Գաղտնիքներ փորձառու սուպերտանտիրոջից
Առանձնահատկություններ
Շփումը լավ հյուրընկալման թիվ 1 կանոնն է
Աչքի ընկեք հիանալի լուսանկարներով, մանրամասն նկարագրությամբ և հյուրերի համար սահմանված հստակ ակնկալիքներով
Սկսեք ցածր գնից, որպեսզի ապահովեք ամրագրումների հոսք, վերացնեք թերությունները և ստանաք հիանալի կարծիքներ
- Կարդալով մեր ամբողջական ուղեցույցը՝ կպարզեք, թե ինչպես կարող եք բարելավել հյուրընկալման ձեր հմտությունները
Նիկին Airbnb-ի առաջին հյուրընկալողներից էր, որ ձեռք բերեց սուպերտանտիրոջ կարգավիճակ, երբ ծրագիրն առաջին անգամ գործարկվեց 2014 թվին։ Նա այդ կարգավիճակը պահպանում է ավելի քան 16 անընդմեջ եռամսյակ։
Ինչպե՞ս է դա հաջողվում Նիկիին։ Նա հյուրընկալել սովորել է զրոյից՝ սկսելով Սան Ֆրանցիսկոյում սեփական հետնաբակում գտնվող փոքրիկ քոթեջից։ Այդ միակ հայտարարությունն այնքան մեծ հաջողություն ունեցավ, որ նա ոգեշնչվեց ու ծավալվեց՝ ընտանեկան արձակուրդների ընթացքում վարձակալության հանձնելով նաև երեք ննջասենյակ ունեցող իր ամբողջ տունը։
Այստեղ Նիկին կիսվում է սուպերտանտիրոջ իր հաջողության գաղտնիքներով։
Ինչպես սկսել հյուրեր ընդունել
«Վեց տարի առաջ ես մեկնեցի Ֆրանսիա՝ Պրովանս, առաջին անգամ մնացի Airbnb-ի միջոցով ամրագրված տանն ու շատ հավանեցի։ Դա փոքրիկ ստուդիա էր հին Էքս ան Պրովանս քաղաքում։ Այն լիովին համապատասխանում էր մեր կարիքներին, բայց հյուրընկալողներն այնքան էլ շատ ջանք չէին գործադրել տունն ավելի հմայիչ դարձնելու համար։ Ես հասկացա, որ եթե մի քիչ փող ներդնեի, կարող էի իմ հետնաբակում գտնվող 200 քառակուսի ֆուտ (18.58 մ²) մակերեսով փոքրիկ հյուրատնից ստեղծել ինչ-որ առանձնահատուկ բան։ Ես ենթադրում էի, որ դա միայն հազվադեպ ամրագրումներ կստանա, բայց զարմացա, երբ այն անմիջապես ամրագրվեց մի ամբողջ շաբաթով»։
Ինչպես ունենալ արագ ամրագրում
«Ամեն անգամ, երբ նոր հայտարարություն եմ առցանց հրապարակում, սկսում եմ տարածքի՝ շուկայական գնի ընդամենը 50-70%-ը կազմող սկզբնական գնից, մինչև ունենամ առնվազն երեք կարծիք (կամ մինչև ստանամ ամրագրման այնքան շատ հայտեր, որ կարողանամ գինը բարձրացնել և հասցնել շուկայական գներին)։ Ես դա անում եմ, որպեսզի կարողանամ վերացնել թերությունները՝ առանց բացասական կարծիքների առիթ տալու։ Բացի այդ, կարևոր է հնարավորինս շուտ ստանալ կարծիքներ, որպեսզի հայտարարությունը հայտնվի որոնման արդյունքների ավելի բարձր դիրքերում»։
Ինչպես նախապատրաստել հյուրերի համար հարմար տարածք
«Ամեն ինչ սկսվում է լավ տարածքից։ Այն պետք է մաքուր լինի։ Ինձ դուր են գալիս իմ բաց և ընդարձակ տարածքները։ Առանց ավելորդությունների, բայց՝ դիզայնի ուշագրավ մանրամասներով։ Այն նաև պետք է լինի հարմարավետ, հատկապես՝ մահճակալները։ Ես փող չեմ խնայում հիշողության սպունգով ներքնակների համար, և մարդիկ հավանում են դրանք։ Դա իսկական ապրումակցում է։ Դու քայլում ես տարածքով և մտածում, թե ինչպես են մարդիկ օգտագործելու դա, և դրա հիման վրա մշակում դիզայնը»։
Ինչպես աչքի ընկնել Airbnb-ում
«Լավ լուսանկարները վճռորոշ նշանակություն ունեն։ Պրոֆեսիոնալ լուսանկարները պարտադիր են։ Ես մտածում եմ, թե ինչպիսին պետք է լինի տարածքը. արդյոք այն նախատեսվելու է ընտանիքի, թե իդեալական է լինելու որոշակի տեսակի ճանապարհորդի համար, և դա արտահայտում եմ վերնագրի մեջ։ Հայտարարությունն ուշագրավ դարձնելու համար գրեք իսկապես լավ, մանրամասն և հմայիչ նկարագրություն։ Նկարագրեք մահճակալները, սպիտակեղենը, նշեք օճառի ապրանքանիշերը կամ տրամադրվող հարմարությունները»։
Ինչպես ձևավորել հյուրերի ակնկալիքները
«Հայտարարության մեջ անպայման ներառեք ձեր սեփականության արտասովոր կողմերի նկարագրությունը։ «Դրանք ներկայացրեք ազնվորեն և հասկանալիորեն, բայց՝ առանց տհաճ զգացումներ առաջացնելու։ Նկարագրությունը պետք է լինի բավականաչափ թափանցիկ, որպեսզի հյուրերը կարողանան ընտրել իրենց ուզածը»։
Ինչպես ստեղծել հիանալի հաղորդակցություն
«Ըստ իս՝ շփումը լավ հյուրընկալման թիվ 1 կանոնն է։ Հյուրի հետ անմիջական շփումը սկսվում է առաջին հարցումից։ Ամրագրման յուրաքանչյուր հայտից հետո ես միշտ մի քանի լրացուցիչ հարց եմ տալիս պոտենցիալ հյուրերին այնպես, որ կոպիտ կամ չափից ավելի հետաքրքրասեր չթվամ, այլ պարզապես համոզվեմ, որ տարածքը հարմար է նրանց։ Եվ հենց այդ պահից սկսվում է 5 աստղանի կարծիք ստանալու գործընթացը»։
Հյուրընկալող լինելու զարմանալի առավելությունները
«Ինձ համար ամենամեծ անակնկալն այն է, թե որքան հրաշալի են հյուրերը։ Մարդիկ այնքան ազնիվ, բարի և հասկացող են։ Իսկ տնտեսական տեսանկյունից՝ ինձ զարմացրեց եկամուտը։ Ես այսպիսի հաջողություն չէի ակնկալում և չէի մտածում, որ դա կվերածվեր հիմնական աշխատանքի։ Ես կենտրոնացել եմ հյուրընկալման այն կողմերի վրա, որոնք ինձ իսկապես դուր են գալիս, և օգտվել բոլոր հնարավորություններից։ Դրա շնորհիվ ունեցա իսկապես լավ արդյունքներ»։
Առանձնահատկություններ
Շփումը լավ հյուրընկալման թիվ 1 կանոնն է
Աչքի ընկեք հիանալի լուսանկարներով, մանրամասն նկարագրությամբ և հյուրերի համար սահմանված հստակ ակնկալիքներով
Սկսեք ցածր գնից, որպեսզի ապահովեք ամրագրումների հոսք, վերացնեք թերությունները և ստանաք հիանալի կարծիքներ
- Կարդալով մեր ամբողջական ուղեցույցը՝ կպարզեք, թե ինչպես կարող եք բարելավել հյուրընկալման ձեր հմտությունները