Որակյալ փորձառության 3 չափանիշները

Պատրա՞ստ եք կապ հաստատելու ճանապարհորդների և տեղացիների համայնքի հետ, որը ցանկանում է լրացուցիչ տեղեկություններ ստանալ ձեր աշխարհի մասին։ Առաջին քայլ. ծանոթացեք Airbnb-ի որակի ստանդարտներին և պահանջներին, որոնք պետք է բավարարեն բոլոր հյուրընկալողները, որպեսզի իրենց փորձառությունների հայտերը հրապարակվեն։ Այժմ, երբ տիրապետում եք հիմնական գիտելիքներին, եկեք ուսումնասիրենք Airbnb-ի՝ բարձրորակ փորձառություն ապահովելու համար անհրաժեշտ 3 չափանիշները և հասկանանք, թե ինչպես կարող եք փորձառության հայտում ցուցադրել ձեր յուրօրինակ ուժեղ կողմերը։

Փորձառություն հյուրընկալողները ճանապարհորդներին տանում են դեպի իրենց աշխարհներ՝ օգնելով նրանց տեղացի զգալ, նույնիսկ եթե դա ընդամենը մի քանի ժամ է տևում։ Որակի 3 չափանիշները, որոնք պետք է պարունակի փորձառության հայտը, հետևյալն են՝ գործիմացություն, արտոնյալ մուտք և կապ։ Այս չափանիշներն առանձնացնում են փորձառությունները սովորական շրջայցերից և ապահովում են շուկայում բանիմաց ու ջերմ հյուրընկալողների կողմից բարձրորակ փորձառությունների առկայությունը։

Մինչ ավելին եք կարդում այս չափանիշների մասին և մտորում ձեր փորձառության գաղափարի շուրջ, ահա մի քանի բան, որ հարկավոր է հիշել.

• Հաշվի առեք ոչ միայն ձեր թեմատիկ գործիմացությունը, այլև այն ուրույն տեսանկյունը, որը կարող եք ներմուծել այս թեմայում կամ գործողություններում։
• Ազատություն տվեք ձեր երևակայությանը։ Փորձառությունները պետք է ներկայացնեն մի բան, որը հյուրերը հեշտությամբ չէին կարողանա ինքնուրույն անել։ Փորձեք առանձնացնել ձեր փորձառությունը ընդհանուր զբոսաշրջային միջոցառումներից։
• Լավագույն փորձառությունները մարդկային կապեր են ստեղծում։ Ինչպե՞ս եք հասնելու այն բանին, որ հյուրերն իրենց հարմարավետ զգան։

Զբաղվո՞ւմ եք որևէ արհեստով կամ գործունեությամբ։ Սիրո՞ւմ եք ձեր համայնքը։ Ձեր փորձառության գաղափարի շուրջ մտորելիս և հայտը հաստատման ներկայացնելիս սա լավ մեկնակետ է։ Բացի իր գործը սիրելուց՝ փորձառու հյուրընկալողը պետք է նշի, թե ինչ եզակի գործիմացություն, որակավորում կամ տեսակետ ունի իր գործունեության հիմնական թեմայի վերաբերյալ։ Այս ամենն անպայման նշեք փորձառության հայտում։

Ահա երեք օրինակ, թե ինչպես կարող եք բացատրել ձեր գործիմացությունը որևէ թեմայի վերաբերյալ՝ հաջողության տարբեր մակարդակներով.

Մի ասեք.«Ես սիրում եմ գեղագրությունը»։ Այս հայտարարությունն այնքան էլ չի բացատրում, թե ինչպես կամ ինչու եք այդ արհեստի մասնագետ։

Լավ տարբերակ. «Հինգ տարի սովորել եմ գեղագրություն և վերջերս սկսել եմ սովորեցնել ընկերներիս»։ Այս հայտարարությունը որոշ օգտակար տեղեկություններ է տալիս այն մասին, թե ինչն է ձեզ պահանջներին համապատասխանող մարդ դարձնում այս փորձառությունն անցկացնելու համար։

Հրաշալի տարբերակ. «Ես գեղագրություն եմ դասավանդում Սան Ֆրանցիսկոյի Ասիական արվեստների կենտրոնում։ Վերջերս Գեղագրության միջազգային գիտաժողովում ելույթ ունեցա «Գեղագրությունը թվային դարաշրջանում» թեմայով»։ Այս պնդումը հիանալի է ձեր թեմայում նշանակալի գործիմացություն ցուցադրելու համար։

Էլեոնորան և Աշրեֆը՝ Խոհարարություն և արվեստ փորձառության հյուրընկալողները, այնպես են լրացրել Ձեր մասին բաժինը, որ հիանալիորեն ընդգծել են իրենց գործիմացությունը.

Օրինակ 1․ Էլեոնորան ավելի քան 15 տարվա միջազգային փորձ ունեցող խոհարար է։ Նա Italia7 ալիքում հեռուստատեսային խոհարար է և սիրում է իր գիտելիքներով կիսվել ուրիշների հետ։ Նա հաճույքով գնացել է տատիկի և մոր հետքերով, բայց շարունակում է թարմացնել իր գիտելիքները և, բացի հրուշակեղենի, գինու և սննդի խոհարարի մասնագիտացումից, մասնագիտացած է նաև որպես պիցցայի վարպետ (պիցցայոլո)։ Նրա առաջին խոհարարական գիրքը լույս է տեսել 2018 թվականին։

Մեխիկոյում Բնական ներկեր՝ հնագույն տեխնիկաներով փորձառության հյուրընկալող Անաբելը նույնպես գերազանց է նկարագրել իր գործիմացությունը.

Օրինակ 2. Ես մեքսիկական տեքստիլի սիրահար եմ, Բարսելոնայում ուսումնասիրել եմ նորաձևության դիզայն և մանրաթելային արվեստ։ Մի քանի տարի առաջ վերադարձա Մեքսիկա և սկսեցի սովորել բնական ներկանյութեր ստանալ Օախակայում, որտեղ էլ սիրահարվեցի անտիկ տեքստիլի վառ երանգներին։ Այդ ժամանակից ի վեր մշակել եմ մի շարք նախագծեր, այդ թվում՝ ձեռագործ ուսապարկերի ապրանքանիշ՝ օգտագործելով որոշ նյութեր և մեթոդներ, որոնք կուսումնասիրենք այս վարպետաց դասի ընթացքում։

Պարտադի՞ր է վարպետ լինել փորձառություն հյուրընկալելու համար։ Ո՛չ։ Պարզապես ընդգծեք, թե ինչ եզակի գործիմացություն ունեք, որը պետք կգա փորձառության շրջանակներում։

Փորձառությունները պետք է տարբերվեն սովորական զբոսաշրջային միջոցառումներից, և հյուրերը պետք է կարողանան ակտիվորեն շփվել հյուրընկալողի համայնքի կամ մշակույթի հետ։ Հրաշալի փորձառությունները բացահայտում են այնպիսի վայրեր կամ գործողություններ, որոնք սովորական ճանապարհորդը, ամենայն հավանականությամբ, ինքնուրույն չէր գտնի։

Մեծացրեք ձեր փորձառության՝ Airbnb-ում հրապարակվելու հավանականությունը՝ առաջարկելով սովորական այցելուի համար եզակի կամ այլապես անհասանելի մի բան։ Փորձառությունը ներկայացնելիս անպայման ընդգծեք, թե ինչով են առանձնահատուկ այն վայրերը, որոնք այցելելու եք ձեր հյուրերի հետ։

• Պատմեք հատուկ վայրի մասին, օրինակ՝ միայն տեղացիների հաճախած պանդոկի կամ թաղամասի թաքնված այգու։  
• Հյուրերին ծանոթացրեք մարդկանց հետ, համայնքներին կամ միջոցառումներին, որոնք այլապես հասանելի չէին լինի։
• Առաջարկեք սովորական կամ տարածված զբոսաշրջային միջոցառման վերաբերյալ յուրահատուկ հայացք կամ տեսանկյուն։

Ամեն ինչ մեղրատու մեղուների մասին փորձառության հյուրընկալող Մարվինը հյուրերին ուղեկցում է իր սեփական հետնաբակը և տեղական համայնքային այգիներ, որտեղ հյուրերը կարող են հետևել Լոս Անջելեսի փեթակներում ապրող մեղուների կյանքին։ 

Հայտում անպայման ընդգծեք ձեր կապը այս վայրերի կամ համայնքների հետ։ Հարցրեք ինքներդ ձեզ. ինչո՞վ են դրանք առանձնահատուկ ձեզ համար և ինչո՞ւ կհետաքրքրեն նաև ձեր հյուրերին։ Կիսվեք այս վայրերի հետ կապված անմոռանալի հիշողությամբ։

Փորձառությունների հիանալի հյուրընկալողը ջանում է մասնակիցների միջև շփում ապահովել։ Նա ջանք չի խնայում, որպեսզի հյուրերն իրենց ընդունված և սիրված զգան։ Նա ջերմ է և ուշադիր, իր հյուրերի հետ շփման պահեր է ապահովում և անում այնպես, որ նրանք իրենց գնահատված զգան։ Եթե հյուրընկալողը լավ կապ է ստեղծում, հյուրերը հաճախ ժամանում են որպես անծանոթներ և հեռանում որպես ընկերներ։

Ձեր փորձառությունը ներկայացնելիս ընդգծեք, թե ինչպես եք հաշվի առնելու մանրամասները և անելու այնպես, որ հյուրերն իրենց զգան ապահով, ներգրավված և շփվեն փորձառության ընթացքում։ Կարելի է առաջարկել ինչ-որ աննշան բան, օրինակ՝ արևապաշտպան քսուք արևոտ օրը, կամ ստեղծել ներառական միջավայր ապահովող տարածք, որտեղ ձեր հյուրերի համար հեշտ կլինի կապ հաստատելը։

Ահա որոշ հարցեր, որոնք կարող եք տալ ինքներդ ձեզ, մինչ զարգացնում եք ձեր փորձառության գաղափարը.

• Ինչպե՞ս եք հոգալու հյուրերի կարիքները՝ սննդակարգը, հատուկ կարիքներով անձանց համար հարմարությունները, անվտանգությանն առնչվող մտահոգությունները և այլն։
• Ի՞նչ կանեք, եթե լինեն անկանխատեսելի հանգամանքներ, օրինակ՝ եղանակի փոփոխություն։
• Ինչպե՞ս եք օգնելու հյուրերին կապ հաստատել և շփվել միմյանց հետ ձեր փորձառության ընթացքում։
• Ինչպե՞ս եք հաշվի առնելու տարբեր մշակույթներից սերող հյուրերի լայն սպեկտրի հարմարավետության մակարդակները։

Հիշեք, որ բոլոր փորձառությունները պետք է համապատասխանեն որակի այս ստանդարտներին, որպեսզի հայտնվեն Airbnb հարթակում։ Կարևոր է, թե ինչպես եք հայտնում այս հատկություններից յուրաքանչյուրի մասին ձեր փորձառության էջում։ Ընդգծեք ձեր եզակի գործիմացությունը, արտոնյալ մուտքի հնարավորությունը և կապը այս բաժիններում՝

Ձեր մասին։ Չմոռանաք պատմել, թե ինչու եք դուք լավագույն թեկնածուն այս փորձառությունը վարելու գործում, ինչպես է ձեր գործիմացությունը կապված փորձառության հետ, և ինչն է ձեզ դարձնում ուշադիր հյուրընկալող։

Ինչ եք անելու և Որտեղ եք լինելու։ Մանրամասն նկարագրեք այն վայրերը կամ համայնքները, որտեղ միասին գնալու եք։ Կանխատեսեք հյուրերին հուզող հարցերը և նախօրոք պատրաստեք պատասխանները։

Ինչ եմ տրամադրելու։ Նշեք որևէ հատուկ բան, որը կներառեք փորձառության մեջ՝ սկսած խմիչքներից և նախուտեստներից մինչև տոմսեր, որոնք հյուրերին հնարավորություն են տալիս որևէ միջոցառման մասնակցելու։