Ինչպես տարածքը և հյուրերին նախապատրաստել անտառային հրդեհներին դիմակայելուն

Տարվա հրդեհավտանգ եղանակներն անդրադառնում են ամբողջ աշխարհի հյուրընկալողների և հյուրերի կյանքի վրա։ Ավելի քան երբևէ կարևոր է պլաններ ունենալ անտառային հրդեհի դեպքում, որպեսզի պաշտպանեք ձեզ, ձեր հյուրերին և ձեր սեփականությունը։

Airbnb-ում մենք խիստ լրջորեն ենք վերաբերվում ձեր և հյուրերի անվտանգության հարցերին։ Մեր վերջերս գործարկված Վստահության և անվտանգության հարցերով խորհրդատվական կոալիցիայի շրջանակներում մենք համագործակցում ենք Հրշեջ ծառայությունների ղեկավարների միջազգային ասոցիացիայի (IAFC) հետ՝ անտառային հրդեհների դեպքում անվտանգության ապահովման վերաբերյալ տեղեկություններ տրամադրելու համար, որպեսզի կարողանաք ապահովել ձեր սեփականության անվտանգությունը և հյուրերին տրամադրել կարևոր տեղեկություններ, որոնք կարող են օգտակար լինել արտակարգ իրավիճակների դեպքում։

Դուք միշտ կարող եք նախապես պլանավորել ձեր համայնքում անտառային հրդեհների դեպքում։ IAFC-ի «Պատրա՜ստ, ուշադրությո՛ւն, առա՛ջ» ծրագիրն անտառային հրդեհների դեպքում անվտանգության ապահովման վերաբերյալ խորհուրդների հիանալի ռեսուրս է։ Թեև ծրագիրն ԱՄՆ-ում է, խորհուրդները կարող են օգտակար լինել ամբողջ աշխարհի բոլոր մարդկանց համար։

Ահա IAFC-ի առաջարկներից մի քանիսը.

• Ձեր տնից, ավտոտնակից և այլ շինություններից 30 ֆուտ (ինը մետր) հեռավորության սահմաններում հեռացրեք գերաճած բուսականությունը, որպեսզի կարողանաք ստեղծել պաշտպանելի տարածություն։
• Տան հիմքի շուրջ հինգ ֆուտ (մեկուկես մետր) շառավղով օգտագործեք պինդ մակերևույթներ, օրինակ՝ բետոն, ապար կամ սալարկման աղյուս։
• Տան մոտակայքում բուսականություն աճեցնելիս օգտագործեք հրդեհադիմացկուն, ցածրահասակ խոտաբույսեր։
• Հեռացրեք ցածր կախ ընկած ճյուղերը՝ խոտերի, թփերի և բարձր ծառերի միջև առնվազն վեց ֆուտ (երկու մետր) տարածություն ստեղծելու համար։

Հյուրընկալման ընթացքում տեղեկացված լինելու համար կարող եք գրանցվել արտակարգ իրավիճակների վերաբերյալ ծանուցումների համար այն տարածաշրջանում, որտեղ գտնվում է ձեր սեփականությունը։ Տեղեկությունների մեծ մասը հասանելի է ձեր ավանի, քաղաքի կամ նահանգի վարչական մարմնի կայքում։ Այս կերպ դուք կարող եք տեղեկություններ ստանալ իրադարձությունների մասին, նույնիսկ եթե հյուրընկալման ժամանակ մոտակայքում չեք։

Որոշ հյուրեր գուցե ճանապարհորդում են այնպիսի տարածաշրջաններից, որոնք չեն տուժել անտառային հրդեհներից, և հնարավոր է, որ չհասկանան վտանգները։ Ամեն դեպքում, դուք կարող եք օգնել հյուրերին միշտ պատրաստ լինել։

Փորձեք այս խորհուրդները «Պատրա՜ստ, ուշադրությո՛ւն, առա՛ջ» ծրագրից:

• Տան կանոններում ավելացրեք հիմնական տեղեկություններ ձեր տարածաշրջանում անտառային հրդեհների հետևանքների մասին, որպեսզի հյուրերը նախքան ամրագրելը տեղյակ լինեն, որ կարող են լինել անտառային հրդեհներ։
• Արտակարգ իրավիճակների տեղական կոնտակտների ցուցակը ցուցադրեք որևէ տեսանելի վայրում, օրինակ՝ սառնարանի կամ սուրճի սեղանի վրա։
• Տրամադրեք թաղամասի կամ տեղանքի ընդունված անվանումը (օրինակ՝ Կալիֆոռնիայի Կալաբասաս քաղաքի Մալվուդ համայնք)։ Կարող եք սա ավելացնել ձեր տան կանոններում ու նաև ներառել արտակարգ իրավիճակների ծառայությունների կոնտակտային տվյալների ցանկում։
• Հյուրերին տվեք տեղանքի քարտեզը, որտեղ հստակորեն նշված են ձեր սեփականության հասցեն, մոտակա ճանապարհների անվանումները, տարհանման բազմակի ուղիները և հյուրերի ապաստանի համար հնարավոր անվտանգ վայրերը։
• Հյուրերին խրախուսեք գրանցվել արտակարգ իրավիճակների տեղական ծառայությունների ծանուցումների համար և մշտապես հետևեք հրդեհների մասին լուրերին, նույնիսկ եթե անտառային հրդեհը մոտ չէ ձեր սեփականությանը։
• Տեղեկացրեք հյուրերին, որ հեռանալու համար պարտադիր չէ սպասել տարհանման հրամանի՝ առավել ևս, որ կարող է լրացուցիչ ժամանակ պահանջվել կողմնորոշվելու համար, եթե տեղանքն անծանոթ է նրանց։

Անտառային հրդեհներին պատրաստվելու վերաբերյալ լրացուցիչ տեղեկություններ ստանալու համար կարող եք դիմել տեղական հրշեջ վարչություն։ Եթե գտնվում եք ԱՄՆ-ում, կարող եք նաև ծանոթանալ «Պատրա՜ստ, ուշադրությո՛ւն, առա՛ջ» ծրագրին՝ անտառային հրդեհների մասին ավելի լավ պատկերացում կազմելու և գործողությունների պլան ստեղծելու համար։