Հյուրընկալման առօրյայի բարելավում կարծիքների օգնությամբ

Լավ կարծիքները ցույց են տալիս, թե ինչն են հյուրերը հավանել ձեր տարածքում։ Եվ չնայած բացասական կարծիքը այնքան էլ հաճելի չէ, այն կարող է օգնել ձեզ դառնալ ավելի լավ հյուրընկալող։ Կարող եք օգտվել բոլոր տեսակի կարծիքներից՝ ձեր հյուրընկալման ոճը բարելավելու համար։

«Հետադարձ կապը շատ կարևոր է»,- ասում է Ջուլիետը, որը Քենիայի Նայրոբի քաղաքում Հյուրընկալողների խորհրդի անդամ է։ «Սա գործնական բիզնես է, և կան անակնկալներ։ Կարևոր է պարբերաբար հետևել հայտարարության արձագանքերին, քանի որ կարծիքներն ինչ-որ բան կհուշեն ձեզ»։

Կարծիքները վստահություն են ձևավորում համայնքում և օգնում են խթանել ձեր բիզնեսը։ Ձեր կարծիքներից սովորելու համար․

• Կարդացեք յուրաքանչյուր կարծիք, ինչպես նաև հյուրերի մասնավոր կարծիքները։

• Օգտվեք դրական կարծիքներից՝ ձեր հայտարարությունը խթանելու համար։ Օրինակ, եթե հյուրը գովում է ձեր հագեցած խոհանոցը, ցույց տվեք այն լուսանկարի միջոցով։ Նույնիսկ կարող եք մեջբերել կարծիքը լուսանկարի մակագրում։

• Օգտագործեք բացասական կարծիքները կամ ցանկացած մասնավոր կարծիք կամ հաղորդագրություն որպես առիթ՝ ձեր հարմարությունները բարելավելու կամ տարածքի նկարագիրը թարմացնելու համար։ Կարող եք նաև հրապարակայնորեն պատասխանել՝ ցույց տալու համար, որ կարևորում եք հետադարձ կապը։

Հաջողակ հյուրընկալողները խուսափում են հայտարարության մանրամասները ճոխացնելուց և ջանք չեն խնայում հիանալի հյուրընկալություն առաջարկելու համար։ «Ես միշտ փորձում եմ քիչ խոստանալ և շատ տրամադրել. այդպես հյուրերը կանտեսեն մանր խնդիրները»,- ասում է սուպերտանտեր Մաքսը Ավստրալիայի Բոնգարե քաղաքից։

Հետադարձ կապն այդ կերպ օգտագործելու օրինակ․

• Եթե հյուրը կարծիքի մեջ գրել է փողոցային աղմուկի մասին, նկարագրությունում նշեք, որ նման խնդիր կա։
• Երբ նա ժամանի, առաջարկեք ականջակալներ կամ աղմուկը չեզոքացնող սարք։ Այդ կերպ կգերազանցեք ակնկալիքները։

Եթե նախապես տեղյակ լինեք հնարավոր խնդիրների մասին, ավելի լավ հնարավորություն կունենաք գրավելու հյուրերի, որոնց հարմար է ձեր տարածքը, և խուսափելու բացասական կարծիքներից։

«Հյուրերը գրել էին, որ մեծ բավականություն ստացան այցից, բայց նաև, որ կարելի է որոշ բարելավումներ անել»,- ասում է Քեշավը, որը Հյուրընկալողների խորհրդի անդամ է Հնդկաստանի Նյու Դելի քաղաքում։ «Մենք հաշվի առանք այդ կարծիքը։ Ես ամենալավը սովորում եմ իրական հյուրերի հետ խոսելիս»։

Կապի մեջ մնացեք հյուրերի հետ ժամանումից հետո, որպեսզի նրանք իմանան, որ հարցեր կամ խնդիրներ ունենալու դեպքում դուք հասանելի եք։ Մի քանի խորհուրդ․

• Օգտագործեք պլանավորված հաղորդագրություններ, որպեսզի հյուրերի հետ շփվեք ամրագրման, ժամանման և մեկնման պահերին։

• Առաջին գիշերից հետո հյուրերին հարցրեք, թե ինչպես է ընթանում նրանց այցը, և արդյոք օգնության կարիք ունեն։ Ավելի երկար այցերի դեպքում կապվեք հյուրերի հետ շաբաթը մեկ։

• Եթե հյուրերն ինչ-որ խնդիր են բարձրացնում, անմիջապես լուծեք այն։ Եթե ինչ-որ բան սխալ է ընթանում, հյուրերի մեծ մասը ըմբռնումով կմոտենա, քանի դեռ աշխատում եք արագ լուծել խնդիրը։

«Ես պատասխանում եմ բոլոր կարծիքներին՝ լավ, թե վատ»,- ասում է Մեխիկոյում սուպերտանտեր Օմարը։ «Ձեր ապագա պոտենցիալ հյուրերը կկարդան դրանք»։

Օմարը հավելում է, որ հյուրի դիտողությունը ջրի ջերմաստիճանի մասին իրեն դրդել է լուծել այդ խնդիրը։ Հյուրը վերադարձավ ութ ամիս անց՝ կրկին մնալու համար։ «Կառուցողական կարծիքները միշտ պետք է հաշվի առնվեն»,- ասում է նա։

Եթե ուշադիր կարդաք կարծիքները, կարող եք կատարելագործվել որպես հյուրընկալող։ «Կարող է պատահել բացասական կարծիք, բայց դա աղետ չէ »,- ասում է Իտալիայի Լոմբարդիա քաղաքում հյուրընկալող Ալեսանդրոն։ «Վերլուծեք այս բացասական կարծիքի պատճառը և անհրաժեշտության դեպքում շտկումներ կատարեք»։

Այս հոդվածում պարունակվող տեղեկությունները կարող են փոխված լինել հրապարակումից հետո։