Վերջին ամիսներն աղետալի էին բոլորիս համար: Ձեզնից շատերի նման ես նույնպես ամեն օր արթնանում եմ՝ մեկուսացած ընկերներից ու կոլեգաներից, չիմանալով, թե ինչ է սպասում աշխարհին այսօր: Ամեն օր լուրերը դիտելիս ցավ եմ ապրում այն երկրների, համայնքների և ընտանիքներ համար, որոնք մեծ կորուստներ են կրել այս ճգնաժամից:

Այս ամենի հետ մեկտեղ կանգ է առել զբոսաշրջության ոլորտը: Ինքնաթիռները չեն թռչում, սահմանները փակ են: Մեզնից շատերը, այդ թվում՝ մեր հյուրերը, հետևելով կառավարությունների հորդորին, ինքնամեկուսացվել են։ Ճանապարհորդելը գրեթե անհնար է:

Մարտի 11-ին, երբ Առողջապահության համաշխարհային կազմակերությունը հայտարարեց համավարակի մասին, բոլորս երկընտրանքի առաջ կանգնեցինք: Եթե մենք թույլ տայինք հյուրերին չեղարկել ամրագրումները և հետ ստանալ գումարը, դա, անշուշտ, էապես կանդրադառնար ձեր ֆինանսական վիճակի վրա: Սակայն մենք նաև չենք կարող թույլ տալ, որ հյուրերը և հյուրընկալողները ստիպված լինեն վտանգել իրենց և շրջապատի մարդկանց առողջությունը: Մենք որոշեցինք, որ պետք է թույլ տանք, որ հյուրերը չեղարկեն ամրագրումները և ամբողջությամբ հետ ստանան գումարը, այդ թվում՝ մեր բոլոր վճարները: Այս որոշումը թելադրված էր ոչ թե մեր շահով, այլ հանրային առողջության մասին մտահոգությամբ:

Համոզված եմ, որ ճիշտ ենք վարվել՝ կարևորելով մարդկանց առողջությունն ու անվտանգությունը, սակայն հայցում եմ ձեր ներողամտությունը, որ մեր որոշման մասին հյուրերին տեղեկացրել ենք առանց ձեզ հետ խորհրդակցելու: Մենք ստացել ենք ձեր արձագանքն այդ մասին և ընդունում ենք մեր սխալը:

Հուսով ենք, որ ի հեճուկս այդ ամենի, մեր գործընկերությունը կշարունակվի: Ձեր կրած վնասները անդրադառնում են նաև մեր բիզնեսի վրա: Մենք գիտենք, որ ձեզնից շատերն այս պահին դժվար իրավիճակում են և սպասում են կոնկրետ օգնության, այլ ոչ թե խոստումների:

Այդ նպատակով մենք նախաձեռնում ենք մի շարք քայլեր:

Մենք 250 միլիոն ԱՄՆ դոլար կվճարենք հյուրընկալողներին՝ COVID-19-ի հետևանքով չեղարկումների վնասները փոխհատուցելու համար: Եթե COVID-19-ի հետևանքով չեղարկվել է այցը, որը նախատեսված էր մարտի 14-ից 31-ը ընկած ժամանակահատվածում, մենք կվճարենք այն գումարի 25%-ը, որը սովորական իրավիճակում ստանալու էիք ձեր չեղարկման կանոնների համաձայն: Սա կկիրառվի նշված ժամանակահատվածում COVID-19-ի հետ կապված բոլոր չեղարկումների նկատմամբ: Այդ ծախսն ամբողջությամբ կհոգա Airbnb-ն: Վճարումները կսկսվեն ապրիլին: Մինչև մարտի 14-ը ներառյալ ամրագրում կատարած հյուրերը կարող են չեղարկել այն և հետ ստանալ գումարը կամ իրենց վճարած գումարի 100%-ին համարժեք ճամփորդական բոնուս: Մանրամասն տեղեկությունների համար այցելեք airbnb.com/250Msupport:

Մենք ստեղծում ենք Սուպերտանտերերի աջակցության հիմանդրամ՝ 10 միլիոն ԱՄՆ դոլար գումարով: Այս աջակցությունը նախատեսված է այն սուպերտանտերերի համար, որոնք հյուրընկալում են իրենց սեփական բնակարաններում և տան վարձը կամ հիփոթեքային վարկը վճարելու համար օգնության կարիք ունեն, ինչպես նաև փորձառություններ կազմակերպող մեր այն ակտիվ գործընկերների, որոնք այժմ ֆինանսական դժվարությունների առջև են կանգնած: Այս հիմնադրամը ստեղծել են մեր աշխատակիցները՝ հավաքելով 1 միլիոն ԱՄՆ դոլար, իսկ մնացած 9 միլիոն ԱՄՆ դոլարը նվիրաբերել ենք մենք՝ Ջոն, Նեյթը և ես: Սկսած ապրիլ ամսից՝ հյուրընկալողները կարող են դիմել մինչև 5 000 ԱՄՆ դոլարի անհատույց դրամական օգնություն ստանալու համար։ Մանրամասն տեղեկությունների համար այցելեք airbnb.com/superhostrelief:

Մեր միջոցով ձեր նախկին հյուրերը հեշտությամբ կկարողանան դրամական օգնություն ուղարկել անմիջապես ձեզ: Airbnb-ի հյուրընկալողների ճկունությունից անչափ շնորհակալ բազմաթիվ հյուրեր մեզ տեղեկացրել են, որ ցանկանում են ֆինանսապես օգնել ձեզ: Շուտով հյուրերը կկարողանան դրամական օգնության հետ մեկտեղ նաև աջակցության խոսքեր ուղարկել այն տանտերերին, որոնք իրենց հյուրընկալել են։ Կարծում ենք, որ սա հնարավոր կլինի արդեն ապրիլից: Նույնիսկ ամենափոքր օգնությունը մեծ նշանակություն ունի այս դժվարին ժամանակահատվածում:

Մենք համագործակցել ենք ԱՄՆ կառավարության հետ, որպեսզի կառավարության կողմից COVID-19-ի դեմ պայքարի խթանման վերջերս ընդունված օրինագծով աջակցություն տրամադրվի հյուրընկալողներին: Այս օրենքը ԱՄՆ-ի հյուրընկալողներին թույլ է տալիս օգտվել աջակցության տարբեր ծրագրերից՝ փոքր ձեռնարկություններին տրամադրվող դրամաշնորհներից և վարկերից, ինչպես նաև գործազրկության նպաստներից: Անչափ շնորհակալ ենք ձեր կողմից Կոնգրեսի անդամներին ուղղված ավելի քան 105 000 զանգերի ու էլեկտրոնային նամակների համար:

Մենք աշխատում ենք նաև այլ նախաձեռնությունների ուղղությամբ, որոնց մասին մանրամասն կտեղեկացնենք գալիք շաբաթների ընթացքում: Այդ նախաձեռնությունները ներառում են ակտիվ համագործակցությունը մասնագետների ու համաճարակաբանների հետ մաքրության ստանդարտների մշակման գործում, ճանապարհորդությունների ապահովագրումը ձեզ և հյուրերի համար, ինչպես նաև ձեր բիզնեսի վերականգման համար համապատասխան աջակցության ծրագրերը:

Մենք կանենք ամեն ինչ՝ վերականգնելու մեր արդյունավետ համագործակցությունը: Աշխատելով միասին՝ մենք կհաղթահարենք բոլոր դժվարությունները: Ես նման օրինակի ականատեսը եղա վերջերս, երբ համատեղ ուժերով կացարաններ էինք առաջարկում առաջնագծում պայքարող բուժաշխատողներին: Միասին մենք օգնում ենք ավելի քան 100 000 բուժաշխատողների և արագ արձագանքման ծառայությունների աշխատակիցների՝ տրամադրելով նրանց բնակարաններ անվճար կամ զգալի զեղչերով: Ավելի քան 40 000 հյուրընկալող արդեն օգնության ձեռք է մեկնել: Այցելեք airbnb.com/covid19relief՝ նրանց միանալու համար:

Ձեր վստահությունը հարատև գործընկերության հիմքն է: Գիտենք, որ շատ աշխատանք ունենք անելու ձեր վստահությունը ամրապնդելու համար և դա մեր առաջնահերթ նպատակն է: Ճգնաժամն ի վերջո կավարտվի, ճամփորդությունները կվերսկսվեն, և մենք կրկին կողջունենք միլիոնավոր հյուրերի: