Ինչպես պարզեցնել ժամանման գործընթացը
Այցի հաջողված լինելու համար չափազանց կարևոր է, որ հյուրերը կարողանան գտնել ձեր տարածքը և մուտք գործել։ Անկախ այն բանից՝ հյուրերին դիմավորում եք անձամբ, թե առցանց, հստակորեն ներկայացված ցուցումներն առանց խնդիրների ժամանման գրավականն են։
Ինչպես կազմակերպել ժամանումը
Մտածեք ու փորձարկեք ժամանման պարզ և հուսալի ընթացակարգ՝ համոզվելու, որ այն միշտ հարմար է յուրաքանչյուր հյուրի համար։
Ընտրեք հյուրերին ընդունելու տարբերակ։ Շատ հյուրեր գերադասում են ինքնուրույն ժամանման հարմարավետ տարբերակը, երբ տարածք են մտնում սարքերի միջոցով, օրինակ՝ թվային կոդերի և խելացի կողպեքների։
Հայտարարությունների ներդիրում ավելացրեք քայլ առ քայլ ցուցումներ։ Ձեզնից կպահանջվի տրամադրել գործընթացի լուսանկարներ և կարճ ցուցումներ հյուրերի համար։
Մուտքագրեք ճիշտ հասցեն և նշեք գտնվելու վայրը։ Եթե դժվար է գտնել ձեր տարածքը, կամ մոտակայքում հեռախոսակապը չի գործում, խառնաշփոթից խուսափելու համար մանրամասնորեն նկարագրեք, թե ինչպես տեղ հասնել։
Ցուցումներն ուղարկեք ժամանումից երեք օր առաջ։ Համոզվեք, որ հյուրերը ստացել են դրանք, և ճշտեք՝ արդյոք ունեն հարցեր։
Հասանելի եղեք ժամանման պահին։ Դուք կամ համահյուրընկալողը պետք է հասանելի լինեք, որպեսզի կարողանաք անմիջապես լուծում տալ ցանկացած խնդրի։
Կանոնավորապես ստուգեք բոլոր համակարգերի անխափանությունը և ունեցեք պահեստային պլան։ Անկախ այն բանից՝ անձամբ եք դիմավորում հյուրերին, թե տրամադրում եք ինքնուրույն ժամանման տարբերակը, խորհուրդ ենք տալիս պահեստային բանալի ունենալ մինի-սեյֆում։
Հյուրերը կարող են Ժամանման ուղեցույցում և «Ուղևորություններ» ներդիրում ավելացված ցուցումներին ծանոթանալ ժամանումից 48 ժամ առաջ կամ, եթե ունեք չեղարկման ճկուն կանոններ, 24 ժամ առաջ։
Ինչպես ապահովել 5 աստղանի հյուրընկալություն
Ժամանելիս շատ կարևոր է, որ հյուրերն իրենց լավ զգան, երբ մտնում են ձեր տարածք։ Մաքրությունն ու շփումը մեծ նշանակություն ունեն հյուրերին ընդունելիս։
Տարածքը պետք է լինի անթերի մաքուր։ Ստեղծեք մաքրման կանոններ, որոնք վերաբերում են բոլոր մակերևույթների, հատակի և գործվածքների մաքրմանը և (կամ) փոշեզերծմանը, ինչպես նաև բծերի, կեղտի և մազերի հեռացմանը։
Երևացող տեղում ցուցադրեք հիմնական տեղեկությունները։ Ձեր Wi-Fi ցանցի տվյալները և գաղտնաբառը, ինչպես նաև տան ուղեցույցի տպագիր օրինակն ու ուղեցույցը դրեք ակներև վայրում, որպեսզի հյուրերը կարողանան հեշտությամբ ծանոթանալ ձեր ցուցումներին և խորհուրդներին։ Դրանք ներառեք նաև հայտարարության էջում։
Թողեք ողջույնի նվեր։ Հյուրերին ողջունելու բազմաթիվ ստեղծագործական միջոցներ կան։ Օրինակ՝ հասարակ գրությունը կամ տեղական բարիքների հյուրասիրությունը հաճելի տպավորություն կթողնի։
Հայտնեք հյուրերին, որ հասանելի եք։ Կազմեք և ժամանումից հետո ուղարկեք պլանավորված հաղորդագրություն, որով հյուրերին կտեղեկացնեք, որ բոլոր հարցերով կարող են դիմել ձեզ կամ համահյուրընկալողին։
Ժամանման ցուցումները թարմացնելու համար բացեք Հայտարարությունների ներդիրը։
Այս հոդվածում պարունակվող տեղեկությունները կարող են փոխված լինել հրապարակումից հետո։