Ներառական գործելակերպեր, որոնք կօգնեն յուրաքանչյուր հյուրի զգալ ինչպես տանը

Airbnb-ի միջոցով հյուրընկալումը նշանակում է ձեր տարածքը բացել աշխարհի տարբեր երկրներից ժամանող մարդկանց առաջ, իսկ ներառականությունը հյուրընկալման հիմքն է։ 

Հաջողակ հյուրընկալող լինելու համար պետք է հասկանալ, թե ինչպես օգնել տարբեր ծագում ունեցող մարդկանց իրենց հարմարավետ և ապահով զգալ ձեր տանը։ Որպես համայնք՝ մենք պարտավորվում ենք ընդունել ցանկացած ռասայի, դավանանքի, ազգային ծագման, էթնիկ պատկանելության, հաշմանդամության, սեռի, գենդերային ինքնության, սեռական կողմնորոշման և տարիքի յուրաքանչյուր հյուրի՝ հարգանքով և առանց քննադատության կամ կողմնակալության։ 

Ներառական հյուրընկալությունը կարևոր գործոն է հաջողակ հյուրընկալող լինելու համար։ Սա նշանակում է.

• Ընդունել և ողջունել բոլոր հյուրերին՝ անկախ նրանց ծագումից

• Հավասար մոտեցում ցուցաբերել և բավարարել հյուրերի կարիքները 

• Կապ ստեղծել՝ անկախ տարբերություններից և նմանություններից

• Ազատ մտածելակերպ որդեգրել և պատրաստակամ լինել հյուրերին հարցեր տալու, որպեսզի պարզեք այցի ընթացքում նրանց կարիքները

Airbnb-ն հավաքել է հյուրընկալողների, հյուրերի և փորձագետների մտքերը, որպեսզի կարողանաք անկանխակալ գործելակերպերը ընդգրկել ձեր հյուրընկալման առօրյայում և ջերմ հյուրընկալություն ապահովել յուրաքանչյուր հյուրի համար։ Հայտարարությունը կարգավորելուց մինչև կարծիք թողնել․ առաջարկվող այս գործողությունները կարող են նվազեցնել թաքնված կողմնակալությունը և ստեղծել լավ հարաբերություններ։

Տեղեկացնելով, որ ողջունում եք բոլոր տիպի մարդկանց՝ կարող եք օգնել պատմականորեն մարգինալացված համայնքների հյուրերին իրենց հանգիստ զգալ ու ամրագրել ձեր տարածքը։ Հյուրերի հետ խոսելով՝ իմացանք, որ այս համայնքների մարդիկ հայտարարություններում անկանխակալության ազդանշաններ են փնտրում նախքան ամրագրելը։ 

Ահա թե ինչ կարող եք անել՝ ցույց տալու, որ դուք անկանխակալ հյուրընկալող եք.

• Հստակորեն ներկայացրեք ձեր հայտարարության նկարագրության առաջին մի քանի նախադասություններում, որ ողջունում եք ամեն տեսակի ծագման ու մշակույթի մարդկանց (օրինակները՝ ստորև)։ 

• Ճշգրտորեն նկարագրեք ձեր սեփականության հատուկ հարմարությունները և թարմացրեք լուսանկարները։

• Ձեր պրոֆիլում ավելացրեք դերանուններ, որպեսզի հյուրերն իմանան՝ ինչպես դիմել ձեզ։ Դրանով ոչ միայն ցույց կտաք, թե ինչպես եք ցանկանում, որ դիմեն ձեզ, այլև կհասկացնեք, որ ձեզ համար կարևոր է նաև հյուրերի նախասիրությունն այդ հարցում։

• Միացրեք ակնթարթային ամրագրումը, որպեսզի հյուրերն առանց նախնական հաստատման ամրագրեն ձեր տարածքը։ Սա նաև ազդարարում է, որ կարող եք հյուրընկալել բոլոր նրանց, ովքեր համապատասխանում են ամրագրման չափանիշներին։

• Առաջարկեք նախնական հաստատումներ և խրախուսեք այն հյուրերին, որոնք ամրագրելուց առաջ ձեզ հետ կապ կհաստատեն։ Մենք պարզել ենք, որ հյուրերն ամրագրելուց առաջ երբեմն դիմում են հյուրընկալողներին, որպեսզի տեսնեն՝ արդյոք իրենց կընդունեն ու կողջունեն։ 

• Հյուրի ամրագրման հայտը մերժելուց առաջ խորը մտածեք պատճառի շուրջ։ Կկարողանայի՞ք դա դեմառդեմ բացատրել հյուրին։

Կարող եք փորձել հարմարեցնել ներառական ձևակերպումները, որոնք այլ հյուրընկալողներ օգտագործում են իրենց հայտարարություններում։ Մենք խոսել ենք Հյուրընկալողների խորհրդի անդամների հետ, որոնք բերեցին այս օրինակները.

1. Սան Ֆրանցիսկոյից Փիթերը գրում է. «Իմ տունն անվտանգ տարածություն է բոլոր փոքրամասնությունների և մարգինալ խմբերի համար։ Ողջունում եմ բոլոր ռասաների, հավատքների, գենդերների և սեռական կողմնորոշումների հյուրերին»։

2. «Իմ հայտարարության երկրորդ լուսանկարում պատկերված է հուշարձան, որի վրա գրված է՝ You belong»,- ասում է Շինյան Ճապոնիայի Օսակա քաղաքից։ Շինյան ներկայացնում է նաև մեկ այլ լուսանկար, որտեղ ասվում է. «Ես հարգում եմ բազմազանությունը և անկանխակալությունը»՝ այդպես արտահայտելով հյուրընկալողի դիրքորոշումը։ Սա կարող եք գրել նաև մակագրում։

Ձեր տարածքի ամրագրումից հետո ջերմ և ողջունող հաղորդագրություն ուղարկեք հյուրերին։ Առանց որևէ ենթադրության ապրումակցում արտահայտելը մեծ նշանակություն ունի։

• Անհատականացրեք ձեր ողջույնի հաղորդագրությունը՝ օգտվելով հյուրի պրոֆիլի տեղեկություններից։ Այն կարող է ներառել հարցեր նրա հետաքրքրությունների, հայրենի քաղաքի և հոբբիների մասին։

• Ձեր հյուրերի մասին խոսելիս օգտագործեք գենդերային և սեռական կողմնորոշման առումով չեզոք լեզու։ Ավելի լավ է խուսափեք ինչ-որ մեկի գենդերային կամ հարաբերությունների կարգավիճակի մասին ենթադրություններ անելուց։

• Եթե հյուրը հարցնում է հատուկ կարիքներով անձանց հարմարությունների մասին, անպայման պատասխանեք նրա հարցերին և հարցրեք, թե էլ ինչ կարող է պահանջվել։ 

Եթե ոգեշնչման կարիք ունեք, օգտվեք այլ հյուրընկալողների՝ հյուրերին ուղղված հաղորդագրություններից։ Ահա երկու օրինակ՝

1. Իռլանդիայի Ֆալկառա քաղաքից Մայքլն ասում է, որ իր համար կարևոր է հենց սկզբից փոխըմբռնում ապահովելը։ «Ես միշտ շնորհակալություն եմ հայտնում հյուրերին՝ մեր տարածքում մնալու հայտ ներկայացնելու համար»,- ասում է նա։ «Հետո նշում եմ, որ կկապվեմ իրենց հետ այցից առաջ, մաղթում եմ հաճելի օր և [ասում նրանց], որ, եթե այդ ընթացքում որևէ բան պետք լինի իրենց, առանց վարանելու դիմեն ինձ»։

2. Դենվերից Սյուզանը գրում է. «Մեր տունը ձեր տունն է։ Հարմարավետ զգացեք։ Ձերը դարձրեք այս տարածքը։ Եթե կուզենայիք կիսվել որևէ բան բարելավելու գաղափարներով, մեզ տեղյակ պահեք»։

Հյուրերը, հատկապես նրանք, ովքեր պատմականորեն մարգինալացված համայնքներից են, համակարծիք են, որ այս ամենը կարող է օգնել իրենց ավելի սպասված զգալ.

• Հնարավորության դեպքում ապահովեք ինքնուրույն ժամանումը, բայց հարցրեք ձեր հյուրերին, թե արդյոք գերադասում են հյուրընկալողի ներկայությամբ ժամանումը։
• Առանց անհրաժեշտության մի այցելեք հյուրերին։ Փոխարենը՝ հարգեք նրանց անձնական տարածքի իրավունքը և հստակ նշեք, որ հասանելի եք (անձամբ կամ վիրտուալ կերպով), եթե ունենան ձեր կարիքը։

Կարծիքները Airbnb համայնքի վստահության հիմքն են։ Կարծիք թողնելով հյուրի մասին՝ կարող եք ցույց տալ ձեր երախտագիտությունը և ապահովել օգտակար հետադարձ կապ։ 

• Օգտվեք նույն ստանդարտներից, երբ գնահատում եք յուրաքանչյուր հյուրի։ 

• Հնարավորության դեպքում հյուրընկալեք նրանց, ովքեր նորեկ են Airbnb-ում, և կարծիք հայտնեք նրանց այցից հետո։ Կարծիքը հյուրերին շատ կօգնի ապագա ամրագրումներ անելիս։

• Խրախուսեք հյուրերին՝ թողնելու կարծիքներ։ Մենք պարզել ենք, որ պատմականորեն մարգինալացված համայնքների ճանապարհորդները նախքան ամրագրելը հաճախ կարդում են կարծիքները՝ պարզելու, թե արդյոք իրենց նման այլ հյուրեր լավ են զգացել տարածքում։

Անպայման հետևեք այս անկանխակալ գործելակերպերին, հատկապես եթե սկսնակ եք հյուրընկալության ոլորտում։ Հիշեք, որ ցանկացած հյուրի ողջունելիս ամենակարևորը նրան իր կարիքների մասին հարցեր տալն է և շփման հնարավորությունը բաց պահելը։ 

Դուք կարող եք անկանխակալ լինել՝ պարզապես հարցնելով ձեր հյուրերին, թե ինչ է նրանց պետք ձեր տարածքում հարմարավետ և սպասված զգալու համար։ Եվ գուցե դրանով հյուրերի համար հեշտացնեք իրական կյանքում ձեր դուռը բացելը և ձեր տարածքում հիանալի ժամանակ անցկացնելը։