Airbnb Սենյակներ. բոլորովին նոր մոտեցում առանձին սենյակներին

Կարող եք ձեր մասին լրացուցիչ տեղեկություններ հայտնել հյուրընկալողի անձնագրում։
Հեղինակ՝ Airbnb, ամսաթիվ՝ 17 հնվ, 2024 թ.
3 րոպե տևողությամբ տեսանյութ
Թարմացվել է՝ 17 հնվ, 2024 թ.

Խմբագրի նշում. այս հոդվածը հրապարակվել է Airbnb 2023 ամառային թողարկման շրջանակներում։ Տեղեկությունները կարող են փոխված լինել հրապարակումից հետո։ Իմացեք ավելին մեր վերջին պրոդուկտի թողարկման մասին։

Airbnb-ն ստեղծվեց՝ որպես ճանապարհորդների համար մեկ ուրիշի տանը մնալու մատչելի միջոց։ Տարիներ շարունակ առանձին սենյակների հյուրընկալողները միավորում են մարդկանց և օգնում հյուրերին տեղացու աչքերով տեսնել նոր վայրերը։

Հաշվի առնելով ներկայիս տնտեսական իրավիճակը, այսօր շատերի համար կարևոր է ճանապարհորդության մատչելիությունը։ Համավարակի տարիների մեկուսացումից հետո մարդիկ այժմ շփման և անմոռանալի տպավորությունների կարիք ունեն։

Այսպիսով, ներկայացնում ենք Airbnb Սենյակները՝ բոլորովին նոր մոտեցում առանձին սենյակներին։ Թարմացումները ներառում են․ 

  • Հյուրընկալողի անձնագիր, որպեսզի հյուրերը ծանոթանան ձեզ հետ նախքան ամրագրելը։

  • Սենյակների նոր կատեգորիա և կատարելագործված որոնման զտիչներ՝ առանձին սենյակների որոնումը հեշտացնելու համար։

  • Գաղտնիության հետ կապված նոր մանրամասներ՝ բոլորի հարմարավետության համար։

Հյուրընկալողի անձնագիր

Նախքան առանձին սենյակ ամրագրելը հյուրերն ուզում են իմանալ, թե ում հետ են կիսելու տարածքը։ Հյուրընկալողի անձնագիրն այժմ հյուրերին ներկայանալու ավելի շատ հնարավորություն է տալիս։ Այն նաև ձեր պրոֆիլից վերցված տեղեկություններ է ցույց տալիս և ընդգծում դրանք որոնման արդյունքներում և ձեր հայտարարության մեջ։

Առաջին փոփոխությունը, որ կնկատեք, ձեր պրոֆիլի նկարն է հիմնական հայտարարության լուսանկարի անկյունում։ Սեղմելով այն՝ հյուրը կտեսնի հյուրընկալողի անձնագիրը և ձեր տրամադրած տեղեկությունները։

Ձեր անունը, հյուրընկալման տարիները, գնահատականը և հյուրերի կարծիքները հայտնվում են հյուրընկալողի անձնագրի վերևում։ Ստորև՝ ձեր պրոֆիլի նոր բաժիններում, կարող եք ավելացնել տարբեր տեղեկություններ, օրինակ՝ ձեր բնակավայրը, հոբբիները, տնային կենդանու անունը, ուշագրավ փաստեր և այն, ինչը ձեր տարածքը յուրահատուկ է դարձնում։

Ընտրեք լուսանկարը և տեղեկությունը, որ ցանկանում եք կիսել՝ խմբագրելով ձեր պրոֆիլը։ Կարող եք նաև նկատել, որ հյուրընկալողի պրոֆիլի բաժիններն ունեն նոր ձևաչափ, ուստի համոզվեք, որ ձեր աշխատանքը, լեզուների իմացությունը և գտնվելու վայրը ճիշտ են նշված։

Խորհուրդներ հյուրընկալողի անձնագրի լավ լուսանկար ստանալու համար

«Սենյակներ» կատեգորիա

Գլխավոր էջի վերևում գտնվող «Սենյակներ» նոր կատեգորիայի միջոցով հյուրերը կարող են հեշտությամբ գտնել ձեր տարածքը։ Ձևափոխված որոնման զտիչի միջոցով կարելի է առանձին սենյակներից հեշտությամբ անցնել ամբողջ տների և ցանկացած տեսակի տարածքների։ Հյուրի ընտրած տարբերակի միջին գինը ցուցադրվում է զտիչի վրա։

Մայիսի 3-ից սկսած՝ ձեր տարածքը պետք է համապատասխանի այս բոլոր չափանիշներին՝ «Սենյակներ» կատեգորիայում ընդգրկվելու համար.

  • Հյուրն ունի առանձին ննջասենյակ (դուռը պարտադիր է)։

  • Հյուրը կարող է օգտվել առանձին կամ ընդհանուր լոգասենյակից։

  • Հյուրին հասանելի է առնվազն մեկ ընդհանուր տարածք՝ խոհանոց, հյուրասենյակ կամ հետնաբակ։

  • Հայտարարության մեջ նշված է հյուրընկալողների իսկական անունը, այլ ոչ ընկերության կամ այլ անուն։

  • Հայտարարության կարգավորումներում որպես հայտարարության կամ սենյակի տեսակ նշված է «Առանձին սենյակ»։

  • Առանձին սենյակը համօգտագործվող սենյակ, հյուրանոց, հանգստավայր, վրան, ավտոտուն, առանձին հարկաբաժին (օրինակ՝ բակային բունգալո) կամայս ցանկումնշված որևէ այլ տեսակի սեփականություն չէ։

Նոր չափանիշներին չհամապատասխանող հայտարարությունները որոնման արդյունքներում կամ հայտարարության էջերում չեն ցուցադրվի որպես առանձին սենյակներ։ Ընտրեք հայտարարության նոր տեսակ կամ թարմացրեք հայտարարությունը, որպեսզի այն համապատասխանի այս չափանիշներին։ Եթե ցանկանում եք, որ ձեր հայտարարությունն ավելացվի «Սենյակներ» կատեգորիայում, կամ հեռացվի այնտեղից, հայտ ուղարկեք համայնքի աջակցման թիմին։

Գաղտնիություն և հարմարավետություն

Առանձին սենյակ փնտրող հյուրերը կարևորում են մանրամասները, որոնք նրանց թույլ կտան հարմարավետ և ապահով զգալ։ Ակնկալիքներ ձևավորելու համար մենք այս տեղեկություններն ավելի բարձր ենք տեղափոխել ձեր հայտարարության էջում.

  • Արդյո՞ք ննջասենյակի դռան վրա կողպեք կա։ Հյուրերն ակնկալում են, որ կկարողանան կողպել դուռը։ Եթե առանձին սենյակը կողպեք չունի, տեղադրեք։

  • Լոգասենյակը մասնավո՞ր է, առանձին մուտքով անձնակա՞ն, թե՞ ընդհանուր։ Airbnb բոլոր հյուրերին անհրաժեշտ է լոգասենյակ, որն ունի լվացարան, զուգարան, ցնցուղ կամ լոգարան։ Այժմ հայտարարությունում կարող եք նշել, թե արդյոք լոգասենյակը ննջասենյակին կից անձնական է, առանձին մուտքով անձնական է (անձնական, բայց հասանելի համօգտագործվող տարածքով, օրինակ՝ միջանցքով), թե ընդհանուր է։

  • Ուրիշ ո՞վ կարող է լինել տարածքում։ Հյուրերն ուզում են իմանալ, թե արդյոք իրենց այցի ընթացքում տարածքում կլինեն այլ անձինք՝ այլ հյուրեր, ընտանիքի անդամներ կամ սենյակակիցներ։ Անախորժություններից խուսափելու համար նշեք, թե ով կարող է այնտեղ լինել։

  • Ինչպիսի՞ շփում ակնկալել։ Հյուրերին հաճախ դուր է գալիս ժամանակ անցկացնել հյուրընկալողների հետ և տեղացու աչքերով նայել այցելած վայրին։ Նշեք, թե որքան ժամանակ եք ցանկանում անցկացնել հյուրերի հետ։

Այս մանրամասները թարմացնելու համար անցեք հայտարարության «Սենյակներ և տարածքներ» բաժինը։

Airbnb սենյակները և հյուրընկալողների համար 25  թարմացումները կսկսեն գործել այս շաբաթ՝ Airbnb 2023 ամառային թողարկման շրջանակներում։

Airbnb
17 հնվ, 2024 թ.
Հոդվածն օգտակա՞ր էր։