Ապահովեք տարածքի մաքրությունը
Մաքուր տարածք առաջարկելը հինգ աստղանի հյուրընկալության ամենակարևոր բաղադրիչն է։ Հյուրընկալողների համար սահմանված հիմնական կանոնների համաձայն՝ Airbnb-ում առաջարկվող բոլոր տարածքները պետք է հյուրերի ժամանման պահին լինեն մաքուր և առողջությանը սպառնացող վտանգներից զերծ։ Առավել մեծ հաջողությունների կհասնեն այն հյուրընկալողները, որոնք ունեն մաքրման հուսալի ռազմավարություն։
Ստեղծեք մաքրման ռազմավարություն
Անկախ այն բանից՝ ինքներդ եք անում գործը, թե հավաքարար եք վարձում, կարևոր է, որ ձեր տարածքն ամեն անգամ մանրազնին մաքրվի յուրաքանչյուր հյուրից հետո։
Եթե հյուրերը լոգարանում մազեր կամ լվացարանում կեղտոտ սպասք են գտնում, նրանց այցը խաթարվում է։ Դա կարող է նրանց համար հիմք դառնալ վատ կարծիք գրելու կամ նույնիսկ կրճատելու իրենց այցի տևողությունը։
Եթե հավաքարար եք վարձում, մեկ անգամ ինքներդ կատարեք մաքրման ամբողջ գործընթացը, որպեսզի ճշգրտորեն իմանաք, թե ինչ պետք է արվի։ Բծախնդիր աշխատանքի համար անպայման բավարար ժամանակ նախատեսեք ամրագրումների միջև։ Գտեք երկրորդ հավաքարարի կամ ունեցեք այլ պահեստային պլան, եթե ձեր հավաքարարը չկարողանա մաքրություն անել մեկ օրում։
Պլան կազմելիս փորձեք այլ հյուրընկալողների հետևյալ խորհուրդները․
- Նախ՝ հանեք անկողնային սպիտակեղենը և սկսեք բեռնել լվացքի մեքենան, որպեսզի բավականաչափ ժամանակ ունենաք անհրաժեշտության դեպքում մի քանի լվացք անելու։
- Մաքրեք և փոշուց սրբեք բոլոր մակերևույթները՝ հատուկ ուշադրություն դարձնելով այն մակերևույթներին, որոնց հաճախ են դիպչում (օրինակ՝ հեռակառավարման վահանակներին և դռների բռնակներին)։
- Հարդարեք անկողինները, փոխեք սրբիչները, վերադասավորեք դեկորատիվ ծածկոցներն ու բարձերը և օգտագործեք կպչուն ժապավենով հոլովակ կամ այլ անհրաժեշտ գործիք։
- Մաքրելիս բացեք պատուհանները թարմ օդի համար, եթե եղանակը թույլ է տալիս։
- Եվ վերջում՝ ավլեք ու խոնավ շորով մաքրեք հատակները՝ փոշին կամ կեղտի մնացորդները հավաքելու համար։
Հետևեք մաքրման այս ստուգացանկին
- Բոլոր մակերևույթները փոշուց սրբված և մաքրված են։
- Բոլոր հատակները փոշեծծված կամ ավլված ու խոնավ շորով սրբված են։
- Բոլոր տարածքները զերծ են փայտոջիլներից, վնասատուներից, սարդոստայններից, բորբոսից և բծերից։
- Անկողնային սպիտակեղենն ու բոլոր սրբիչները մաքուր են, թարմ և առանց կեղտաբծերի։
- Բոլոր անկողինները հարդարված են, փափկեցված և կպչուն գլանակով մաքրված։
- Բոլոր զուգարանները, լվացարանները, ցնցուղարանները և լոգարանները մաքրված և ախտահանված են։
- Շամպունների, մարմնի գելերի, ձեռքի կամ սպասքի օճառների պաշարները համալրված են։
- Բոլոր անձնական իրերը պահվում են տեսադաշտից դուրս։
- Բոլոր ամանները, կաթսայեղենը և խոհանոցային պարագաները մաքուր են և իրենց տեղերում դրված։
- Ամբողջ խոհանոցային տեխնիկան, այդ թվում՝ սառնարանը, սալօջախը և ջեռոցը, մաքուր է և օգտագործման համար պատրաստ։ Սառնարանում սննդի մնացորդներ չկան։
- Ամբողջ աղբը թափված է։
- Տարածքի հոտը թարմ և մաքուր է։