Խորհուրդներ հատուկ կարիքներ ունեցող հյուրեր ընդունելու վերաբերյալ

Հատուկ կարիքներ ունեցող հյուրերը նախքան ամրագրելը ցանկանում են իմանալ, թե որքանով է տարածքը հարմար իրենց։ Նրանք կարող են Airbnb-ում որոնման արդյունքները զտել ըստ կոնկրետ հարմարությունների (առանց աստիճանների մուտք, կայանատեղ հաշմանդամություն ունեցող անձանց համար և այլն)։

Այն տները, որոնց դեպքում հաստատված է, որ դրանք հարմար են անվասայլակով տեղաշարժվող անձանց համար, առանձնացված են նաև «Հարմարեցված» կատեգորիայում։ Պահանջներին համապատասխանելու համար ձեր տարածքը պետք է ունենա առանց աստիճանների անցուղի դեպի շքամուտք, առնվազն մեկ ննջասենյակ և հավելյալ հարմարություններով լոգասենյակ, որտեղ կան բռնաձողեր, ցնցուղարանի աթոռակ և այլն։

Շատ կարևոր է հստակ և ճշգրիտ տեղեկություններ տրամադրել ձեր տան մասին։ Ահա որոշ խորհուրդներ, թե ինչպես ստեղծել գրավիչ տարածք, որը կարող են վստահորեն ամրագրել հատուկ հարմարությունների կարիքներ ունեցող հյուրերը։

Հարմարությունները, որոնք կօգնեն, որպեսզի ձեր տարածքն աչքի ընկնի, ներառում են՝

• կայանատեղ հաշմանդամություն ունեցող անձանց համար
• հյուրերի շքամուտք տանող լուսավոր անցուղի
• առանց աստիճանների ուղի դեպի հյուրերի շքամուտք
• առանց աստիճանների մուտք դեպի սենյակներ
• առնվազն 81 սմ (32 դյույմ) լայնությամբ շքամուտքեր
• հարթ հատակով ցնցուղարան
• զուգարանի և (կամ) ցնցուղարանի բռնաձողեր
• ցնցուղարանի կամ լոգարանի աթոռ
• առաստաղի կամ շարժական ամբարձիչ
• լողավազանի կամ ջակուզիի ամբարձիչ

Բոլոր հատուկ հարմարությունները ստուգվում են՝ ըստ Airbnb-ի հատուկ հարմարությունների վերաբերյալ ուղեցույցների, նախքան դրանք կհրապարակվեն ձեր հայտարարության մեջ։ Եթե որևէ հարմարություն չի համապատասխանում ուղեցույցներին կամ հստակորեն ցուցադրված չէ լուսանկարում, հնարավոր է, որ ձեզ խնդրենք վերբեռնել ուրիշ լուսանկար կամ հայտարարությունից հեռացնել հարմարությունը։

Յուրաքանչյուր սենյակի մի քանի լուսանկար տրամադրելով՝ հյուրերին կօգնեք որոշել՝ արդյոք ձեր տունը համապատասխանում է իրենց կարիքներին։

• Յուրաքանչյուր նկարի համար գրեք նկարագրական մակագիր։ Օրինակ՝ լոգասենյակի լուսանկարի մակագրում կարելի է ավելացնել մանրամասներ. «Սա տան միակ լոգասենյակն է, որն ունի առանց աստիճանների մուտք։ Զուգարանում և ցնցուղարանում կան ամրացված բռնաձողեր»։

• Լուսանկարեք մի քանի անկյունից։ Օրինակ՝ լոգասենյակի լուսանկարները կարող են ցույց տալ յուրաքանչյուր բռնաձողի տեղը և հատակի լայն, հարթ ուղին, որով կարելի է հասնել զուգարան և ցնցուղարան։

Մանրամասներ հատուկ հարմարություններ լուսանկարելու վերաբերյալ

Կապ հաստատեք հյուրերի հետ, երբ նրանք ձեզ հաղորդագրություն ուղարկեն ձեր տան հատուկ հարմարությունների մասին։ Ընդամենը մի քանի հարց տալն ու հարցերին պատասխանելը կարող է մեծ նշանակություն ունենալ։

Նամակագրություն սկսելու օգտակար օրինակներ․

• Ի՞նչ կոնկրետ հարցեր ունեք տան մասին։
• Ի՞նչ կարող եմ անել ձեր այցն ավելի հարմարավետ դարձնելու համար։

Ձգտեք բավարարել ողջամիտ խնդրանքները, օրինակ՝ ձեր տարածքում տեղաշարժվելը հեշտացնելու վերաբերյալ։ Մտածեք՝ արդյոք փոքր փոփոխությունները կօգնեն, որ հյուրերն իրենց զգան ինչպես տանը։ Ահա մի քանի գաղափար․

• Տեղափոխեք կահույքը, որպեսզի ավելի լայն ուղիներ ստեղծեք սենյակների և տարածքների միջով։
• Կենցաղային իրերը՝ սրբիչները, սպասքը և այլն, դրեք հեշտ հասանելի տեղերում։
• Հեռացրեք հոսանքի վարդակների հասանելիությունը սահմանափակող արգելքները։

Հիշեք, որ ոչ բոլոր տարածքներն են հարմար բոլորի համար՝ անկախ հյուրերի՝ հատուկ կարիքներ ունենալու կամ չունենալու հանգամանքից։ Սակայն, համաձայն մեր Խտրականության դեմ քաղաքականության, դուք չեք կարող ամրագրումը մերժել այն պատճառով, որ որևէ հյուր ունի հաշմանդամություն։ Նաև չեք կարող տնային կենդանու վճար գանձել ուղեկցող կենդանիների համար, որոնք չեն համարվում տնային կենդանիներ։

Ձեր ուղեցույցը հնարավորություն է՝ ցուցադրելու ձեր հյուրընկալությունը և քաղաքը՝ կիսվելով տեղացու խորհուրդներով։ Կարող եք ավելացնել խորհուրդներ ճաշելու, տեսարժան վայրերի և բացօթյա միջոցառումների վերաբերյալ։ 

Ձեր ուղեցույցը ստեղծելիս մտածեք, թե ինչ կարող են փնտրել հատուկ կարիքներ ունեցող ճանապարհորդները։ Օրինակ՝ կարող եք գտնել թեքահարթակներով ռեստորաններ, սալարկված հետիոտնային արահետներ և հատուկ կարիքներով անձանց համար նախատեսված տեսարժան վայրեր։ Կարող եք նաև տրամադրել տեղեկություններ հասարակական տրանսպորտի մասին։

Այս հոդվածում պարունակվող տեղեկությունները կարող են փոխված լինել հրապարակումից հետո։