Ինչպես է սուպերտանտերերից մեկն ավելի խնամքով վերաբերվում էկոհամակարգին

«Շրջակա միջավայրի համար անվնաս» արտահայտությունն առաջին հայացքից վախեցնող է թվում։ Սակայն իրականում այդպես չէ։

Ես պարզապես յուրացրել եմ առօրյա գործելակերպեր, և ցանկացած մարդ կարող է հետևել իմ օրինակին։ Պարարտանյութի օգտագործումը շրջակա միջավայրի համար օգտակար է, որի մասին հավանաբար շատերն են մտածել։ Եթե կարողանաք դա անել, հիանալի կլինի։ Բայց ես դա չեմ անում։ Կան սպառումը կրճատելու, իրերը կրկին օգտագործելու և վերամշակելու շատ հեշտ և շահավետ եղանակներ։

Չորանոցի բազմակի օգտագործման գնդիկներն ամեն անգամ 10-15 րոպե խնայում են։ Դա շատ կարևոր է, երբ ամրագրումները հետևում են մեկը մյուսին։ Դրանք ոչ միայն նվազեցնում են էներգիայի ծախսը, այլև էկոլոգիապես ավելի մաքուր են, քան միանգամյա օգտագործման չորացման անձեռոցիկները։ Ե՛վ մեկը, և՛ մյուսը խնայում են ձեր գումարը։

Ես վինտաժային շատ իրեր ունեմ։ Ինչո՞ւ գնել զանգվածային արտադրության նոր ապրանք, եթե ունեմ եզակի իրեր, որոնք ավելի լավ են պատրաստված և հիանալի որակ ունեն։ Աթոռի բարձիկը վերականգնելը կամ արդեն երկար ժամանակ ավտոտնակի անպետք իրերի շարքում նետված լամպի լուսամփոփը փոխելը հաճախ կարող է բավարար լինել։

Մենք ապրում ենք գյուղում, և ես շատ եմ սիրում հյուրերին նվիրել տեղի ֆերմերների աճեցրած մրգեր ու բանջարեղեններ։ Դրանով աջակցում ենք մեր համայնքին և նվազեցնում ածխաթթու գազի արտանետումը, քանի որ գնումները կատարում ենք հենց տեղում։ Բացի այդ, մեր հյուրերը ծանոթանում են այն առատությանը, որն առաջարկում է Օքսնարդը։

Մեր լողափնյա տնակն ընդամենը երկու թաղամաս է հեռու գյուղատնտեսական շուկայից, իսկ կրպակներից ընդամենը հինգ րոպեի ճանապարհ է մեքենայով, ուստի ես բազմակի օգտագործման պայուսակներ եմ տրամադրում հյուրերին գնումների համար։

Լավագույն գնահատականներ ստացող մաքուր լողափից ընդամենը 50 քայլ ենք հեռու։ Ցավոք, հանգստացողներն ավելի ու ավելի հաճախ են աղբը թողնում լողափում, ինչն արդյունքում աղտոտում է օվկիանոսը։ Ես ուզում եմ վստահ լինել, որ իմ տանը մնացող մարդիկ այդպես չեն վարվի։ Այդ պատճառով մենք տրամադրում ենք բազմակի օգտագործման բաժակներ և տարաներ։

Շատ հյուրընկալողներ փորձում են աչքի ընկնել՝ հյուրերին գինի առաջարկելով, իսկ ես կարծում եմ, որ շրջակա միջավայրի համար անվնաս հյուրընկալումը ևս աչքի ընկնելու լավ միջոց է։ Շրջակա միջավայրի համար անվնաս հյուրընկալության սկզբունքները ոչ միայն նպաստավոր են մոլորակի համար, այլև կարող են օրինակ ծառայել հյուրերի համար։

Մենք փորձում ենք խելամտորեն գործել։ Թղթե սրբիչներն աստիճանաբար փոխարինում ենք կտորից սրբիչներով, սակայն լիովին չենք բացառում առաջինները, որպեսզի հյուրերն ընտրության հնարավորություն ունենան։ Այդուհանդերձ, օգտագործում ենք բամբուկից, վերամշակված թղթից կամ PEFC-ի կողմից հավաստագրված թղթից պատրաստված թղթե սրբիչներ և զուգարանի թուղթ։

Էկոլոգիապես անվնաս աղբի տոպրակները տեսականորեն հիանալի են, սակայն իմ փորձը ցույց է տվել, որ դրանք արտահոսում և պատռվում են։ Ես չեմ կարող դրանք օգտագործել հյուրերի համար, քանի որ չգիտեմ, թե ինչ են նրանք թափում։ Մեր խոհանոցը երրորդ հարկում է, և ես չէի ցանկանա, որ աղբի պարկը պատռվեր նախքան հյուրն այն կհասցներ առաջին հարկում գտնվող աղբարկղ։ Կենսաքայքայվող աղբի տոպրակներն իմ դեպքում հարմար չեն, սակայն հիանալի կլինի, եթե ձեզ պետք գան։

Հյուրերը հաճախ են թողնում սննդի չբացված տուփեր, որոնք կարելի է նվիրաբերել տեղական բարեգործական կազմակերպություններին։ Սա այդ սննդի կարիքն ունեցողներին օգնելու հեշտ միջոց է։ Այո, սնունդը պետք է անձամբ հասցնեք բարեգործական կազմակերպություն, բայց դրանով բարի գործ կանեք։

Նպատակ ունեմ այս տարի իմ ինստագրամյան հետևորդներին ցույց տալ, որ ամեն ինչ հնարավոր է անել, և դա կարող է նաև շրջակա միջավայրի համար անվնաս լինել։ Հույս ունենք, որ նոր հյուրերը կգնահատեն էկոլոգիապես անվնաս գործունեություն ծավալելու մեր սկզբունքները, իսկ մեզ հետևող տանտերերը կգիտակցեն, որ այս գաղափարները կյանքի կոչելը դրականորեն կազդի իրենց կենցաղի վրա։

ԱՌԱՋ․ Ինչպես են Airbnb-ի հյուրընկալողներին իրենց տներն ավելի անվնաս դարձնում շրջակա միջավայրի համար

Այս հոդվածի տեղեկությունները կարող են փոխված լինել հրապարակումից հետո։