք ձեզ չենք ծանուցել կամ իրադարձության վերաբերյալ տեղեկատվություն չենք հրապարակել, խնդրում ենք դիմել մեզ՝ ամրագրումը չեղարկելու համար։ Բոլոր դեպքերում պետք է պատրաստ լինեք տրամադրելու փաստաթղթեր, որոնք ցույց են տալիս, թե ինչպես է իրադարձությունն ազդել ձեզ կամ ձեր ամրագրման վրա։

      Եթե հարցեր ունեք, դիմեք մեզ։

      Այլ նկատառումներ

      Սույն քաղաքականությունը վերաբերում է բոլոր ամրագրումներին, որոնց ժամանման ամսաթիվը համընկնում է ուժի մեջ մտնելու ամսաթվին կամ դրանից հետո է։ Սույն քաղաքականությունը չի տարածվում Luxe ամրագրումների վրա, որոնք կարգավորվում են առանձին Luxe հյուրերի փոխհատուցման քաղաքականությամբ։

      Առնչվող հոդվածներ
      Ստացա՞ք ձեզ անհրաժեշտ օգնությունը։