Ինչպես մեծ եկամուտ վաստակել բարձր պահանջարկի ժամանակ

Տոները, խոշոր միջոցառումները և եղանակային բարենպաստ պայմանները կարող են մեծացնել ձեր տարածքի նկատմամբ հետաքրքրությունը։ Airbnb-ի հյուրընկալման գործիքներն օգնում են ձեզ առավելագույնս օգտվել բարձր պահանջարկ ունեցող այս ժամանակահատվածներից։ Հաշվի առեք այս քայլերը՝ եկամուտներն առավելագույնի հասցնելու համար։

Բարձր պահանջարկ ունեցող սեզոնին նախապատրաստվելու միջոցներից մեկը ձեր օրացույցում լրացուցիչ գիշերներ բացելն է։ Սա կօգնի, որ ձեր հայտարարությունը հայտնվի որոնման ավելի շատ արդյունքներում, իսկ եկամուտը՝ մեծանա։

Բացեք հայտարարության օրացույցը և փնտրեք արգելափակված գիշերները, որոնք նշված են մոխրագույնով։ Բացեք բոլոր արգելափակված գիշերները, որոնց ընթացքում կարող եք հյուրընկալել։

Եթե մեծացնեք ձեր ազատ ամսաթվերի միջակայքը, հյուրերը կկարողանան նախապես ամրագրել ձեր տարածքը։ Այս ռազմավարությունը հատկապես արդյունավետ է բարձր պահանջարկի կանխատեսելի ժամանակահատվածներ ունեցող տարածքների համար, ինչպիսիք են ամեն տարի կրկնվող մեծ միջոցառումները և ձյան ու լողափի սեզոնները։

Օրացույցում ամեն օր կբացվի ևս մեկ գիշեր՝ անկախ ձեր ազատ ամսաթվերի միջակայքից։ Օրինակ, եթե ձեր միջակայքը 12 ամիս է, հյուրերը կարող են տարածքն ամրագրել հաջորդ 365 օրվանից յուրաքանչյուրի համար, իսկ ձեր ազատ ամսաթվերն ամեն օր կթարմացվեն։

Բարձր պահանջարկ ունեցող սեզոններին մրցունակ մնալու համար ստուգեք ձեր տարածաշրջանում նմանատիպ տարածքների գները։ Նմանատիպ հայտարարությունների հետ համեմատելու համար բացեք ձեր հայտարարության օրացույցը և ընտրեք մինչև 31 օր պարունակող ժամանակահատված։

Ձեր տարածաշրջանի քարտեզի վրա կտեսնեք նմանատիպ տարածքների միջին գները։ Գործոնները, որոնք որոշում են, թե որ տարածքներն են նման, ներառում են տեղադրությունը, չափերը, առանձնահատկությունները, հարմարությունները, գնահատականները, կարծիքները և այն հայտարարությունները, որոնք հյուրերը հաճախ աչքի են անցկացնում ձեր հայտարարությանը զուգահեռ։

Այն հայտարարությունները, որոնց գներն ավելի ցածր են, քան մոտակայքի՝ նմանատիպ հարմարություններով հայտարարությունների գները, որպես կանոն, ավելի բարձր դիրք են զբաղեցնում որոնման արդյունքներում։

Եթե բոլոր գիշերների համար նույն գինն եք առաջարկում, մտածեք աշխատանքային և հանգստյան օրերին տարբեր գներ սահմանելու մասին, որպեսզի համապատասխանեք պահանջարկի փոփոխություններին։ Դինամիկ գնանշումը կօգնի առավելագույնի հասցնել ամրագրումները։

Զեղչեր ավելացնելը հյուրերի ուշադրությունը գրավելու ևս մեկ միջոց է։ Կարող եք համապատասխանել զանազան ճանապարհորդների կարիքներին՝ առաջարկելով․

• Շաբաթական և ամսական զեղչեր։ Շաբաթական զեղչեր առաջարկեք յոթ կամ ավելի գիշեր տևողությամբ այցերի համար կամ ամսական զեղչեր՝ 28 կամ ավելի գիշեր տևողությամբ այցերի համար։ Սա կարող է երկարացնել ձեր տարածքների ամրագրման միջին տևողությունը և պակասեցնել հերթափոխումները։
• Վաղ ամրագրման զեղչ։ Ավելացրեք զեղչ ժամանումից 1-ից մինչև 24 ամիս առաջ կատարված ամրագրումների համար և զբաղված սեզոնների նախաշեմին ունեցեք ամրագրումների ամուր բազա։
• Վերջին պահի զեղչ։ Ժամանման ամսաթվի մոտենալուն զուգահեռ մեկ գիշերվա գինը նվազեցնելը կօգնի ձեզ հյուրեր գրավել։ Օրացույցը լրացնելու և եկամուտը մեծացնելու համար զեղչեր առաջարկեք ժամանումից 1-ից 28 օր առաջ կատարված ամրագրումների համար։

Շաբաթական կամ ամսական 10% կամ ավելի զեղչերի, վաղ ամրագրման 3% կամ ավելի մեծ զեղչերի ու վերջին պահի զեղչերի դեպքում հյուրերը որոնման արդյունքներում և ձեր հայտարարության էջում տեսնում են հատուկ նշան։ Զեղչված գինը հայտնվում է սկզբնականի կողքին, որը վրագծված է։

Նկատի ունեցեք, որ վաղ ամրագրման զեղչը հասանելի չէ, երբ միացված է Խելացի գնանշումը, և այցի տևողության զեղչերը պետք է համապատասխանեն տեղական կանոններին և կանոնակարգերին։

Որակյալ լուսանկարները ուշադրություն են գրավում, օգնում են հստակեցնել ակնկալիքները և հյուրերին տալիս են ավելի մեծ վստահություն՝ ձեր տունն ամրագրելու համար։ Մտածեք ձեր հայտարարության լուսանկարները թարմացնելու մասին, երբ պատրաստվում եք բարձր պահանջարկ ունեցող սեզոններին։

• Ընտրեք ձեր պատկերները։ Լուսանկարները պետք է առաջնահերթ ցուցադրեն ձեր տան եզակի մանրամասները, սիրված հարմարությունները և հատուկ կարիքներով անձանց համար հարմարությունները։ Լուսանկարեք յուրաքանչյուր սենյակ և տարածք, որը հյուրերը կարող են օգտագործել, տարբեր դիտանկյուններից։
• Վերբեռնեք հորիզոնական, բարձր լուծաչափով պատկերներ։ Լուսանկարները պետք է լինեն առնվազն 800х1200 պիքսել։ Որքան մեծ լինի ֆայլը, այնքան ավելի լավ (առավելագույնը 10 ՄԲ)։
• Ընտրեք պրոֆեսիոնալ մոտեցումը։ Օգնության համար վարձեք պրոֆեսիոնալ լուսանկարչի։ Աշխարհի որոշ քաղաքներում Airbnb-ն կարող է ձեզ կապել պրոֆեսիոնալի հետ։
• Ստեղծեք ֆոտոշրջայց։ Airbnb-ի գործիքն ավտոմատ տեսակավորում է ձեր վերբեռնած պատկերներն ըստ սենյակների, որպեսզի հյուրերը հասկանան ձեր տան դասավորությունը։ Կարող եք տեղափոխել, հեռացնել և ավելացնել լուսանկարներ, մանրամասներ ավելացնել յուրաքանչյուր սենյակի համար և մակագրեր թողնել յուրաքանչյուր լուսանկարի համար։

Ձեր հայտարարությունը կարող եք նաև ավելի գրավիչ դարձնել ժամանման ու մեկնման պարզ գործընթացով։

• Ավելացրեք ինքնուրույն ժամանում։ Սմարթ կողպեքի, թվային կոդի կամ մինի-սեյֆի շնորհիվ հյուրերը կարող են կոդով մուտք գործել տարածք։ Շատ հյուրեր նախընտրում են ինքնուրույն ժամանման հարմարավետությունն ու ճկունությունը, իսկ ձեզ դա կօգնի ժամանակ խնայել։ Որ եղանակն էլ ընտրեք, կարևոր է, որ յուրաքանչյուր ամրագրող հյուր ստանա մուտքի եզակի կոդ։
• Մեկնման վերաբերյալ ցուցումներ տրամադրեք։ Ներառեք հստակ և պարզ քայլեր, օրինակ՝ որտեղ թողնել բանալիները, և ինչն է պետք անջատել։

«Կարևոր է հյուրերին չծանրաբեռնել այդ առաջադրանքներով, քանի որ ես չեմ ուզում, որ նրանց վերջին հիշողությունը լինի այն, թե որքան երկար էր մեկնումից առաջ անելիքների այդ ցանկը»,- ասում է Հյուրընկալողների խորհրդի անդամ Քեթին, որը սուպերտանտեր է Կալիֆոռնիայի Փալմ Սփրինգս քաղաքում։ «Կարող եք հինգ աստղանի կարծիք ստանալ միայն նրա շնորհիվ, որ մեկնումից առաջ անելիքների մեծ ցանկ չունեք»։

Ամբողջ աշխարհում հյուրընկալողների հարյուրավոր ակումբներ օգնում են Airbnb հյուրընկալողներին կապ հաստատել միմյանց հետ և սովորել միմյանցից։ Մենք համոզվել ենք, որ տեղական ակումբների անդամները վաստակում են երկու անգամ ավելի շատ, քան այն հյուրընկալողները, որոնք ակումբի անդամ չեն,* և գրեթե երեք անգամ ավելի հավանական է, որ նրանք դառնան սուպերտանտերեր։**

Ակումբի անդամները հիմնականում՝

• փոխանակվում են հյուրընկալման վերաբերյալ խորհուրդներով, որոնք կարող են օգնել մեծացնել եկամուտը
• քննարկում են կարճաժամկետ վարձակալության վերաբերյալ կանոնակարգերը
• կիսվում են հուսալի տեղական ծառայությունների կոնտակտներով (հավաքարարներ, ջրմուղագործներ և այլն)
• մասնակցում են ծանոթության և գործնական կապերի հաստատման բացառիկ միջոցառումների

*Ըստ Airbnb-ի ներքին տվյալների՝ 2022 թվականի սեպտեմբերից մինչև 2023 թվականի սեպտեմբերը Airbnb-ի հյուրընկալողների համաշխարհային ակումբի անդամների միջին եկամուտներն ու միջին գնահատականները համեմատելիս։ Եկամուտների տվյալները տարբեր են՝ կախված գտնվելու վայրից, սեզոնից և առաջարկի տեսակից։

**Ըստ Airbnb-ի տվյալների, որոնք վերաբերում են 2023 թվականի հուլիսից մինչև 2024 թվականի հուլիսը միացած հյուրընկալողների սուպերտանտիրոջ կարգավիճակին։

Դուք եք միշտ վերահսկում գնանշումը և մյուս կարգավորումները։ Դրանք կարող են տարբերվել մյուս հյուրընկալողներից։

Հյուրընկալողները վճարվել են հարցազրույցներին մասնակցելու համար։

Հյուրընկալման վերաբերյալ խորհուրդները պետք է համապատասխանեն տեղական օրենսդրության պահանջներին։

Այս հոդվածում պարունակվող տեղեկությունները կարող են փոխված լինել հրապարակումից հետո։