Հեշտացրեք ժամանումը և մեկնումը

Ժամանումը և մեկնումը կարևոր պահեր են, որոնցից էլ մեծամասամբ կախված է հյուրի գնահատականը այցին։ Հյուրերն ակնկալում են հեշտությամբ ներս մտնել, իրենց զգալ ինչպես տանը և հանգիստ մեկնել։

Հյուրերն ուզում են իմանալ, թե ինչպես գտնել ձեր տարածքը և ժամանելիս բացել մուտքի դուռը։ Փնտրեք ժամանման պարզեցման եղանակներ՝

• Կարևոր մանրամասների համար օգտագործեք Ժամանման ուղեցույցը։ Հայտարարությունների խմբագրիչում կարող եք սահմանել կամ ճշգրտել ժամանման եղանակն ու ժամանակը, ուղղությունները, տան ուղեցույցը, Wi-Fi-ի գաղտնաբառը և այլն. բոլորը՝ մեկ տեղում։ Հյուրերն այս տեղեկությունները ստանում են ամրագրումից հետո։

• Ցույց տվեք ներս մտնելու քայլերը։ Ներառեք լուսանկարներ կամ նույնիսկ տեսանյութ, որոնք կօգնեն հյուրերին մուտք գործել։ Օրինակ՝ կարող եք ավելացնել լուսանկար, որը ցույց կտա, թե դարպասի վրա որտեղ է սողնակը, կամ ինչպես բացել մինի սեյֆը։ 

• Նախադիտեք ձեր ուղեցույցը։ Հպեք Դիտել կոճակը, որպեսզի տեսնեք ժամանման մասին տեղեկությունները ճիշտ այնպես, ինչպես տեսնում են հյուրերը։ Ընկերներից մեկին խնդրեք փորձարկել ձեր ցուցումները և կատարել ցանկացած ճշգրտում, որն անհրաժեշտ է պարզ ժամանման համար։

• Թարմացրեք ձեր տարածքը։ Փորձեք ավելացնել լուսավորություն, փակցնել ցուցանակներ կամ տեղադրել մեկ այլ տեսակի կողպեք, օրինակ՝ սմարթ կողպեք կամ թվային կոդ, որը կհեշտացնի ժամանումը ձեզ և ձեր հյուրերի համար։

Հյուրերը կարող են ժամանման վերաբերյալ հարցերով հաղորդագրություն ուղարկել ձեզ։ Պատասխանեք հնարավորինս արագ, հատկապես՝ ժամանմանը նախորդող 24 ժամվա ընթացքում։

Այն, թե ինչպես եք դիմավորում հյուրերին և կանխատեսում նրանց կարիքները, հիանալի հյուրընկալության ցուցանիշ է։ Նույնիսկ ամենափոքր մանրուքներին ուշադրություն դարձնելը կարող է մեծ ազդեցություն ունենալ հյուրերի վրա։

• Պլանավորեք ողջույնի հաղորդագրություն։ Ժամանման օրը հյուրերին տեղեկացրեք, որ դուք հասանելի եք, եթե որևէ բանի կարիք ունենան։

• Հետևեք ներառական հյուրընկալության սկզբունքներին։ Հիշեք, որ հյուրերը կարող են չկիսել ձեր համոզմունքները կամ ավանդույթները։

• Հոգ տարեք հյուրերի մասին։ Հետաքրքրություն դրսևորեք ձեր հյուրերի հանդեպ և առաջնահերթություն տվեք նրանց կարիքներին՝ միևնույն ժամանակ հարգելով նրանց անձնական կյանքի իրավունքը։

Ճապոնիայի Յոմիտան քաղաքում հյուրընկալող Ռիեն, որը Հյուրընկալողների խորհրդի անդամ է և սուպերտանտեր, սիրում է թողնել տեղական օգտակար տեղեկություններով լի ողջույնի նամակ։ «Եթե հյուրը ծնող է, որը ժամանում է իր փոքրիկի հետ, ես տակդիրների լավ խանութ եմ խորհուրդ տալիս»,- ասում է նա։ «Եթե նա շուն ունի, առաջարկում եմ տնային կենդանիների բարձրորակ սնունդ գնելու կետ»։

Մեկնումը ձեր տարածքի հետ կապված վերջին գործողությունն է հյուրերի համար։ Դուք ուզում եք, որ նրանք միայն լավը հիշեն իրենց այցի մասին։

Մեկնման վերաբերյալ հստակ և պարզ ցուցումներ տրամադրելու համար օգտվեք Ժամանման ուղեցույցից։ Մտածեք՝ արդյոք մեկնման առաջադրանքները, օրինակ՝ աղբը հանելը կամ օգտագործված սրբիչները հավաքելը, հինգ աստղի արժանի փորձառություն է հյուրերի համար։ Այս գործերը ձեր մաքրման գործընթացի մաս դարձնելը կարող է նպաստել ավելի լավ կարծիքներ ստանալուն։

Յուրաքանչյուր այցից հետո շնորհակալություն հայտնեք հյուրերին։ Հրավիրեք նրանց վերադառնալ և նշեք, որ գնահատում եք նրանց կարծիքը։ Հարցրեք, թե ինչը կուզենային փոխված կամ ավելացված տեսնել հաջորդ անգամ այցելելիս։

Այս հոդվածում պարունակվող տեղեկությունները կարող են փոխված լինել հրապարակումից հետո։