Ինչպես դառնալ սուպերտանտեր

Airbnb-ի «Սուպերտանտեր» ծրագիրն ամենաբարձր վարկանիշ ունեցող և ամենափորձառու հյուրընկալողների հանդեպ մեր երախտագիտության արտահայտությունն է։

Մենք նշում և պարգևատրում ենք բացառիկ հյուրընկալությունը՝ հայտարարության մեջ ավելացնելով նշանակ, որը կարող է գրավել ավելի շատ ամրագրումներ։ Հյուրերի մոտ 59%-ի կարծիքով՝ սուպերտանտիրոջ կարգավիճակը մեծացնում է վստահությունը տարածքի որակի առումով։ Սուպերտանտերերը 60%-ով ավելի շատ եկամուտ են վաստակում, քան այն հյուրընկալողները, որոնք չունեն այդ կարգավիճակը։* Սուպերտանտերերը նաև օգտվում են համայնքի աջակցման հատուկ թիմի ծառայություններից, հատուկ միջոցառումների մասնակցելու հրավերներից, ճամփորդական շահակտրոններից և որոնման արդյունքներում հայտնվելու ցուցանիշների աճից։

1,3 միլիոնից ավելի հյուրընկալողներ դարձել են սուպերտանտերեր, և դուք նույնպես կարող եք՝ առավելագույնի հասցնելով ձեր ամրագրումները և մատուցելով գերազանց հյուրընկալություն։** Օրացույցում մի քանի շտկումները, հայտարարության թարմացումը և հյուրերի հետ շփվելիս լրացուցիչ հոգատարությունը կարող են վճռորոշ նշանակություն ունենալ։

Սուպերտանտերը պետք է լինի հայտարարության տերը, ունենա լավ վարկանիշ և վերջին 365 օրվա ընթացքում բավարարի այս չորս չափանիշները․

• Ունենալ բավականաչափ ամրագրումներ։ Հյուրընկալեք առնվազն 10 ամրագրում կամ առնվազն 100 գիշեր ընդհանուր տևողությամբ երեք այց։
• Խուսափել չեղարկումներից։ Չեղարկման հաճախականությունը պահեք 1%-ից պակաս՝ բացառությամբ այն չեղարկումների, որոնք կատարվել են խոշոր կործանարար իրադարձությունների կամ այլ հիմնավոր պատճառներով։
• Պատասխանել հյուրերին։ Պահպանեք պատասխանների 90% կամ ավելի բարձր հաճախականություն։ Պատասխանների հաճախականությունը 24 ժամվա ընթացքում հյուրերի նոր հարցումներին ձեր պատասխանների տոկոսն է։
• Առաջնահերթություն տալ հյուրընկալությանը։ Պահպանեք ընդհանուր գնահատականի 4,8 կամ ավելի բարձր ցուցանիշը։

Հստակորեն և արագ պատասխանելը, չեղարկումներից խուսափելը և հյուրընկալությունն առաջնահերթ դարձնելը նաև կօգնեն ձեր տունն առանձնացնել որոնման արդյունքներում և ավելացնել եկամուտը։

Ահա խորհուրդներ, որոնք կօգնեն բավարարել այս չափանիշները և սկսել օգուտներ ստանալ սուպերտանտիրոջ կարգավիճակից։

Օրացույցում ավելի շատ գիշերներ բացելը կնպաստի, որպեսզի ձեր հայտարարությունը հայտնվի որոնման ավելի շատ արդյունքներում, և կմեծացնի սուպերտանտիրոջ չափանիշներին համապատասխանելու համար պահանջվող բավականաչափ այցեր հյուրընկալելու հնարավորությունները։

Բացեք հայտարարության օրացույցը և փնտրեք արգելափակված գիշերները, որոնք նշված են մոխրագույնով։ Բացեք բոլոր արգելափակված գիշերները, որոնց ընթացքում կարող եք հյուրընկալել։

Կարճաժամկետ այցեր թույլատրելը մեկ այլ միջոց է, որով ձեր հայտարարությունը կարող է ավելի հաճախ հայտնվել որոնման արդյունքներում։ Կարող եք ուղևորության նվազագույն տևողությունը հարմարեցնել ըստ շաբաթվա օրերի։ Օրինակ, եթե հանգստյան օրերին պահանջարկն ավելի բարձր է, կարող եք մեկ գիշեր տևողությամբ այցեր թույլատրել շաբաթվա մեջտեղում, բայց չթույլատրել ամրագրումներ ուրբաթ կամ շաբաթ օրվա համար։

Առաջարկեք ավելի մեծ ճկունություն և հյուրերին թույլատրեք ամրագրել ժամանմանը մոտ, ինչը նույնպես կօգնի ստանալ ավելի շատ ամրագրումներ։ Ընտրեք նվազագույն ժամանակահատված՝ ընդհուպ մինչև նույն օրը՝ նայած, թե որքան ժամանակ է անհրաժեշտ ամրագրման հաստատման և հյուրի ժամանման միջև։

Կարող եք նաև թույլատրել ժամանումից առաջ ձեր սահմանած նվազագույն ժամկետից ավելի շուտ ծանուցմամբ հայտեր։ Ձեզ կառաջարկվի ուսումնասիրել և հաստատել այդ հայտերը։

Այն տարածքների հայտարարությունները, որոնց գներն ավելի ցածր են, քան մոտակայքում գտնվող նմանատիպ հարմարություններ ունեցող տարածքների գները, որպես կանոն, զբաղեցնում են ավելի բարձր դիրք որոնման արդյունքներում։ Մտածեք մեկ գիշերվա գինը ճշգրտելու մասին՝ համեմատելով մրցակից տարածքների գների հետ, որպեսզի կարողանաք հյուրընկալել առնվազն 10 այց։

Ձեր տարածաշրջանում նմանատիպ հայտարարությունների գներն ստուգելու համար բացեք ձեր հայտարարության օրացույցը և ընտրեք մինչև 31 օր պարունակող ժամանակահատված։

Ձեր տարածաշրջանի քարտեզի վրա կտեսնեք նմանատիպ տարածքների միջին գները։ Գործոնները, որոնք որոշում են, թե որ տարածքներն են նման, ներառում են տեղադրությունը, չափերը, առանձնահատկությունները, հարմարությունները, գնահատականները, կարծիքները և այն հայտարարությունները, որոնք հյուրերն աչքի են անցկացնում ձեր հայտարարության հետ միասին։

Եթե բոլոր գիշերների համար նույն գինն եք առաջարկում, մտածեք աշխատանքային և հանգստյան օրերի գները ճշգրտելու մասին, որպեսզի գրավեք ավելի շատ հյուրերի։ Գնի փոփոխման այդպիսի մոտեցումը կօգնի առավելագույնի հասցնել ամրագրումները և եկամուտը։

Զեղչեր ավելացնելը հյուրերի ուշադրությունը գրավելու ևս մեկ միջոց է։ Կարող եք բավարարել զանազան ճանապարհորդների կարիքները՝ առաջարկելով.

• Շաբաթական և ամսական զեղչեր։ Շաբաթական զեղչեր առաջարկեք յոթ կամ ավելի գիշեր տևողությամբ այցերի համար կամ ամսական զեղչեր՝ 28 կամ ավելի գիշեր տևողությամբ այցերի համար։ Սա կարող է երկարացնել ձեր տարածքների ամրագրման միջին տևողությունը և պակասեցնել այցերի միջև ընկած ժամանակահատվածը։
• Վաղ ամրագրման զեղչ։ Ավելացրեք զեղչ ժամանումից 1-ից մինչև 24 ամիս առաջ կատարված ամրագրումների համար և զբաղված սեզոնների նախաշեմին ունեցեք ամրագրումների ամուր բազա։

Շաբաթական կամ ամսական 10% կամ ավելի մեծ զեղչերի և վաղ ամրագրման 3% կամ ավելի մեծ զեղչերի դեպքում հյուրերը որոնման արդյունքներում և ձեր հայտարարության էջում կտեսնեն հատուկ նշան։ Զեղչված գինը հայտնվում է սկզբնական գնի կողքին, որը վրագծված է։

Նկատի ունեցեք, որ վաղ ամրագրման զեղչը հասանելի չէ, երբ միացված է Խելացի գնանշումը, և այցի տևողության զեղչերը պետք է համապատասխանեն տեղական կանոններին և կանոնակարգերին։

Հյուրերը գնահատում են արագ և հստակ հաղորդակցությունը, իսկ սուպերտանտիրոջ չափանիշները պահանջում են, որ հյուրընկալողներն ունենան պատասխանների առնվազն 90% հաճախականություն։ Արագ պատասխանները կօգնեն հեշտությամբ և արդյունավետորեն պատասխանել հյուրերին։

Արագ պատասխանները կարճ հաղորդագրությունների ձևանմուշներ են որոշակի թեմաների վերաբերյալ, որոնց մասին հաճախ հարցնում են հյուրընկալողներին։ Կարող եք նախօրոք գրել կամ խմբագրել դրանք՝ հյուրի հետ զրուցելիս ուղարկելու համար։

Հինգ աստղանի կարծիքները նաև նշանակում են, որ կարողանում եք կանխատեսել հյուրերի կարիքները և անում եք ամեն ինչ՝ հնարավորության սահմաններում դրանք բավարարելու համար։

• Ավելացրեք անհատական մոտեցում։ Փոքր ժեստերը, օրինակ՝ ձեր նախընտրած տեղական սուրճն առաջարկելը կամ ողջույնի ձեռագիր երկտող թողնելը, կարող են մեծ նշանակություն ունենալ՝ ցույց տալով ձեր հատուկ վերաբերմունքը հյուրերի նկատմամբ։
• Օգնեք հյուրերին զգալ ինչպես իրենց տանը։ Փորձեք նրանց տեսանկյունից պատկերացնել ձեր տարածքն ու այն ամենը, ինչ առաջարկում եք։ Վաղ ժամանում թույլատրելը, սրբիչները կոկիկ ծալելն ու դարսելը և նմանատիպ այլ բաներ կարող են ընդհանուր լավ գնահատականը դարձնել գերազանց։
• Մնացեք կապի մեջ։ Տեղեկացրեք հյուրերին, որ ցանկացած պահի կարող են կապվել ձեզ կամ համահյուրընկալողի հետ։ Կարգավորեք ծանուցումներն այնպես, որ տեղեկանաք, երբ հյուրերն ուղարկեն հաղորդագրություններ։

Հայտարարության էջի պարբերաբար թարմացումը կօգնի գրավել ձեր տարածքի համար համապատասխան հյուրերի։

Որակյալ լուսանկարներն ուշադրություն են գրավում, օգնում են հստակեցնել ակնկալիքները և հյուրերին տալիս են ավելի մեծ վստահություն՝ ձեր տունն ամրագրելու համար։ Մտածեք ձեր տարածքի լուսանկարները թարմացնելու մասին, որպեսզի կարողանաք ստանալ սուպերտանտիրոջ կարգավիճակ։

• Ընտրեք ձեր պատկերները։ Լուսանկարները պետք է առաջնահերթորեն ցուցադրեն ձեր տան եզակի մանրամասները, սիրված հարմարությունները և հատուկ կարիքներով անձանց համար հարմարությունները։ Յուրաքանչյուր սենյակ և տարածք, որոնք հյուրերը կարող են օգտագործել, լուսանկարեք տարբեր դիտանկյուններից։
• Վերբեռնեք հորիզոնական, բարձր լուծաչափով պատկերներ։ Լուսանկարները պետք է լինեն առնվազն 800 х 1200 պիքսել։ Որքան մեծ լինի ֆայլը, այնքան ավելի լավ (առավելագույնը՝ 10 ՄԲ)։
• Դիմեք պրոֆեսիոնալի։ Օգնության համար վարձեք պրոֆեսիոնալ լուսանկարչի։ Աշխարհի որոշ քաղաքներում Airbnb-ն կարող է ձեզ կապել պրոֆեսիոնալի հետ։
• Ստեղծեք ֆոտոշրջայց։ Airbnb-ի գործիքն ավտոմատ տեսակավորում է ձեր վերբեռնած պատկերներն ըստ սենյակների, որպեսզի հյուրերը հասկանան ձեր տան դասավորությունը։ Կարող եք տեղափոխել, հեռացնել և ավելացնել լուսանկարներ, մանրամասներ ավելացնել յուրաքանչյուր սենյակի վերաբերյալ և մակագրեր թողնել յուրաքանչյուր լուսանկարի համար։

Հայտարարության բովանդակությունը նույնքան կարևոր է, որքան տեսքը։ Վերնագիրը, նկարագրությունն ու հարմարություններն ընձեռում են հյուրերին հրապուրելու և նրանց այցի վերաբերյալ հստակ ակնկալիքներ ձևավորելու ավելի շատ հնարավորություններ։

• Հայտարարության վերնագիրը պետք է լինի կարճ և նկարագրական։ Համոզվեք, որ վերնագիրը ներկայացնում է ձեր տան և շրջակայքի յուրահատուկ, ճշգրիտ պատկերը։ Օրինակ՝ «Խաղաղ ստուդիա Ուֆֆիցիի մոտակայքում» արտահայտությունը մի քանի բառով հաղորդում է այն միտքը, որ տարածքը հանգստավետ բնակարան է Իտալիայի Ֆլորենցիա քաղաքի կենտրոնում։
• Տարածքների հստակ, անկեղծ նկարագրությունները, որպես կանոն, լավագույն տարբերակն են։ Ներառեք կոնկրետ մանրամասներ, որոնք նկարագրում են, թե հյուրերն ինչ կարող են ակնկալել տեսնել, լսել և զգալ ձեր տարածքում։ Օրինակ՝ կարող եք ասել, որ բակը ցանկապատված է, կա երեխաների և տնային կենդանիների համար նախատեսված մեծ տարածք։
• Նշեք բոլոր հարմարությունները, որոնք առաջարկում եք։ Մտածեք, թե որ սիրված հարմարությունները կարող եք ավելացնել կամ բարելավել, օրինակ՝ մինի-սեյֆը սմարթ կողպեքով փոխարինելը կամ ձեր Wi-Fi կապն արդիացնելը։ Լավագույն հարմարությունները, որոնք որոնում են հյուրերը, ներառում են՝ ինքնուրույն ժամանում, Wi-Fi, լվացքի մեքենա, չորանոց, հեռուստացույց կամ կաբելային հեռուստատեսություն, ինչպես նաև խորովածի համար տարածք։***

*Հաշվարկը հիմնված է 2023 թվականի հոկտեմբերից մինչև 2024 թվականի հոկտեմբեր ընկած ժամանակահատվածում սուպերտանտերերի և ոչ սուպերտանտերերի եկամուտների միջնարժեքի վրա։

**Հաշվարկը հիմնված է Airbnb-ի ներքին տվյալների վրա՝ 2024 թվականի հոկտեմբերի 7-ի դրությամբ։

***Ըստ Airbnb-ի տվյալների, որոնցով չափվել են 2024 թվականի հունվարի 1-ից մինչև հունիսի 30-ն ամբողջ աշխարհում ամենահաճախ որոնված հարմարությունները։

Դուք եք միշտ վերահսկում գնանշումը և մյուս կարգավորումները։ Դրանք կարող են տարբերվել մյուս հյուրընկալողներից։

Հյուրընկալողները վճարվել են հարցազրույցներին մասնակցելու համար։

Հյուրընկալման վերաբերյալ խորհուրդները պետք է համապատասխանեն տեղական օրենսդրության պահանջներին։

Այս հոդվածում պարունակվող տեղեկությունները կարող են փոխված լինել հրապարակումից հետո։