Ինչ է ակնթարթային ամրագրումը

Ակնթարթային ամրագրումը կարող է պարզեցնել ամրագրման գործընթացը և գրավիչ դարձնել ձեր հայտարարությունը։
Հեղինակ՝ Airbnb, ամսաթիվ՝ 14 դեկ, 2020 թ.
3 րոպե ընթերցում
Թարմացվել է՝ 17 նոյ, 2022 թ.

Առանձնահատկություններ

  • Ակնթարթային ամրագրում օգտագործելիս արդիական պահեք ձեր օրացույցը

  • Ընտրեք ակնթարթային ամրագրման ձեր չափանիշները

  • Միացրեք ակնթարթային ամրագրումը

  • Իմացեք ավելին՝ ծանոթանալով հաջողակ հայտարարություն ստեղծելու մեր ամբողջական ուղեցույցին

Ակնթարթային ամրագրումը թույլ է տալիս ազատ ամսաթվերին ակնթարթորեն ամրագրել ձեր տունը, այնպես որ յուրաքանչյուր հայտ անհատապես աչքի անցկացնելու և ընդունելու կարիք չի լինի։ Հյուրերը սիրում են ակնթարթային ամրագրում օգտագործելու տարբերակը, և շատ հյուրընկալողներ հայտնում են, որ այս գործիքի օգնությամբ ավելի մեծ եկամուտ են վաստակում, ինչպես նաև գնահատում են դրա հարմարությունը։

Կանոնավոր կերպով թարմացրեք օրացույցը․ դա կարևոր է ակնթարթային ամրագրման արդյունավետ օգտագործման համար։ Եթե ձեր օրացույցը արդիական չլինի, կարող եք անակնկալ ամրագրումներ ունենալ կամ, ի վերջո, ստիպված լինեք չեղարկել ամրագրումը սխալ պլանավորման պատճառով, ինչը գուցե հանգեցնի չեղարկման վճարի։ Ձեր Airbnb օրացույցը մշտապես արդիական պահելու համար այն համաժամացրեք հիմնական օրացույցի հետ (iCal, Google և այլն)։

Գործիքներ լրացուցիչ վստահության համար

Որոշ հյուրընկալողներ կարող են սկզբում խուսափել ակնթարթային ամրագրման օգտագործումից, քանի որ անհանգստանում են, որ ամրագրումից առաջ շատ տեղեկություններ չեն ունենա հավանական հյուրերի մասին։ Նախքան հյուրերը կկարողանան օգտվել ակնթարթային ամրագրումից, նրանք պետք է համապատասխանեն ձեր բոլոր պահանջներին, որոնք սահմանում եք հյուրերի նկատմամբ, և համաձայնեն ձեր տան կանոններին։

Կարող եք այնպես սահմանել պահանջները, որ ակնթարթային ամրագրում առաջարկվի միայն այն հյուրերին, որոնք ունեն դրական պատմություն (կատարել են առնվազն մեկ այց և չեն ստացել բացասական կարծիքներ), ինչպես նաև նրանց, ովքեր անցել են Airbnb-ի ինքնության հաստատման բազմափուլ գործընթացը։

Մենք ընդլայնել ենք ինքնության հաստատման շրջանակները, որպեսզի ընդգրկենք Airbnb-ի հիմնական 35 երկրներ և տարածաշրջաններ ուղևորվող բոլոր հյուրերի ամրագրումները, ինչը կազմում է բոլոր ամրագրումների 90%-ը։ 2023 թվականի սկզբին այս գործընթացի սփռվածությունը համաշխարհային կդառնա։ Եթե հյուրերից պահանջում եք անձը հաստատող պաշտոնական փաստաթուղթ՝ ելնելով անձնական նկատառումներից, կամ եթե դա պահանջ է այն տարածաշրջանի համար, որտեղ գտնվում է ձեր սեփականությունը, կարող եք այն հայցել հյուրերից՝ ձեր հյուրընկալման փոստի միջոցով հաղորդագրություն ուղարկելով նրանց։

Ինչու հնարավոր է, որ նախկինի պես ամրագրման հայտեր ստանաք

Անգամ եթե ակնթարթային ամրագրումը միացված է, լինում են դեպքեր, երբ կարող եք ամրագրման հայտեր ստանալ հյուրերից։ Դա կարող է տեղի ունենալ, եթե մի որոշ ժամանակ չեք թարմացրել ձեր օրացույցը կամ վերջերս ամրագրում եք չեղարկել։ Հնարավոր է, որ ակնթարթային ամրագրման համար ձեր սահմանած չափանիշներին չհամապատասխանող հյուրերը նույնպես ուղարկեն ամրագրման հայտեր։ Հայտեր ստանալու դեպքում պետք է բոլորին պատասխանեք 24 ժամվա ընթացքում՝ ընդունելով կամ մերժելով ամրագրումը կամ հաղորդագրություն ուղարկելով հավանական հյուրերին։

Ինչու որոշ հյուրընկալողներ չեն օգտագործում ակնթարթային ամրագրումը

Թեև ակնթարթային ամրագրումն առավելություններ ունի, որոշ հյուրընկալողներ կարծում են, որ ամրագրման հայտերն ավելի հարմար են.

  • Նրանք առաջարկում են միայն երկարաժամկետ այցեր։ Էննին հյուրընկալում է Կալիֆոռնիայի Սոնոմա քաղաքում և նախընտրում է ամրագրման հայտեր ստանալ, քանի որ առաջարկում է միայն 30 օր և ավելի տևողությամբ այցեր, որպեսզի բավարարի իր տարածաշրջանում հյուրընկալման կանոնակարգերի պահանջները։ «Ես կցանկանայի օգտագործել ակնթարթային ամրագրումը, բայց որևէ մեկին այդքան երկար հյուրընկալելիս բավական շատ լոգիստիկ հարցեր են առաջանում»,- ասում է նա։
  • Նրանք անձնական հատուկ պահանջներ ունեն։ Նիկոլան հյուրընկալում է Կանադայի Գուելֆ քաղաքում, զգայուն է շրջակա միջավայրի նկատմամբ և ստիպված է իր տարածքը զերծ պահել բույրերից, այդ պատճառով նա ընդունում է ամրագրման հայտեր, որպեսզի համոզված լինի, որ հյուրերը պատրաստ են ընդունելու իր տան առանձնահատուկ կանոնները։ «Բուրումնավետ ապրանքներից ինձ մոտ միգրեն է սկսվում, ուստի պետք է համոզվեմ, որ իմ հյուրերը տեղյակ են բույրերից առաջացող ալերգիաների մասին»,- ասում է նա։
  • Նրանց տարածքը կարևոր առանձնահատկություններ ունի։ Օրինակ՝ տանը կա առանձին սենյակ տնային կենդանիներով կամ առանձին մանկական սենյակ, կամ տարածքը չափազանց գյուղական է, ինչը որոշ հյուրերի համար կարող է դժվարություններ ստեղծել։ Ամրագրման հայտերը լավ միջոց են համոզվելու, որ հյուրերը նախքան այցելելը տեղեկացել են ձեր տան բոլոր առանձնահատկություններին։

Վստահությունը կարևոր է ակնթարթային ամրագրումն օգտագործելու համար

Ակնթարթային ամրագրումից օգտվել, թե ոչ, որոշում եք դուք, բայց հիշեք, որ վստահությունը հիանալի հյուրընկալող լինելու կարևոր բաղադրիչներից է։ Ուշադիր եղեք Airbnb-ի՝ հյուրընկալողի կողմից ամրագրման չեղարկման կանոնների հանդեպ և հնարավորության դեպքում փորձեք խուսափել չեղարկումից։

Այդուհանդերձ, եթե ակնթարթային ամրագրման միջոցով ամրագրում եք ստացել, և այն հարմար չէ ձեզ (օրինակ՝ եթե ապագա հյուրերը հարցնում են՝ արդյոք կարելի է խախտել ձեր տան կանոնները), կարող եք մեկ օրացուցային տարվա մեջ երեք անգամ առանց տույժի չեղարկել ամրագրումը՝ օգտվելով առցանց չեղարկման գործիքից։

Հիշեք, որ երբեք չեք կարող չեղարկել այնպիսի պատճառներով, որոնք խախտում են Airbnb-ի Խտրականության դեմ քաղաքականությունը։ Եթե այնուամենայնիվ չեղարկում եք ամրագրումը, դա նշանակում է, որ ակնթարթային ամրագրումն այս պահին միգուցե լավագույն տարբերակը չէ ձեզ համար, և Airbnb-ն կարող է ամրագրման հայտեր ուղարկել ձեր հաջորդ ամրագրումների համար

։

Այս հոդվածում պարունակվող տեղեկությունները կարող են փոխված լինել հրապարակումից հետո։

Առանձնահատկություններ

  • Ակնթարթային ամրագրում օգտագործելիս արդիական պահեք ձեր օրացույցը

  • Ընտրեք ակնթարթային ամրագրման ձեր չափանիշները

  • Միացրեք ակնթարթային ամրագրումը

  • Իմացեք ավելին՝ ծանոթանալով հաջողակ հայտարարություն ստեղծելու մեր ամբողջական ուղեցույցին
Airbnb
14 դեկ, 2020 թ.
Հոդվածն օգտակա՞ր էր։