Ինչպես լուսանկարել հատուկ հարմարությունները

Հյուրերն ուզում են ամրագրելուց առաջ իմանալ, որ կկարողանան անվտանգ և հարմարավետ կերպով տեղաշարժվել տան տարածքում։ Հատուկ հարմարությունների հստակ և մանրամասն լուսանկարներ տրամադրելով՝ հյուրերին կօգնեք որոշել՝ արդյոք ձեր տարածքը համապատասխանում է իրենց հատուկ կարիքներին։

«Ես մեկ նկարով կարող եմ ասել՝ արդյոք տարածքը հարմար է ինձ»,- ասում է Ջորջը՝ անվասայլակով մի հյուր։ «Կամ՝ «Ներեցեք, տղաներ, կարելի՞ է պարզապես տեղափոխել այդ սեղանը»։ Եվ այդ դեպքում ամեն ինչ կարգին կլինի»։

Airbnb-ն ստուգում է հատուկ կարիքներով անձանց համար նախատեսված բոլոր հարմարությունները և լուսանկարները, նախքան դրանք կցուցադրվեն հայտարարության «Հատուկ հարմարություններ» բաժնում, որը պատկերասրահից կամ ֆոտոշրջայցից առանձին է։

Ձեր հայտարարության մեջ հատուկ հարմարություններ ավելացնելու համար հետևեք այս ցուցումներին։ Եթե լուսանկարը չի համապատասխանում որոշակի չափանիշների, հնարավոր է, որ ձեզ խնդրենք վերբեռնել մեկ ուրիշը կամ հայտարարությունից հեռացնել հարմարությունը։

• Տրամադրեք ձեր տան յուրաքանչյուր հատուկ հարմարության առնվազն մեկ լուսանկար։
• Լուսանկարներում ներառեք չափերիզ, որպեսզի ցույց տաք չափերը, օրինակ՝ դռան շրջանակի լայնությունը և սեղանածածկի բարձրությունը։
• Վերբեռնեք յուրաքանչյուր հարմարության մի քանի լուսանկար տարբեր դիտանկյուններից, որպեսզի հյուրերը կարողանան ավելի լավ պատկերացնել սենյակը կամ տարածքը։
• Գրեք նկարագրական մակագրեր, որոնք կօգնեն հստակեցնել սենյակների և տարածքների հատուկ հարմարությունները, օրինակ՝ լուսավորության վերաբերյալ մանրամասները։
• Տեղեկացրեք հյուրերին՝ արդյոք հատուկ հարմարություններ ունեն միայն որոշ տարածքներ։ Օրինակ՝ «Սա տան միակ լոգասենյակն է, որն ունի առանց աստիճանների մուտք, լայն դռնանցք և բռնաձողեր»։

Փորձեք այս խորհուրդները՝ ձեր տան հատուկ հարմարությունները լուսանկարելու համար։

Տան առանց աստիճանների մուտք

Ցույց տվեք, որ տան շքամուտքում կամ դեպի շքամուտք տանող ճանապարհին չկան 5 սանտիմետրից (2 դյույմից) բարձր աստիճաններ, սանդուղքներ կամ եզրաքարեր։ Այդ թվում՝ արտաքին մայթերը, միջանցքները, վերելակները և այլ հարմարություններ, որոնք հյուրերը պետք է օգտագործեն ներս մտնելու համար։

• Բացեք տան շքամուտքի ճանապարհին գտնվող բոլոր դռներն ու դարպասները։ Եթե մուտքն առանց աստիճանների է և ունի շարժական կամ շեմին ամրացված թեքահարթակներ, համոզվեք, որ դրանք երևում են։
• Սկսեք այնտեղից, ուր ժամանելու կամ կայանելու են հյուրերը՝ լուսանկարելով դեպի շքամուտք տանող ուղու յուրաքանչյուր 3 մետրը (10 ֆուտ)։ Տեսախցիկը մի փոքր թեքեք դեպի ներքև՝ երթուղու մակերևույթը լուսանկարելու համար։
• Նկարահանեք շքամուտքի առանձին լուսանկար դրսի կողմից։ Հետ գնացեք առնվազն 2,4 մետր (8 ֆուտ), որպեսզի լուսանկարեք բաց դուռը՝ ցույց տալով ուղին շեմի երկու կողմում։

Առանց աստիճանների մուտք դեպի սենյակ

Ցույց տվեք, թե որ սենյակներն ու տարածքներն են հասանելի առանց աստիճանների, կարանների կամ 5 սանտիմետրից (2 դյույմից) բարձր շեմերի։ Լուսանկարեք ներքին և արտաքին տարածքները՝ ներառյալ տախտակամածները, պատշգամբները և պատիոները։

• Բացեք դուռն ամբողջությամբ, որպեսզի խոշոր պլանով լուսանկարեք շեմը։ Տեսախցիկը մի փոքր թեքեք դեպի հատակը՝ հատակի սալիկի կամ կարանների երկու կողմում ուղին լուսանկարելու համար։
• Հետ գնացեք առնվազն 1,5 մետր (5 ֆուտ), որպեսզի դրսից լուսանկարեք սենյակը։
• Կրկնեք սա և նմանատիպ լուսանկար արեք սենյակի ներսից։
• Եթե սենյակն ունի մի քանի մուտք, լուսանկարեք յուրաքանչյուրը։
• Լրացուցիչ լուսանկարներ արեք՝ դեպի այդ սենյակի գլխավոր դուռը տանող ուղին ցույց տալու համար։

Լայն շքամուտքեր

Ցույց տվեք, թե ձեր տան որ դռներն են առնվազն 81 սմ (32 դյույմ) լայնությամբ։ Շքամուտքի և այլ մուտքերի ճշգրիտ լայնություններն իմանալը հյուրերին օգնում է որոշել, թե արդյոք իրենց անվասայլակը կամ տեղաշարժման համար նախատեսված այլ սարքեր կարող են մուտք գործել տարածք։

• Դուռը բացեք հնարավորինս լայն։ Չափերիզը բացեք ամբողջ շրջանակի լայնքով։ Համոզվեք, որ չափերիզի երկու ծայրը և թվերը հստակ երևում են։
• Նկարահանեք առնվազն երկու լուսանկար․ դրանցից մեկը պետք է ցույց տա դռնանցքը՝ շրջանակի լայնքով դրված չափերիզով, մյուսը՝ վերջնական չափումը խոշոր պլանով, որպեսզի ավելի հեշտ լինի կարդալ այն։

«Եթե դռնանցքի չափերը հայտնի են, ես կիմանամ՝ արդյոք իմ անվասայլակը կանցնի դրա միջով»,- նշում է Ջորջը։

Հարմարեցումներ լոգասենյակում

Ցույց տվեք այն հարմարությունները, որոնք հյուրերին կօգնեն տեղաշարժվել լոգասենյակում՝ ներառյալ առանց աստիճանների ցնցուղարանը, զուգարանի և ցնցուղարանի բռնաձողերը և ցնցուղարանի կամ լոգարանի աթոռը։ Տրամադրեք լուսանկարներ, որոնք ցույց կտան ամբողջ լոգասենյակը և ցնցուղարանը, ինչպես նաև առկա կոնկրետ հարմարությունների տեսքն ավելի մոտիկից։

• Առանց աստիճանների ցնցուղարան. բացեք վարագույրը կամ դռները։ Տեսախցիկը մի փոքր թեքեք դեպի հատակը՝ ցույց տալու, որ 2,5 սանտիմետրից (1 դյույմ) բարձր շեմեր կամ ջրապահներ չկան։
• Բռնաձողեր. հստակորեն ցույց տվեք բռնաձողերի տեղը ցնցուղարանում և զուգարանի մոտ։ Առանձին լուսանկարեք յուրաքանչյուրը, նույնիսկ եթե դրանք նաև միասին եք ցուցադրում լոգասենյակի ավելի լայն կադրերում։
• Ցնցուղարանի կամ լոգարանի աթոռ. ցույց տվեք ցնցուղարանի կամ լոգարանի ներսում գտնվող նստատեղն ամբողջությամբ՝ լինի դա պատին ամրացված, թե առանձին։

Կայանատեղ հաշմանդամություն ունեցող անձանց համար

Ցույց տվեք մեկ տրանսպորտային միջոցի համար նախատեսված ձեր մասնավոր կայանատեղին, որն ունի առնվազն 3,35 մետր (11 ֆուտ) լայնություն կամ հաշմանդամություն ունեցող անձանց համար նախատեսված հանրային կայանատեղ։

• Մասնավոր կայանատեղի. լուսանկարեք հեռվից՝ չափերի համեմատման նպատակով ցույց տալով հյուրի համար նախատեսված տարածքի կողքին կայանված մեքենա։ Կամ օգտագործեք չափերիզ, որպեսզի հաստատեք կայանատեղի լայնությունը։
• Հանրային կայանատեղի. լուսանկարեք ցուցանակներ և փողոցի այլ գծանշումներ, որոնք ցույց են տալիս, որ կայանատեղը նախատեսված է հաշմանդամություն ունեցող անձանց համար։

Լուսավորված անցուղի դեպի հյուրերի շքամուտք

Ցույց տվեք, որ դեպի հյուրերի շքամուտք տանող ուղին կամ մայթը մութ ժամանակ լավ լուսավորված է։

• Միացրեք երթուղին լուսավորող դրսի լույսերի բոլոր աղբյուրները։
• Անջատեք ներսի բոլոր լույսերը, որոնք խանգարում են արտաքին լուսավորությանը։
• Համոզվեք, որ լուսանկարներում երևում է բացօթյա լույսերի տեղադրությունն անցուղու նկատմամբ։

Ամբարձիչներ

Ցույց տվեք տանն առկա բոլոր շարժիչավոր կամ մեխանիկական սարքերը, որոնք հատկապես նախատեսված են անվասայլակ, լողավազան կամ ջակուզի մտնելու և այնտեղից դուրս գալու հարցում հյուրերին օգնելու համար։

• Ամբարձիչը լուսանկարեք հնարավորինս մանրամասնորեն՝ նաև ցույց տալով առաստաղին ամրացված կամ առանձին լինելը։
• Ստացեք ավելի լայն կադր, որում հստակորեն երևում է դրա տեղադրությունը մահճակալի, զուգարանի, լողավազանի կամ ջակուզիի կողքին։
• Լուսանկարեք շրջակայքը՝ ցույց տալու դրա չափը և դիրքը, երբ այն օգտագործվում է։

Իմացեք ավելին հայտարարության մեջ հատուկ հարմարություններ ավելացնելու վերաբերյալ պահանջների մասին։

Այս հոդվածում ներկայացված տեղեկությունները կարող են հրապարակումից հետո փոխված լինել։