Անցեք առաջ՝ առաջարկվող արդյունքներին ծանոթանալու համար
    Այս բովանդակությունը հասանելի չէ ձեր ընտրած լեզվով, ուստի այն ցուցադրում ենք դրան ամենամոտ լեզվով։

    Ինչպես նախապատրաստվել Airbnb.org-ի միջոցով փախստական հյուրերի ընդունմանը

    Ուղեցույցներ, որոնք կօգնեն ընդունել ձեր համայնքում նոր կյանք սկսող մարդկանց։
    Հեղինակ՝ Airbnb, ամսաթիվ՝ 29 օգս, 2019 թ.
    5 րոպե ընթերցում
    Թարմացվել է՝ 31 մրտ, 2022 թ.

    Առանձնահատկություններ

    Նոր երկիր տեղափոխվելիս փախստականներն ու ապաստան հայցողները բախվում են նոր մշակութային միջավայրը հասկանալու խնդիրների՝ միաժամանակ զբաղվելով բազում կազմակերպչական հարցերով, օրինակ՝ փաստաթղթեր լրացնելով և աշխատանք փնտրելով։ Հաճախ Airbnb.org-ի՝ շահույթ չհետապնդող գործընկերների սոցիալական աշխատողները փախստական հաճախորդներին աջակցում են այս կարևոր խնդիրներում և օգնում մշտական կացարան գտնել։ Երբեմն փախստականներն ու ապաստան հայցողները ստիպված են լինում ինքնուրույն հաղթահարել այս մարտահրավերները։

    Որպես հյուրընկալող՝ դուք կարող եք կարևոր դեր կատարել ինչ-որ մեկի կյանքի վճռորոշ պահին՝ առաջարկելով անվտանգ և հարմարավետ մնալու ժամանակավոր տեղ, մինչ նրանք կհարմարվեն նոր միջավայրին, կկարողանան կազմել ապագա կյանքի պլան և կվերագտնեն բնականոն կյանքի զգացողությունը։

    Այս հոդվածում դուք կգտնեք խորհուրդներ, թե ինչպես նախապատրաստվել նոր կյանք սկսող հյուրեր ընդունելու։ Առաջարկությունները հիմնված են փախստական հյուրեր ընդունող տանտերերի և շահույթ չհետապնդող կազմակերպությունների՝ փախստական հաճախորդներին օգնող սոցիալական աշխատողների խորհուրդների վրա։

    1. Հստակորեն ներկայացրեք ձեր տարածքի վերաբերյալ մանրամասները

    Նախքան ամրագրումը Airbnb.org-ի՝ շահույթ չհետապնդող գործընկերներից մեկի, օրինակ՝ IRC-ի և HIAS-ի սոցիալական աշխատողը կամ վճարովի ամրագրման կտրոն ստացած որևէ հավանական հյուր կկապվի ձեզ հետ, որպեսզի հաստատի ձեր տարածքի մանրամասները։ Դա հեշտացնելու համար խնդրում ենք համոզվել, որ տարածքի մանրամասներն ամբողջական ու արդիական են, և հնարավորինս շուտ պատասխանեք հարցումներին։

    Կարևոր է իմանալ, որ փախստականների ճգնաժամի ընթացքում, ինչպիսին է ներկայումս Ուկրաինայի ժողովրդին պատուհասածը, առաջանում է կացարաններով ապահովման հրատապ և անհետաձգելի անհրաժեշտություն։ Որոշ դեպքերում Airbnb.org-ի միջոցով ամրագրման հայտերը կարող են լինել առնվազն 30 օր տևողությամբ այցերի համար՝ հյուրի սկզբնական իրազեկումից ընդամենը մեկ կամ երկու օր հետո։

    Ամրագրումը ձևակերպելու ընթացքում կարող եք հարցեր տալ հյուրին կամ սոցիալական աշխատողին, իսկ եթե անհրաժեշտություն առաջանա, ձեր տրամադրության տակ կլինի նաև Airbnb-ի աջակցման ծառայությունների հատուկ վերապատրաստված թիմը։

    2. Փախստական հյուրերը կարող են լրացուցիչ աջակցության կարիք ունենալ

    Շահույթ չհետապնդող գործընկեր կազմակերպությունները հաճախ իրենց հաճախորդներին տրամադրում են առաջին անհրաժեշտության պարագաներ, ինչպիսիք են սնունդը և տրանսպորտը, ինչպես նաև՝ կարևոր ծառայություններ, օրինակ՝ աջակցություն առողջապահական, աշխատանքի տեղավորման և երկարաժամկետ բնակապահովման հարցերում։

    Հաշվի առնելով Ուկրաինայի փախստականների վերաբնակեցման խնդրի մեծ ծավալը՝ այս աջակցության ծառայությունների պահանջարկը չափազանց մեծ է։ Հյուրերին խորհուրդ ենք տալիս նախ ջանքեր գործադրել այս հիմնական պահանջմունքներն ինքնուրույն բավարարելու համար, որպեսզի աջակցություն ցուցաբերվի առավել կարիքավոր անհատներին։

    Որպես հյուրընկալող՝ կարող եք ցուցումներ տրամադրել տեղական ռեսուրսների վերաբերյալ (թեև դա, իհարկե, պարտադիր չէ), որոնք հյուրերին կօգնեն հարմարվել իրենց նոր համայնքին։

    «Ես մտածում էի պրագմատիկ մոր պես»,- ասում է հյուրընկալող Սառան՝ Կանադայի Վանկուվեր քաղաքից։ «Գուցե նրանք հագուստի կարի՞ք ունեն։ Արդյո՞ք պետք է սննդամթերք դնել սառնարանում։ Գուցե մթերքներ գնելու հարցում օգնությո՞ւն է պետք նրանց»։ Նա այս հարցերն ուղղել է իր հյուրերի՝ շահույթ չհետապնդող սոցիալական աշխատողին, որը հաղորդագրությամբ պատասխանել է, որ հյուրընկալվող ընտանիքն ուրախ կլիներ ստանալ լրացուցիչ ծածկոցներ ու փոքրիկ խաղալիքներ երեխաների համար։

    Իր ուկրաինական արմատներով և Airbnb.org-ի միջոցով փախստականների հյուրընկալելու նախկին փորձառությամբ՝ Կանադայի Օնտարիո նահանգում հյուրընկալող Ադամն իսկույն բնակարան առաջարկեք Ուկրաինայի հակամարտությունից փախչող մարդկանց։ Ադամը ոչ միայն հյուրընկալում է սեփական տարածքում և իր կառավարմանը հանձնված սեփականություններում, այլև, իր խոսքով, ուրախությամբ օգնում է հյուրերին վերստին կարգավորել իրենց կյանքը՝ նրանց ներկայացնելով իր տարածքում հաստատված ուկրաինական մշակույթն ու համայնքը, օրինակ՝ խանութները, եկեղեցիները և մասնագիտական զարգացման դասընթացները տեղի ուկրաինական համայնքի կենտրոնում։ «Ես կհարցնեմ նրանց. «Ինչո՞վ էիք զբաղվում հայրենիքում», և կփորձեմ նշել առաջ շարժվելու ճիշտ ուղղությունը»,- ասում է նա։

    3. Հարգեք անձնական տարածքը

    Առանձնության աստիճանը, որը նախընտրում է ունենալ յուրաքանչյուր անհատ կամ ընտանիք, տարբեր է, ինչպես Airbnb-ի ցանկացած այլ հյուրի դեպքում։ Եթե նշեք ձեր տան այն տարածքները, որտեղ հյուրերը կարող են մեկուսանալ ու հանգստանալ կամ շփվել ընտանիքով (փոքր առանձնասենյակ, բակ կամ այլ տարածք), նրանց ավելի հեշտ կլինի հարմարվելը։

    «Ընտանիքը [որին մենք հյուրընկալեցինք] ուներ ըստ ցանկության առանձնանալու կամ այլոց հետ շփվելու հնարավորություն»,- ասում է Սառան։ «Մենք սիրալիր էինք, եթե նրանց տեսնում էինք այգում կամ մթերքներ հավաքելիս, բայց փորձում էինք չխաթարել նրանց առանձնությունը»։

    4. Հետևեք COVID-19-ի պայմաններում առողջության և անվտանգության կանոններին

    Airbnb-ն ներկայացրել է ուղեցույցներ և ծրագրեր, որոնք հյուրընկալողներին կօգնեն ապահովել ավելի անվտանգ այց։ Ահա որոշ հիմնական դրույթներ.

    • Կրեք դիմակ և պահպանեք սոցիալական հեռավորություն, եթե դա պահանջվում է տեղական օրենքներով և ուղեցույցներով
    • Յուրաքանչյուր այցից հետո հետևեք Airbnb-ի 5 փուլանի մանրազնին մաքրման գործընթացին
    • Մի ճանապարհորդեք կամ հյուրընկալեք, եթե վերջերս շփվել եք COVID-19-ով վարակվածի հետ կամ ունեք ախտանիշներ
    Իմացեք ավելին Airbnb-ի՝ COVID-19-ին առնչվող առողջության և անվտանգության վերաբերյալ պահանջների մասին

    5. Այլ ռեսուրսներ

    Փախստական հյուրերը կարող են լուրջ դժվարություններ ունենալ իրենց ճանապարհորդության ընթացքում։ Եթե ուզում եք ավելին իմանալ փախստականների վիճակի մասին, աչքի անցկացրեք շահույթ չհետապնդող մեր գործընկերների առաջարկած այս ռեսուրսները․

    Հաճախ տրվող հարցեր

    Ինչպե՞ս են Ուկրաինայից փախչողներն ամրագրում ժամանակավոր տներ
    Երբ որոշվի, որ տվյալ անձը կամ ընտանիքը ժամանակավոր կացարանի կարիք ունի, շահույթ չհետապնդող կազմակերպության սոցիալական աշխատողներից մեկը կարող է նրան օգնել տուն ամրագրելու հարցում, կամ հյուրը կարող է ստանալ ամրագրման կտրոն, որով կկարողանա ինքնուրույն ամրագրել ժամանակավոր կացարան։

    Հնարավոր է, որ հյուրընկալողներն ամրագրման ընթացքում ծանուցվեն այն մասին, որ ամրագրման հայտը վերաբերում է Airbnb.org-ի միջոցով արտակարգ իրավիճակների համար նախատեսված կացարան ստանալուն։

    Որքա՞ն ժամանակ պետք է կացարան տրամադրեմ փախստական հյուրերին
    Սովորաբար, Airbnb.org-ի միջոցով տներն ամրագրվում են մի քանի օրից մինչև մի քանի շաբաթ տևողությամբ։ Այնուամենայնիվ, քանի որ միլիոնավոր մարդիկ փախչում են Ուկրաինայից, շահույթ չհետապնդող և պետական գործակալությունները գործ են ունենում օգնության բազմաթիվ հայտերի հետ՝ անհրաժեշտ դարձնելով որոշ հյուրերի համար տների տրամադրումն առնվազն 30 օր տևողությամբ։

    Որոշ քաղաքներ հրաժարվել են փախստականների համար կացության տևողության սահմանափակումներից։ Ձեր տարածաշրջանում գործող կանոնակարգերին ծանոթանալու համար դիմեք համապատասխան տեղական մարմիններին։

    Ի՞նչ կլինի փախստական հյուրի այցի ավարտից հետո
    Փախստական հյուրը ժամանակավոր այցի ընթացքում գուցե պլանավորում է նոր վայրում հիմնավորվելու հաջորդ քայլերը (օրինակ՝ գտնել երկարաժամկետ կացարան)։

    Հյուրերը կարող են անմիջականորեն օգտվել Airbnb.org-ի աջակցման մասնագիտացված թիմի ծառայություններից, որը անհրաժեշտության դեպքում լրացուցիչ աջակցություն ստանալու համար սերտորեն համագործակցում է շահույթ չհետապնդող տեղական կազմակերպությունների հետ։

    Հաշվի առնելով Ուկրաինայի ճգնաժամի աննախադեպ մասշտաբները՝ շահույթ չհետապնդող կազմակերպությունները պետք է առաջին հերթին լրացուցիչ օգնություն առաջարկեն այն անհատներին, որոնք ամենից շատ ունեն դրա կարիքը։ Այս պահին անհնար է երաշխավորել, որ յուրաքանչյուր հյուր կկարողանա ստանալ երկարաժամկետ աջակցություն։

    Այն դեպքում, երբ հյուրն իր այցի ավարտին ունենա լրացուցիչ ժամանակավոր կացարանի կարիք, կարող է դիմել Airbnb.org-ին և խնդրել լրացուցիչ կացարան մինչև երկու շաբաթ տևողությամբ։

    Ի՞նչ պահանջների պետք է համապատասխանեն մարդիկ, որպեսզի ստանան արտակարգ իրավիճակներում տրամադրվող կացարաններ
    Airbnb.org-ը հաճախ համագործակցում է ճգնաժամային իրավիճակներում արձագանքման և փախստականների վերաբնակեցման ոլորտում մասնագիտացած ոչ առևտրային կազմակերպությունների և վերաբնակեցման հարցերով զբաղվող գործակալությունների հետ, որոնք օգնում են անմիջականորեն տեղում աջակցություն տրամադրելու հարցերում, այդ թվում՝ գնահատելու հնարավոր պոտենցիալ հյուրերի կարիքներն ու համապատասխանությունը պահանջներին։

    Այն հյուրերը, որոնք ինքնուրույն են ժամանակավոր կացարաններ ամրագրում Airbnb.org-ի միջոցով, պետք է բացեն Airbnb հաշիվ, որի համար կարող են կատարվել ինքնության հաստատման ստուգումներ։

    Ինչպե՞ս է Airbnb.org-ի միջոցով հյուրընկալումն ազդում սուպերտանտիրոջ իմ կարգավիճակի վրա
    2022 թ. ապրիլի 1-ին սուպերտանտերերի գնահատման համար (որը ներառում է 2021 թ․ ապրիլի 1-ից մինչև 2022 թ․ մարտի 31 ժամանակահատվածը)՝

    • Airbnb.org-ի միջոցով կատարված ամրագրումները կավելացվեն ձեր ընդունած այցերի ընդհանուր թվին։
    • Airbnb.org-ի միջոցով կատարված ամրագրումները չեն ազդի այլ գործոնների, այդ թվում՝ կարծիքների, չեղարկումների և պատասխանների հաճախականության վրա, որոնք հաշվի են առնվում սուպերտանտերերի եռամսյակային գնահատումներում։

    Պատրա՞ստ եք սկսելու։ Միացեք աճող համայնքին, որը բացահայտում է կարիքի պահին Airbnb.org-ի միջոցով միմյանց օգնելու զորությունը։

    Առանձնահատկություններ

    Airbnb
    29 օգս, 2019 թ.
    Հոդվածն օգտակա՞ր էր։

    Ուսումնասիրեք ավելի շատ թեմաներ