Ինչպես հասկանալ օրացույցի և ամրագրման կարգավորումները

Սահմանեք գներ և ազատ ամսաթվեր, որպեսզի ստանաք ցանկալի ամրագրումներ։
Հեղինակ՝ Airbnb, ամսաթիվ՝ 1 դեկ, 2020 թ.
3 րոպե ընթերցում
Թարմացվել է՝ 3 ապր, 2023 թ.

Օրացույցն ու ամրագրման կարգավորումները հնարավորություն են տալիս վերահսկելու, թե երբ տրամադրեք ձեր տարածքը՝ տարվա ընթացքում շաբաթավերջի մի քանի հանգստյան օրերից մինչև 365 օր։ Այս կարգավորումներին տիրապետելը կօգնի բավարարել հյուրերի կարիքները և ավելի սահուն կերպով վարել հյուրընկալման բիզնեսը։

Ահա թե ինչպես սահմանել օրացույցի կարգավորումները, որպեսզի դրանք հարմար լինեն ձեզ։

Ինչպես սահմանել օրացույցի ազատ ամսաթվերը

Հնարավոր է օրացույցում ամսաթվերն ամրագրման համար հասանելի դարձնել առաջիկա երկու տարվա կտրվածքով։ Որքան շատ լինեն ազատ ամսաթվերը, այնքան շատ տարբերակներից կկարողանան ընտրել հյուրերը։

Օրացույցի ազատ ամսաթվերն արդիական պահելը կարևոր է ամրագրումների չեղարկումից խուսափելու համար։ Չեղարկումները կարող են ձեզ համար հանգեցնել վճարների ու այլ հետևանքների և տհաճ տպավորություն թողնել հյուրերի վրա։

Մեխիկոյում գործող սուպերտանտեր Կևինոն ասում է, որ օգտագործում է օրացույցի և ամրագրման կարգավորումները, որպեսզի՝

  • Թարմացնի գները՝ հաշվի առնելով տարածաշրջանում առկա պահանջարկը։ «Սովորաբար, ես ավելի շատ գումար եմ գանձում հոկտեմբերին և նոյեմբերին, որը թեժ սեզոն է համարվում Մեխիկոյում՝ կազմակերպվող բազմաթիվ փառատոներով պայմանավորված։ Բոլորը ցանկանում են այստեղ լինել Մեռյալների օրը»։
  • Սահմանի կոնկրետ ժամեր ժամանման և մեկնման համար։ «Հյուրերը կարող են ժամանել ժամը 14:00-ից սկսած և մեկնել ցանկացած պահի՝ մինչև 12:00։ Ես ուզում եմ, որ իմ հյուրերը մեկնելուց առաջ ունենան հանգստանալու և նախաճաշելու ժամանակ։ Ես նաև տրամադրում եմ կողպեքով փակվող տարածք, որտեղ հյուրերը, որոնք ցանկանում են մեկնումից հետո մնալ քաղաքում, կարող են ապահով պահել իրենց ուղեբեռը»։

  • Արգելափակի ամսաթվերը, որոնք պահել է ընտանիքի, ընկերների կամ հաճախակի այցելող հյուրերի համար։ «Ես նաև ունեմ հյուրեր, որոնք սիրում են վերադառնալ ամեն տարի նույն ժամանակ, ուստի հաճախ նախապես եմ արգելափակում այդ ամսաթվերը»։

Նաև կարող եք օգտագործել ամրագրման կարգավորումները, որպեսզի՝

  • ընտրեք ժամանակը, որն անհրաժեշտ է հյուրերին ընդունելուց առաջ նախապատրաստվելու համար,
  • սահմանեք այցի նվազագույն և առավելագույն տևողությունները,

  • համաժամացնեք ձեր Airbnb օրացույցը այլ առցանց օրացույցների հետ։ Օրացույցի համաժամացումն օգնում է խուսափել կրկնակի ամրագրումներից և թույլ է տալիս մեկ տեղում ստուգել անձնական ժամանակացույցը։

Օրացույցում նաև պահպանվում են հյուրերի ամրագրումները։ Կարող եք ցույց տալ կամ թաքցնել մանրամասները, որպեսզի ստուգեք ազատ ամսաթվերի առկայությունը երկարաժամկետ հեռանկարում, վերանայեք մեկ գիշերվա նախկին գները, ճշգրտեք ապագա գներն ու հատուկ առաջարկները և նախօրոք վստահորեն պլանավորեք։

Ընտրեք, թե հյուրերն ինչպես կարող են ամրագրել ձեր տարածքը

Կարող եք հյուրերին առաջարկել ձեր տարածքն ամրագրել ակնթարթային ամրագրման կամ ամրագրման հայտի միջոցով։

Ամրագրման հայտերը հյուրընկալողներին թույլ են տալիս ամրագրումներ ընդունել առանձին-առանձին՝ հայտերը ստանալուց հետո 24 ժամվա ընթացքում։ Այս մոտեցումը նախընտրում են այն հյուրընկալողները, որոնք՝

  • ունեն անկանխատեսելի հասանելիություն՝ իրենց անձնական կարիքներով և ժամանակացույցով պայմանավորված․
  • տրամադրում են յուրօրինակ առանձնահատկություններ ունեցող տարածք, օրինակ՝ գյուղական տուն առանց որոշակի հարմարությունների, որի մասին ուզում են հայտնել հյուրերին՝ ամրագրումից առաջ ակնկալիքներ ձևավորելու նպատակով.
  • առաջարկում են 28 գիշեր կամ ավելի տևողությամբ երկարաժամկետ այցեր։

Ակնթարթային ամրագրումը ձեր բոլոր պահանջներին համապատասխանող և տան կանոններն ընդունող հյուրերին թույլ է տալիս ակնթարթորեն ամրագրում կատարել ցանկացած ազատ ամսաթվերի համար։ Այս գործիքն արագացնում է ամրագրման գործընթացը և նվազեցնում ամրագրման յուրաքանչյուր հայտն ուսումնասիրելու և ընդունելու անհրաժեշտությունը։

«Ես փորձեցի երկու տարբերակ․ նախ՝ իմ տարածքի հայտարարությունը հրապարակեցի ամրագրման հաստատման տարբերակով, հետո՝ ակնթարթային ամրագրման հնարավորությամբ»,- ասում է Կևինոն։ «Ակնթարթային ամրագրման միջոցով ստացա զգալիորեն ավելի շատ ամրագրումներ»։

Այս և այլ կարգավորումներով կարող եք վերահսկել, թե երբ և ինչպես ամրագրվի ձեր տարածքը, և կազմել հյուրընկալման հարմար օրացույց։

Այս հոդվածում պարունակվող տեղեկությունները կարող են փոխված լինել հրապարակումից հետո։

Airbnb
1 դեկ, 2020 թ.
Հոդվածն օգտակա՞ր էր։