Այժմ Airbnb-ն առաջարկում է շատ ավելին

Անցյալ տարի մենք ընդլայնեցինք Airbnb-ի շրջանակները՝ ոչ միայն առաջարկելով տներ, այլև գործարկելով Airbnb փորձառություններ և Airbnb սերվիսներ։ Առաջին անգամ հյուրերը կարող էին մնալու տեղ ամրագրել, տեղացու հետ ուսումնասիրել քաղաքը և օգտվել անհատական շեֆ խոհարարի ծառայությունից, և այդ ամենը՝ Airbnb-ում։ Այդ ժամանակից ի վեր՝ ամբողջ աշխարհում միլիոնավոր մարդիկ հենց դա են արել։

Այս ամառ մենք ավելի հեռուն ենք գնում։ Մենք ավելացնում ենք սերվիսների նոր կատեգորիաներ, որոնք կհեշտացնեն ուղևորության յուրաքանչյուր մաս, և նոր փորձառություններ, որոնք կարելի է գտնել միայն Airbnb-ում, այդ թվում՝ բացառիկ մուտք դեպի FIFA-ի աշխարհի 2026 թ․ առաջնություն։ Մենք նաև բուտիկ-հյուրանոցներ և անկախ հյուրանոցներ ենք ներկայացնում Airbnb-ում։ Եվ թարմացնում ենք հավելվածը՝ ավելացնելով արհեստական բանականությամբ աշխատող գործիքներ, որոնք հյուրերին կօգնեն գտնել կատարյալ մնալու տեղ, պլանավորել ուղևորություն և օգնություն ստանալ անհրաժեշտ պահին։

«Ճամփորդությունը պետք է լինի ոչ միայն հարմարավետ։ Նաև պետք է լինի բովանդակալից։ Լավագույն ուղևորություններն օգնում են ուսումնասիրել, սովորել և տուն վերադառնալ մի փոքր այլ մարդ դարձած, քան կայիք մեկնելու պահին։ Ահա թե ինչ ենք ստեղծում Airbnb-ում։ Եվ այս ամառ մենք մարդկանց տալիս ենք դա անելու համար ավելի շատ հնարավորություններ՝ սկսած անհավանական մնալու տեղերից և բուտիկ-հյուրանոցներից, որոնք հաղորդում են Airbnb տարածքում լինելու զգացողություն, մինչև աշխարհի առաջնության անմոռանալի փորձառություններ և սերվիսներ, որոնք հեշտացնում են ձեր ուղևորությունը»,– ասում է Airbnb-ի համահիմնադիր և գլխավոր գործադիր տնօրեն Բրայան Չեսկին։

Հենց որ հյուրերը բացեն հավելվածը, ամեն ինչ կգտնեն նոր գլխավոր էջում։ Մենք նաև հեշտացրել ենք հիանալի հայտարարություններ գտնելը և ընկերների ու ընտանիքի հետ ուղևորություններ պլանավորելը։

• Կարծիքների առանձնացում ԱԲ-ի միջոցով – Airbnb-ն ունի հյուրերի և հյուրընկալողների ավելի քան 1 միլիարդ կարծիք։ Այժմ հյուրերը ստիպված չեն նախքան ամրագրելը կարդալ դրանք բոլորը։ Մեր մոդելներն ընդհանրացնում են յուրաքանչյուր տարածքի վերաբերյալ կարծիքներն ու առանձնացնում ամենակարևոր բաները՝ ներառյալ գտնվելու վայրը, հարմարությունները, աղմուկը, ընտանիքի համար հարմար լինելը և այլն։
• Համեմատում ԱԲ-ի միջոցով – Երբ հյուրերը տներ պահեն ընտրանիում, մենք նրանց կօգնենք ընտրել իրենց ուղևորության համար հարմար տունը։ Համեմատության նոր դիտակերպը տրամադրում է ԱԲ-ով ստեղծված ամփոփագիր յուրաքանչյուր տան համար՝ ներկայացնելով գտնվելու վայրը, լավագույն հարմարությունները և այլն։ Հասանելի կլինի այս տարվա երկրորդ կեսին։
• Ընդհանուր ուղեպլան – Մենք հեշտացնում ենք խմբով ուղևորության պլանավորումը։ «Ուղևորություններ» ներդիրում նոր քարտեզը ցույց է տալիս հյուրերի ամրագրած տները, ինչպես նաև ռեստորաններ, փորձառություններ և զբաղմունքներ մոտակայքում։ Նաև նշված է տնից մինչև այդ վայրերը հասնելու ժամանակը։ Նրանք կարող են պահել այն վայրերը, ուր ցանկանում են այցելել, կամ դրանք ուղղակիորեն ավելացնել ընդհանուր ուղեպլանի մեջ, որպեսզի բոլորը կարողանան միասին պլանավորել։
• Կոնտակտներ և ճանապարհորդական քարտեզ – Ճանապարհորդության վերաբերյալ լավագույն խորհուրդները ստանում եք վստահելի մարդկանցից։ Հյուրերը կարող են ընկերներին և ընտանիքին ավելացնել որպես կոնտակտների, այնուհետև օգտագործել նոր ճամփորդական քարտեզը՝ տեսնելու, թե որտեղ են եղել Airbnb-ի միջոցով և ուր են գնալու հաջորդ անգամ։ Ցանկացած ուղևորության հպելիս երևում են նրանց ամրագրումները և թողած կարծիքները։ Նրանք նույնիսկ կարող են խորհուրդներ ստանալու համար հաղորդագրություն ուղարկել անմիջապես իրենց կոնտակտներին։ Հասանելի կլինի ավելի ուշ այս ամառ։
• Հաճախորդների աջակցում ԱԲ-ի միջոցով․ հասանելի է ամբողջ աշխարհում – Եթե հյուրերին օգնություն է հարկավոր այցի ընթացքում, կարող են դիմել մեր ԱԲ օգնականին, որն արհեստական բանականության միջոցով աջակցություն տրամադրող լավագույն օգնականն է ճանապարհորդության ոլորտում։¹ Այժմ հասանելի է 11 լեզվով։ Օգնականը գիտի հյուրերի ուղևորության մանրամասները և ներառում է ինտերակտիվ քարտեր, որոնք հյուրերին թույլ են տալիս խնդիրները լուծել անմիջապես զրույցում։² Այս տարվա երկրորդ կեսին ԱԲ օգնականը կունենա նաև ձայնով հաղորդակցվելու տարբերակ, որպեսզի հյուրերը կարողանան արագ պատասխաններ ստանալ զանգահարելիս։

Փորձառություններն ու սերվիսներն այժմ ներկայացված են Airbnb-ի ավելի շատ բաժիններում։ Փորձեք այս խորհուրդները, որպեսզի ձեր հայտարարությունը հայտնվի նոր գլխավոր էջում և «Ուղևորություններ» ներդիրում։

• Տարածքի մասին մանրամասներ – Համոզվեք, որ ձեր հայտարարությունն ամբողջական է և ունի բավարար քանակությամբ բարձրորակ լուսանկարներ, որոնք ցույց են տալիս, թե ինչով է այն առանձնահատուկ։
• Օրացույց – Հնարավորինս շուտ հասանելի դարձրեք բոլոր ամսաթվերն ու ժամերը, երբ կարող եք հյուրընկալել։
• Գնանշում – Մտածեք հնարավորինս շատ զեղչեր ավելացնելու մասին, որպեսզի կարողանաք առաջարկել լավագույն գին/որակ հարաբերակցությունը։

Հիանալի այցը սկսվում է հյուրերի ժամանումից առաջ։ Ահա թե ինչու ենք սերվիսներ ավելացնում նրանց ուղևորության յուրաքանչյուր մասի համար՝ օդանավի վայրէջքից մինչև մեկնումը։ Սա միայն սկիզբն է այն նոր սերվիսների, որոնք հյուրերն այս տարի կարող են ամրագրել Airbnb-ում։

• Մթերքների առաքում – Հյուրերը կարող են Airbnb-ի միջոցով մթերքներ պատվիրել Instacart-ից ԱՄՆ-ի 25-ից ավելի քաղաքներում և ստանալ ապրանքները ժամանումից հետո կամ իրենց այցի ընթացքում։ Որոշ վայրերում դուք նույնիսկ կարող եք ստանալ հյուրի պատվերը և նախապես համալրել խոհանոցի պաշարները նախքան նրա ժամանումը։ Airbnb հյուրերը ստանում են անվճար առաքում և 10 ԱՄՆ դոլարի զեղչ առնվազն 50 ԱՄՆ դոլար արժողությամբ պատվերի համար։³
• Տեղափոխում օդանավակայանից – Հյուրերը կարող են Welcome Pickups-ի միջոցով ամրագրել ավտոմեքենայով անհատական փոխադրման ծառայություն մինչև ձեր տուն և ձեր տնից։ Վարորդը հետևում է հյուրերի թռիչքին և ժամանելուն պես նրանց դիմավորում է մայթեզրին։ Airbnb հյուրերը ստանում են 20% զեղչ յուրաքանչյուր ուղևորության համար։⁴ Այժմ հասանելի է աշխարհի ավելի քան 160 քաղաքներում։
• Ուղեբեռի պահասենյակ – Հյուրերը կարող են պահ տալ իրենց ճամպրուկները ժամանումից առաջ կամ մեկնումից հետո՝ օգտվելով Bounce-ի հետ մեր համագործակցությունից։ Նրանք կարող են հավելվածում դիտել ուղեբեռը պահ տալու կետերը և տեսնել, թե որքան հեռու են դրանք ձեր տնից։ Airbnb հյուրերը ստանում են 15% զեղչ⁵ և մուտք դեպի ավելի քան 15 000 վայր 175 քաղաքում։
• Ավտոմեքենաների վարձույթ. Airbnb հյուրերի գրեթե մեկ քառորդը մեքենա է վարձում իր այցի ընթացքում։⁶ Այս ամառվանից սկսած՝ նրանք կարող են վարձով մեքենաներ գտնել անմիջապես հավելվածում։ Մենք ցույց կտանք ձեր տան մոտակայքում գտնվող մեքենաները և կառաջարկենք նրանց խմբի համար հարմար մեքենա։ Երբ նրանք առաջին անգամ մեքենա վարձեն Airbnb-ում, կստանան 20% բոնուս՝ իրենց հաջորդ այցի, փորձառության կամ որոշ սերվիսների համար։

Հյուրերը սիրում են Airbnb փորձառությունները՝ դրանք միջին հաշվով գնահատելով 4,93 աստղ՝ 5-ից։⁷ Այս ամառ մենք ավելացնում ենք հազարավոր այլ փորձառություններ, որոնք կազմակերպում են տեղացի մասնագետները այն կատեգորիաներում, որոնք ճանապարհորդները ամենաշատն են ցանկանում՝ տեսարժան վայրեր, գաստրոնոմիական մշակույթ և միջոցառումներ։

• Տեսարժան վայրեր՝ Airbnb-ի ոճով – Ճանապարհորդների ավելի քան 75%-ը նոր քաղաք ուղևորվելիս այցելում է տեսարժան վայր։⁸ Այժմ նրանք կարող են տեսնել աշխարհի ամենահայտնի վայրերը տեղացի մասնագետների հետ, որոնք հինգ մատի պես գիտեն դրանք։ Այժմ ունենք ավելի քան 3 000 փորձառություն «Տեսարժան վայրեր» կատեգորիայում՝ Լոնդոնի Թաուերից մինչև Տոկիոյի «Երկնային ծառ» հեռուստաաշտարակ և Թաջ Մահալ։
• Գաստրոնոմիական մշակույթ – Մենք առաջարկում ենք 2500-ից ավելի փորձառություններ, որոնք հնարավորություն են տալիս «կուլիսներում» ծանոթանալու շեֆ խոհարարների հետ, այցելելու շուկաներ և ծանոթանալու տվյալ վայրին բնորոշ գաստրոնոմիական մշակույթին։ Շնորհիվ Chef's Table-ի և Grand Central Market-ի հետ համագործակցության՝ հյուրերը կարող են միանալ Միշլենի աստղակիր Pascucci al Porticciolo ռեստորանի խոհարար Ջանֆրանկո Պասկուչիին Հռոմում՝ վայելելու 6 ուտեստից բացկացած ընթրիք և ընտրելու համապատասխան գինիներ, կամ կոկտեյլներ պատրաստել Փարիզի De Vie բարում, որն աշխարհի լավագույն բարերից է։
• FIFA-ի աշխարհի առաջնություն 2026 թ․ – Մենք առաջարկում ենք անկրկնելի փորձառություններ FIFA-ի աշխարհի առաջնությունն ընդունող 6 քաղաքում։ Միացեք աշխարհի առաջնության չեմպիոններ Էբբի Ուոմբակին և Ջուլի Ֆաուդիին Լոս Անջելեսում մտերմիկ միջավայրում ԱՄՆ-Ավստրալիա խաղի դիտման համար։ Կամ դուրս եկեք խաղադաշտ և մարզվեք Արգենտինայի ֆուտբոլի լեգենդ և «Ինտեր Մայամիի» նախկին մարզիչ Խավիեր Մասկերանոյի հետ։

Որոշ ուղևորությունների համար, օրինակ՝ քաղաքում գիշերային զբոսանքի կամ վերջին պահին գործարար ուղևորության դեպքում, հյուրանոցը կարող է ճիշտ ընտրություն լինել։ Ահա թե ինչու ենք այս ամառ ավելի շատ բուտիկ-հյուրանոցներ և անկախ հյուրանոցներ ներկայացնում Airbnb-ում։

Հյուրերը կարող են գտնել ապշեցուցիչ հյուրանոցներ ամբողջ աշխարհի 20 լավագույն վայրերում, այդ թվում՝ Նյու Յորքում, Փարիզում, Լոնդոնում, Մադրիդում, Հռոմում և Սինգապուրում, իսկ տարվա ընթացքում կավելանան նաև այլ քաղաքներ։ Յուրաքանչյուր հյուրանոց ընտրվում է՝ հաշվի առնելով դրա տեղադրությունը թաղամասում, դիզայնը և հյուրընկալության մակարդակը։

• Հյուրանոցներ, որոնք հաղորդում են Airbnb տարածքում լինելու զգացողություն – Հյուրերը կարող են գտնել և ամրագրել հյուրանոցներ աշխարհի լավագույն թաղամասերում։ Յուրաքանչյուր սեփականություն ընտրվում է Airbnb-ի կողմից․ ոչ մի խոշոր ցանց։ 
• Ամրագրեք հյուրանոց, ստացեք բոնուս Airbnb-ում – Առաջարկվող հյուրանոց ամրագրող հյուրերը կարող են ստանալ մինչև 15% բոնուս իրենց հաջորդ Airbnb տան համար։⁹ Այսօր հասանելի է աշխարհի խոշոր քաղաքներում․ շուտով կլինեն այլ քաղաքներ ևս։
• Գների համապատասխանության երաշխիք – Եթե հյուրերը մեկ այլ տեղում գտնեն նույն հյուրանոցի ավելի ցածր գին, մենք նրանց կտրամադրենք տարբերությունը՝ որպես Airbnb բոնուս։¹⁰

Նոր բուտիկ-հյուրանոցներ, սերվիսներ և փորձառություններ այսօր հասանելի են աշխարհի որոշ երկրներում, իսկ ավտոմեքենաների վարձույթը և հավելվածի լրացուցիչ գործառույթները հասանելի կդառնան ավելի ուշ այս ամառ։

¹ Ըստ 2026 թ. մարտ-ապրիլ ամիսներին առաջատար խորհրդատվական ընկերության կողմից անցկացված համեմատական ուսումնասիրության, որի շրջանակում համեմատվել են ԱՄՆ-ի 6 առաջատար ճամփորդական հարթակների հաճախորդների աջակցման ԱԲ օգնականները։ Ուսումնասիրության ընթացքում գնահատվել են այնպիսի ցուցանիշներ, ինչպիսիք են սպասարկման որակը, խնդիրների լուծումը, առաջադրանքների կատարումը և հաղորդակցման ընդհանուր փորձառությունը։

² Այս գործառույթը հասանելի չէ մայրցամաքային Չինաստանում։

³ Առաջարկը հասանելի է միայն ԱՄՆ-ի ընտրված քաղաքներում։ Սահմանափակ ժամկետով գործող առաջարկ պահանջներին համապատասխանող պատվերների համար. գործում է մինչև պաշարների սպառումը կամ մինչև 2026 թ. հունիսի 30-ը։ Գործում են պայմաններ և վճարներ։

⁴ Առաջարկը հասանելի է որոշ քաղաքներում։ Չի ներառում հարկերն ու վճարները։ Գործում են պայմաններ։

⁵ Առաջարկը հասանելի է որոշ քաղաքներում։ Չի ներառում հարկերն ու վճարները։

⁶ Ըստ Airbnb-ի՝ 2024 թ․ ապրիլի 25-30-ն ընկած ժամանակահատվածում ԱՄՆ-ում, Կանադայում, Միացյալ Թագավորությունում և Ավստրալիայում 2752 պատասխանողների շրջանում անցկացված հարցման տվյալների։

⁷ Ըստ Airbnb-ի՝ 2025 թ․ մայիսի 13-ից մինչև 2026 թ․ մարտի 31-ն ընկած ժամանակահատվածում ամբողջ աշխարհից հավաքված տվյալների։

⁸ Ըստ 2024 թվականի չորրորդ եռամսյակում ԱՄՆ-ում, Կանադայում, Միացյալ Թագավորությունում, Ֆրանսիայում, Գերմանիայում, Իտալիայում, Իսպանիայում, Բրազիլիայում, Մեքսիկայում, Ավստրալիայում, Ճապոնիայում, Հարավային Կորեայում և Հնդկաստանում ճանապարհորդների շրջանում անցկացված հարցման։

⁹ 15% բոնուսի առաջարկը գործում է մինչև 2026 թ․ դեկտեմբերի 31-ը՝ պահանջներին համապատասխանող հյուրանոցների համար։ Բոնուսի հաշվարկը չի ներառում վճարներ և հարկեր։ Բոնուսը վավեր է մեկ տարի։ Առավելագույն բոնուսը 2 000 ԱՄՆ դոլար է կամ տեղական արժույթով համարժեք գումար։ Գործում են պայմաններ և բացառություններ։

¹⁰ Կիրառելի է միայն որոշ հյուրանոցների դեպքում։ Հայտերը պետք է ներկայացվեն ամրագրումից հետո 24 ժամվա ընթացքում։ Առավելագույն բոնուսը 400 ԱՄՆ դոլար է կամ տեղական արժույթով համարժեք գումար։ Գների տարբերությունը հաշվարկվում է՝ չներառելով վճարները և հարկերը։ Բոնուսը վավեր է մեկ տարի։ Գործում են պայմաններ և բացառություններ։

Հեռանկարային հայտարարություններ

Այս հոդվածը պարունակում է հեռանկարային հայտարարություններ՝ 1995 թվականի «Մասնավոր արժեթղթերի վերաբերյալ դատական վեճերի բարեփոխման մասին» օրենքի «անվտանգ հանգրվանի» դրույթների համաձայն։ Բացի պատմական փաստերից՝ սույն հոդվածի մյուս բոլոր դրույթները կարող են համարվել հեռանկարային հայտարարություններ, մասնավորապես այն հայտարարությունները, որոնք առնչվում են մեր պրոդուկտների, սերվիսների, փորձառությունների և հյուրանոցային առաջարկների հասանելիությանը, ժամկետներին և աշխարհագրական տարածմանը, մեր ԱԲ ինտեգրմանը, դրա հնարավորություններին և արդյունավետությանը, մեր գործընկերային հարաբերություններին երրորդ կողմերի հետ, մեր գովազդային առաջարկներին, գներին և հարակից պայմաններին։

Հեռանկարային հայտարարությունները ներառում են հայտնի և անհայտ ռիսկեր, անորոշություններ, ենթադրություններ և այլ գործոններ, որոնք կարող են հանգեցնել նրան, որ փաստացի արդյունքները էապես տարբերվեն սույն հոդվածում արտահայտված կամ ենթադրվող նպատակներից։ Այդ գործոնները ներառում են փոփոխություններ գործընկերային ծառայությունների պայմաններում կամ հասանելիության մեջ, ԱԲ տեխնոլոգիաների հաջող ինտեգրման և ներդրման մեր կարողությունը, ինչպես նաև նոր պրոդուկտների, սերվիսների, փորձառությունների և գործառույթների՝ նախատեսված ժամկետներում թողարկելու մեր կարողությունը։ Այլ կարևոր գործոնները ներառում են, ի թիվս այլոց, քաղաքական, գործարար և տնտեսական պայմանների փոփոխությունները, այդ թվում՝ աշխարհաքաղաքական հակամարտությունների հետևանքով, ինչպես նաև այլ ռիսկեր, որոնք նկարագրված են Արժեթղթերի և բորսաների հանձնաժողովին ներկայացված մեր փաստաթղթերում, որոնք հասանելի են նաև մեր կայքում։

Բոլոր հեռանկարային հայտարարությունները արդիական են միայն սույն հոդվածի հրապարակման օրվա դրությամբ և հիմնված են այդ պահին մեզ հասանելի տեղեկությունների վրա։ Մենք հստակորեն հրաժարվում ենք այս հոդվածում պարունակվող ցանկացած տեղեկություն թարմացնելու կամ վերանայելու ցանկացած պարտավորությունից՝ բացառությամբ օրենքով սահմանված դեպքերի։

Այս հոդվածում պարունակվող տեղեկությունները կարող են փոխված լինել հրապարակումից հետո։