Անցեք առաջ՝ առաջարկվող արդյունքներին ծանոթանալու համար

    Ընդհանուր գնի ցուցադրում և մեկնման վերաբերյալ պահանջների պարզեցում

    Հյուրերը շուտով նախապես կտեսնեն ընդհանուր գինը և մեկնման պահանջը։
    Հեղինակ՝ Airbnb, ամսաթիվ՝ 7 նոյ, 2022 թ.
    3 րոպե ընթերցում
    Թարմացվել է՝ 7 նոյ, 2022 թ.

    Հավանաբար տեսել եք հյուրերի աճող դժգոհությունների մասին վերնագրեր և թվիթներ՝ կապված գների, մաքրման վճարների և մեկնման վերաբերյալ ցուցումների հետ։ Գնաճի և հավանական ռեցեսիայի պայմաններում ճանապարհորդներն ավելի ձեռնտու տարբերակներ են փնտրում։ Մենք նաև լսել ենք հյուրերից, որոնցից շատերը վերջին տարիների ընթացքում առաջին անգամ են ճանապարհորդում, որ ուղևորությունները տնային գործերով ավարտելը սթրեսային է։

    Այս խնդիրները պետք է միասին լուծենք։ Այսօր մենք հայտարարում ենք հետևյալ թարմացումների մասին․ ընդհանուր գինը կցուցադրվի նախապես, որոնման արդյունքներում առաջ կմղվեն ավելի լավ գին/որակ հարաբերակցություն ունեցող հայտարարությունները, կհեշտացվի հյուրընկալողների գնանշման գործիքների օգտագործումը, և հյուրերի համար կբարելավվի մեկնման հետ կապված փորձառությունը։

    Ընդհանուր գնի ցուցադրում

    Ներկայումս, երբ հյուրերը մնալու տեղ են փնտրում Airbnb-ում, վճարման պահին վերջնական գինը կարող է սպասվածից ավելի բարձր լինել, քանի որ նրանց տեսած մեկ գիշերվա գինը վճարներ չի ներառում։ Սա կարող է հանգեցնել դժգոհության և վստահության կորստի։

    Հաջորդ ամսից սկսած՝ հյուրերը հնարավորություն կունենան նախապես դիտելու վճարման ենթակա ընդհանուր գինը՝ ներառյալ բոլոր վճարները նախքան հարկումը։ Երբ հյուրերն ակտիվացնեն այս տարբերակը, ընդհանուր գինը կտեսնեն որոնման արդյունքներում, ինչպես նաև քարտեզի վրա, գների զտիչում և հայտարարության էջում։ Հյուրերը կարող են ամրագրումը հաստատելուց առաջ դիտել գնի ամբողջական մանրամասները, որտեղ երևում են Airbnb-ի սպասարկման վճարը, զեղչերը և հարկերը։

    Ընդհանուր գնի ցուցադրումն ըստ կանխադրման անջատված է։ Այն հյուրերը, որոնք չեն միացնի ընդհանուր գնի ցուցադրման տարբերակը, կշարունակեն օգտվել գների դիտման ընթացիկ կարգից։ Այս տարբերակը չի կիրառվի այն երկրներում և տարածաշրջաններում, որտեղ տեղական օրենսդրությունն արդեն իսկ պահանջում է ընդհանուր գների նախապես ցուցադրում՝ ներառյալ հարկերը։

    Դիրքը որոնման արդյունքներում

    Airbnb-ի որոնման արդյունքների դասավորության ալգորիթմը նախատեսված է հյուրերին օգնելու համար, որպեսզի նրանք արագ գտնեն իրենց կարիքները բավարարող տարածքներ։ Ալգորիթմն առաջնահերթորեն հաշվի է առնում ընդհանուր գինը՝ մեկ գիշերվա գնի փոխարեն, և տարածքի որակը՝ տարածաշրջանում նմանատիպ տարածքների համեմատ։ Տվյալ տարածաշրջանում լավագույն գին/որակ հարաբերակցություն առաջարկող տները, որպես կանոն, որոնման արդյունքներում ավելի բարձր դիրքեր են զբաղեցնում։

    Հյուրերն ավելի ու ավելի զգայուն են դառնում գների նկատմամբ, քանի որ ձգտում են խնայել։ Մրցակցային ընդհանուր գնի սահմանումը և բարձր որակի պահպանումը կարող են նպաստել որոնման արդյունքներում հայտարարության դիրքի բարելավմանը։

    Գնանշման գործիքներ

    Ըստ հյուրընկալողների` ամենադժվար խնդիրներից են` իմանալ, թե ինչ գին են վճարում հյուրերը, և ինչպես մրցունակ գին սահմանել։ Սկսած 2023 թվականի սկզբից՝ կներկայացնենք նոր գործիքներ, որոնք կօգնեն ավելի արդյունավետորեն որոշել գինը։ Մինչ այդ, կարող են օգտակար լինել գնանշման այս գործիքները․

    • Գնի նախադիտումը թույլ է տալիս տեսնել, թե ինչ վերջնական գին են վճարելու հյուրերը՝ ներառյալ վճարները, զեղչերը, հատուկ առաջարկները և հարկերը։ Այս գործիքից օգտվելու համար բացեք գնանշման կարգավորումները և ընտրեք «Նախադիտել, թե ինչ են վճարում հյուրերը»։ Մուտքագրեք այցի մանրամասները, օրինակ՝ ամրագրման մեջ նշված հյուրերի թիվը և գիշերների քանակը, և կցուցադրվեն հյուրի համար ընդհանուր գնի և ձեր վերջնավճարի մանրամասները։
    • Շաբաթական և ամսական զեղչերը հաճախ հանգեցնում են ավելի մեծ զբաղվածության, ավելի քիչ հերթափոխումների և ձեզ համար ավելի քիչ աշխատանքի։ Փորձեք խրախուսել հյուրերին՝ երկարատև այցերի համար զեղչեր առաջարկելով։
    • Խելացի գնանշումը կարող է օգնել որոշ չափով հասկանալի դարձնել, թե ինչպես կարելի է մրցունակ գին սահմանել։ Airbnb-ի Խելացի գնանշման գործիքը հաշվի է առնում ավելի քան 70 տարբեր գործոններ՝ ձեր օրացույցում առկա յուրաքանչյուր ազատ ամսաթվի համար լավագույն գինը որոշելու համար։

    Մեկնման վերաբերյալ ցուցումներ

    Մենք հասկանում ենք, որ տարածքը հաջորդ հյուրերի համար նախապատրաստելը շատ ժամանակ և ջանքեր է պահանջում, հատկապես, երբ հերթափոխումների միջև ժամկետները սեղմ են։ Ողջամիտ է հյուրերին խնդրել մեկնելիս անել պարզ գործողություններ, օրինակ՝ անջատել լույսերը, սնունդը նետել աղբարկղը և փակել դռներն ու պատուհանները։

    Հյուրերից նաև իմանում ենք, որ նրանք չեն ցանկանում կատարել անհեթեթ տնային գործեր, օրինակ՝ հանել անկողնային սպիտակեղենը, լվացք անել և փոշեկուլով մաքրել տարածքը։

    Առաջիկա ամիսներին մենք կաշխատենք ձեզ հետ, որպեսզի մեկնման վերաբերյալ պահանջներն ավելի թափանցիկ լինեն հյուրերի համար։ Հյուրերը կկարողանան նախքան ամրագրելը ծանոթանալ մեկնման վերաբերյալ ցուցումներին, ինչպես տան կանոնների դեպքում, ու նաև կարծիք թողնել մեկնման փորձառության մասին։

    Այս հոդվածում պարունակվող տեղեկությունները կարող են փոխված լինել հրապարակումից հետո։

    Airbnb
    7 նոյ, 2022 թ.
    Հոդվածն օգտակա՞ր էր։

    Միգուցե հավանեք նաև

    Միգուցե հավանեք նաև

    Ուսումնասիրեք ավելի շատ թեմաներ