Խորհուրդներ թեժ սեզոնի ընթացքում հյուրընկալումը պարզեցնելու վերաբերյալ
Պիկ սեզոնը նախապես պլանավորելը կօգնի խնայել ժամանակը և ապահովել 5 աստղանի այցեր։ Հաշվի առեք այս խորհուրդները, երբ կառավարում եք միմյանց հաջորդող ամրագրումներ։
Հեշտացրեք մեկնման գործընթացը
Հյուրերն ակնկալում են առանց խնդիրների մեկնում։ Փնտրեք մեկնման գործընթացը հնարավորինս պարզ դարձնելու եղանակներ։
- Նվազագույնի հասցրեք առաջադրանքները։ Հյուրերը հաճախ նախընտրում են, որ մեկնումը շատ քիչ ջանք պահանջի։ Բացատրեք՝ ինչ է պետք անել մեկնելուց առաջ, օրինակ՝ ինչպես կողպել դուռը։
- Տրամադրեք հստակ ցուցումներ։ Ձեր հայտարարության ժամանման ուղեցույցում ավելացրեք մեկնման վերաբերյալ ցուցումները։ Airbnb-ն հյուրերի մեկնումից առաջ, երբ այցին մեկ գիշեր է մնում, ավտոմատ կերպով նրանց կուղարկի մեկնման վերաբերյալ ցուցումները։
- Ուղարկեք շնորհակալական գրություն։ Կարող եք նշել, որ ուրախ կլինեք, եթե հյուրերը վերադառնան, և ասել, որ գնահատում եք նրանց կարծիքը։ Կարող եք հարցնել, թե ինչը կուզենային փոխված կամ ավելացված տեսնել հաջորդ անգամ այցելելիս։
Ինչպես նախապատրաստել տարածքն այցերի միջև ընկած կարճ ժամանակահատվածում
Մաքրման կանոններ սահմանելով՝ կկարողանաք հեշտացնել և ավելի արդյունավետ դարձնել հաջորդ այցին նախապատրաստվելը։
- Ստեղծեք ստուգացանկ։ Յուրաքանչյուր ժամանումից առաջ նույն քայլերին հետևելը կօգնի ոչինչ չմոռանալ։
- Պահեստավորեք լրացուցիչ սպիտակեղեն։ Կարող եք ձեռքի տակ ունենալ անկողնային պարագաների և սրբիչների մեկ այլ լրակազմ, որպեսզի նվազագույնի հասցնեք լվացքի ծավալները։
- Գրանցվեք առաքման ծառայությունների համար։ Մաքրման միջոցների և այլ անհրաժեշտ պարագաների, օրինակ՝ զուգարանի թղթի և օճառի պարբերական պատվերներ պլանավորելը կօգնի ապահովել դրանց մշտական առկայությունը։
- Ստեղծեք աջակցման թիմ։ Մաքրության և տեխնիկական սպասարկման համար ունեցեք պահեստային պլան կամ ավելացրեք համահյուրընկալողի, որը կօգնի հյուրերի այցերի միջև ընկած ժամանակահատվածում տարածքը նախապատրաստել հաջորդ այցի համար։
«Ստուգացանկն օգնում է ինձ կենտրոնանալ, և ես ոչինչ բաց չեմ թողնում»,– ասում է Ավստրալիայի Մաունթ Բարքեր քաղաքում հյուրընկալող սուպերտանտեր Ռոբինը։ «Բոլոր մանրուքները հիշելը բարելավում է հյուրընկալման որակը և՛ հյուրերի, և՛ ինձ համար»։
Ինչպես ընդգծել սեզոնային հարմարությունները
Այնպես արեք, որ ձեր հայտարարությունն աչքի ընկնի՝ ավելացնելով ձեր տարածքում առաջարկվող սեզոնային հարմարություններ։
- Թարմացրեք լուսանկարները։ Ավելի տաք ամիսներին կարող եք հյուրերին ցույց տալ ձեր լողավազանը, խորովածի մանղալը, ցանցաճոճը կամ լողափի հասանելիությունը։ Ավելի ցուրտ ամիսներին կարող եք ընդգծել ներսի բուխարու, ջակուզիի առկայությունը կամ լեռնադահուկային լանջի հասանելիությունը։
- Նշեք ձեր բոլոր հարմարությունները։ Շատ հյուրեր Airbnb-ում որոնում են իրենց ուզած հարմարություններով և առանձնահատկություններով տարածքներ։ Համոզվեք, որ ձեր հայտարարությունն ամբողջական է։
- Թարմացրեք տարածքի նկարագրությունը։ Բարձրորակ հայտարարություններում ճշգրտորեն նկարագրվում է, թե հյուրերն ինչ կարող են ակնկալել տեսնել, լսել և զգալ իրենց այցի ընթացքում։
«Ամեն տարի մենք ավելացնում ենք նոր հարմարություն՝ որևէ առանձնահատուկ բան, որպեսզի հյուրերը նորից ու նորից վերադառնան»,– ասում է Ֆրեդը, որը սուպերտանտեր է Բելիզի Պլասենսիա քաղաքում։ «Մենք ավելացրել ենք տաղավար, աստղադիտարան և բար հենց ջրի վրա»։
Այս հոդվածում պարունակվող տեղեկությունները կարող են փոխված լինել հրապարակումից հետո։