Էկոլոգիապես պատասխանատու հյուրընկալողների համար նախատեսված ուղեցույց

Շրջակա միջավայրի նկատմամբ պատասխանատու հյուրընկալող լինելը լավ է ոչ միայն մոլորակի, այլև ձեր հյուրընկալման բիզնեսի համար։ 2019 թվականին էկոլոգիապես մաքուր տներում այցերի քանակը նախորդ տարվա համեմատ աճել է 141 տոկոսով*։

Որպեսզի օգնենք ձեզ դառնալ շրջակա միջավայրի հանդեպ պատասխանատու հյուրընկալող, փորձագիտական եզրակացություններ ստանալու համար սերտորեն համագործակցել ենք ՄԱԿ-ի բնապահպանական ծրագրի հետ, որը ՄԱԿ-ի շրջակա միջավայրի պահպանության հարցերով զբաղվող առաջատար մարմինն է, ինչպես նաև Բնության համաշխարհային հիմնադրամի հետ, որը բնության պահպանության առաջատար կազմակերպությունն է աշխարհում։ Մենք նաև խորհուրդներ ենք հավաքել ամբողջ աշխարհի հյուրընկալողներից, որոնք պարզ, բայց ազդեցիկ քայլեր են ձեռնարկել փոփոխություն մտցնելու համար։

Շարունակեք կարդալ, որպեսզի իմանաք, թե ինչպես կարող եք ստեղծել շրջակա միջավայրի համար ավելի անվնաս պայմաններ ձեր հյուրերի համար։

Ձեր տարածքն ավելի էներգաարդյունավետ դարձնելը կարող է նվազեցնել ձեր օգտագործած ռեսուրսների քանակը, ծախսերը և ածխաթթու գազի արտանետումները։ Ահա որոշ գաղափարներ՝ էներգիա խնայելու համար.

• Հիշեցրեք հյուրերին անջատել սարքերը, երբ դրանք չեն օգտագործվում։ Շարժական հեռախոսների օգտագործած էներգիայի մինչև 50%-ը** ստացվում է լիցքավորիչներից, որոնք միացված են վարդակից, երբ դրանք չեն օգտագործվում։
• Կարգավորեք ջրատաքացուցիչը։Ջրատաքացուցիչների ստանդարտ ջերմաստիճանը սովորաբար 60 աստիճան է ըստ Ցելսիուսի, բայց այն 48-54 աստիճանի իջեցնելը կօգնի խնայել էներգիա։
• Ստուգեք ձեր լամպերը։ Հնարավոր ամենացածր հզորությամբ լամպերի օգտագործումը կնվազեցնի ջերմության առաջացումը և էներգիայի սպառումը։ Էներգախնայող լամպերը, օրինակ՝ կոմպակտ լյումինեսցենտային և LED լամպերը, նաև ավելի քիչ էներգիա են սպառում և ավելի երկար են ծառայում**, քան շիկացման լամպերը։
• Պաշտպանեք ձեր տունը եղանակային պայմաններից։ Ջեռուցման և հովացման վրա գումար խնայելու համար հերմետիկացրեք դռներն ու պատուհանները։
• Գնեք ավտոմատացված կառավարման համակարգով սմարթ թերմոստատներ։ Wi-Fi-ի միջոցով կառավարվող թերմոստատները թույլ կտան կարգավորել ջերմաստիճանը՝ հաշվի առնելով հյուրերի ժամանումներն ու մեկնումները։ 
• Գնահատեք ձեր կենցաղային սարքերը։ Երբ գա նոր կենցաղային սարքեր գնելու ժամանակը, ընտրեք բարձր էներգաարդյունավետության վարկանիշ ունեցողները։

Բազմակի օգտագործման մաքրող պարագաները և համալրելի արտադրանքները շատերի համար հիանալի հնարավորություն են՝ նվազեցնելու շրջակա միջավայրի վրա իրենց ազդեցությունը։ Հաշվի առեք այս խորհուրդները.

• Հրաժարվեք միանգամյա օգտագործման մաքրող պարագաներից։ Ուելսի Փեմբրուկշիր շրջանում սուպերտանտեր Աննան խոհանոցում մեկանգամյա օգտագործման թղթե սրբիչների փոխարեն օգտագործում է լվացվող և բազմակի օգտագործման սպունգներ և մանրաթելային մաքրող կտորներ։
• Օգտագործեք վերամշակված թղթից պատրաստված ապրանքներ։ Թղթե արտադրանք ընտրելիս (օրինակ՝ դեմքի անձեռոցիկներ կամ զուգարանի թուղթ) ընտրեք այնպիսի տարբերակներ, որոնք պատրաստված են 100% վերամշակված նյութերից։
• Կրճատեք ագրեսիվ քիմիական նյութերի օգտագործումը։ Գնեք սպասք լվանալու հեղուկ, լվացքի մեքենայի ախտահանիչ միջոց և հիգիենայի պարագաներ, որոնք թունավոր չեն կամ քիչ թունավոր են, բնական են կամ կենսաքայքայվող։ Ֆրանսիայի Բորդո քաղաքում սուպերտանտեր Պասկալը օրգանական լոգանքի և մարմնի խնամքի միջոցներ է գնում տեղական խանութներից։
• Անցեք օրգանական գործվածքների։ Երբ գա անկողնային պարագաներն ու սրբիչները փոխարինելու ժամանակը, փորձեք ընտրել օրգանական գործվածքներից պատրաստված արտադրանք։ Սա կօգնի ձեզ խուսափել մարդկանց և շրջակա միջավայրի համար վնասակար թունաքիմիկատների, միջատասպանների և այլ թունավոր նյութերի հետ շփումից։

Քանի որ մաքուր քաղցրահամ ջուրը սահմանափակ ռեսուրս է, կարևոր է, որ դուք և ձեր հյուրերն այն օգտագործեք խելամտորեն՝ հատկապես այն պատճառով, որ կլիմայական ճգնաժամը նպաստում է ավելի հաճախակի երաշտներին։ Ահա ջուր խնայելու մի քանի օգտակար եղանակներ.

• Հիշեցումներ թողեք հյուրերի համար. Ցնցուղի տակ անցկացրած ժամանակը մեկ րոպեով կրճատելով՝ կարող եք խնայել ավելի քան 4 լիտր ջուր։** Իտալիայի Միլան քաղաքում սուպերտանտեր Անտոնելլան հիշեցումներ է փակցրել ծորակների մոտ՝ հյուրերին ատամները լվանալիս ջուրը փակելու մասին հիշեցնելու համար։ Կարող եք նաև հորդորել հյուրերին կրճատել ցնցուղ ընդունելու ժամանակը։
• Ստուգեք արտահոսքերի առկայությունը։ Զուգարանների, լվացարանների, լոգարանների և ջուր օգտագործող սարքերի շրջակայքը պարբերաբար զննելը կօգնի հայտնաբերել արտահոսքերը։ Խելացի ջրաչափի միջոցով կարող եք վերահսկել, թե որքան ջուր եք օգտագործում, և ստանալ ծանուցումներ անսովոր օգտագործման դեպքում, օրինակ՝ եթե մոռանաք խոհանոցում փակել ծորակը, կամ երբ ամանալվաց մեքենան արտահոսք ունենա։
• Օգտագործեք էներգաարդյունավետ կարգավորումներ և սարքեր։ Լվացքի և ամանալվաց մեքենաները շատ ջուր են սպառում։ Եթե դրանք առկա են ձեր տարածքում, հյուրերին հորդորեք օգտագործել արագ լվացքի կամ էկո կարգավորումները։ Իսկ երբ մեքենան փոխելու ժամանակը գա, ընտրեք էներգաարդյունավետ մոդել, որն ավելի քիչ ջուր է օգտագործում։
• Տեղադրեք ջրի հոսքի նվազեցման հարմարանքներ։ Դուք կարող եք նաև փոփոխություններ կատարել՝ տեղադրելով ջրի հոսքը նվազեցնող ծորակներ և ցածր հոսքով կամ ջրահեռացման երկու տեսակով զուգարանակոնքեր։ Ավստրալիայի Թասմանիա նահանգում սուպերտանտեր Մերիդիթը ցնցուղի հատուկ գլխիկ է օգտագործում, որը նվազեցնում է ջրի հոսքը՝ միևնույն ժամանակ պահպանելով բարձր ճնշումը։

*Հիմնված է Airbnb-ի՝ 2018 թվականի օգոստոսից մինչև 2019 թվականի օգոստոսն ընկած ժամանակահատվածում հայտարարությունների վերնագրերում և նկարագրություններում ներառված որոշակի հիմնաբառերով (էկոլոգիապես մաքուր, էկոլոգիական և այլն) հայտարարություններ ամրագրած հյուրերի թվի՝ տարեկան համեմատությամբ աճի վերաբերյալ ներքին տվյալների վրա

**Բնության համաշխարհային հիմնադրամի 60 գործողություն՝ ի բարօրություն Մոլորակի աշխատությունից, որը հրապարակվել է 2021 թ․ մարտի 5-ին

Այս հոդվածում պարունակվող տեղեկությունները կարող են փոխված լինել հրապարակումից հետո։