Թարմացրեք տարածքի հայտարարության լուսանկարները
Առանձնահատկություններ
Ընտրեք շապիկի պատկեր, որը ցույց է տալիս ձեր տարածքի անհատականությունը
Հեռացրեք ավելորդ իրերը, տեսախցիկը պահեք աչքերի մակարդակի վրա և ստեղծեք մտածված կոմպոզիցիաներ
Կարդացեք մեր ամբողջական ուղեցույցը, որպեսզի հավելյալ տեղեկություններ ստանաք այն մասին, թե ինչպես հյուրընկալությունը բարձրացնել հաջորդ մակարդակի
Գիտե՞ք արդյոք, որ մնալու տեղ ընտրելիս հյուրերի համար որոշիչ դեր են կատարում լուսանկարները։ Լուսանկարների որակը կարող է ազդել նաև այն բանի վրա, թե որքան հաճախ են պոտենցիալ հյուրերը որոնման արդյունքներում գտնում ձեր հայտարարությունը, ինչը նշանակում է, որ բարձրորակ լուսանկարները կարևոր նշանակություն ունեն ձեր հյուրընկալման բիզնեսի համար։
Ջեֆն ու Քանդիդան պրոֆեսիոնալ լուսանկարիչներ և սուպերտանտերեր են, որոնք օգտագործում են իրենց ստեղծագործական միտքն ու հմտությունները, որպեսզի գրավեն Կալիֆոռնիայի Ջոշուա Թրի քաղաքում գտնվող իրենց անապատային կացարանի՝ El Rancho-ի ավելի շատ ամրագրումներ։ Նրանց գաղտնիքն այն է, որ իրենց տարածքը նույնքան գեղեցիկ են ներկայացնում լուսանկարներում, որքան կա իրականում։
Զույգն այստեղ կիսվում է մասնագիտական խորհուրդներով այն մասին, թե ինչպես կատարելագործել լուսանկարների որակը։
1. Հեռացրեք ավելորդ իրերը
Տարածքը կարգի բերեք լուսանկարելուց առաջ։ «Մեզ երբեմն շատ է զարմացնում այն փաստը, որ մարդիկ լուսանկարելուց առաջ տարածքից չեն հեռացնում ավելորդ իրերը»,- ասում է Ջեֆը։ «Մենք փորձում ենք անպետք իրերից զերծ պահել մեր կենսական տարածքները, ուստի լուսանկարներ անելը մեծ ջանքեր չի պահանջում, որովհետև ոչինչ չի շեղում մեր ուշադրությունը»։
Սակայն դա չի նշանակում, որ տարածքը պետք է ամբողջովին դատարկ լինի։ «Լուսանկարին ավելացրեք մարդկային բաղադրիչ»,- ասում է Քանդիդան՝ նկատի ունենալով վերմակի կամ գրքերի մի փոքրիկ կապոցի պես բաներ։ «Այդպես, տարածքն անհամեմատ ավելի հյուրընկալ և ջերմ է դառնում»։
2. Շրջանակի մեջ առեք շապիկի պատկերը
Տարածքի այն լուսանկարը, որը ցուցադրվում է որպես շապիկի պատկեր, առաջին բանն է, որ ճանապարհորդները տեսնում են որոնման արդյունքներում և ձեր հայտարարության էջում, այնպես որ աշխատեք լավ տպավորություն գործել։
«Մտածեք, թե ինչն է ձեր տարածքն առանձնացնում մյուսներից։ Ինչո՞վ է այն յուրահատուկ։ Ըստ ձեզ՝ մարդիկ կցանկանա՞ն մնալ այստեղ։ Ուսումնասիրեք Airbnb-ի այլ հայտարարություններ՝ ոգեշնչման, ինչպես նաև օգտակար լուծումներ գտնելու համար»,- խորհուրդ է տալիս Քանդիդան։
Անպայման լուսանկարեք նաև բոլոր հատուկ տարածքները, որոնք կարող են հետաքրքրել պոտենցիալ հյուրերին, օրինակ՝ ստեղծեք տան բացօթյա տարածքի լայնանկյուն պատկեր։3. Ճիշտ ընտրեք լույսը
«Հիասքանչ լուսանկարների գլխավոր գաղտնիքը լուսավորությունն է»,- ասում է Քանդիդան։ Ահա մի քանի խորհուրդ, թե ինչպես տարածքը պատկերել իր ողջ հմայքով.
- Ուսումնասիրեք լուսավորությունը։ Բացահայտեք, թե տարածքը ներսից ու դրսից ինչ տեսք ունի բնական լույսի ներքո ողջ օրվա ընթացքում։
- Լուսանկարեք մթնշաղին կամ լուսաբացին։ Բացօթյա լուսանկարներ անելիս նկարահանեք արևածագից անմիջապես հետո կամ մայրամուտից առաջ․ սրանք ոսկե ժամերն են։ Լուսավորությունը մեղմ է և ոչ արևի ուղիղ ճառագայթներով, հետևաբար հաճելի ու ջերմ երանգ կհաղորդվի ձեր սեփականությանը։
- Օգտագործեք բնական լույսի առավելությունները։ Եթե լուսանկարում եք շինության ներսում, գտեք օրվա այն ժամը, երբ ձեր տարածք ուղղակիորեն ներթափանցում է առավելագույն քանակության բնական լույս։ Արհեստական լուսավորությունն օգտագործեք ծայրահեղ դեպքում․ այն չափազանց կոպիտ է իրերը ցուցադրում լուսանկարներում։
- Անջատեք լուսաբռնկումը։ Ճիշտ ինչպես այլ արհեստական լուսավորության դեպքում, լուսաբռնկիչ օգտագործելը կարող է ստեղծել կոպտության էֆեկտ։ Եթե տարածքում, որը լուսանկարում եք, չկա բնական լուսավորություն, միացրեք լամպը, որպեսզի ստեղծեք հարմարավետության զգացողություն։
4. Կազմեք գեղեցիկ կոմպոզիցիա
Ինչ վերաբերում է լուսանկարի որակին, կոմպոզիցիան՝ այնպիսի գործոններ, ինչպիսիք են կողմնորոշումը, լուսանկարի չափսը, դասավորվածությունը և համաչափությունը, նույնքան կարևոր է, որքան լուսանկարի առարկան։ Ահա որոշ խորհուրդներ, որոնք կարելի է հաշվի առնել կոմպոզիցիա ստեղծելիս.
- Կենտրոնադրեք լուսանկարները։ Հիշեք, որ Airbnb-ն եզրատում է լուսանկարները, որպեսզի դրանք տեղավորվեն հայտարարության մեջ և որոնման արդյունքներում։ Գլխավոր առարկան տեղադրեք կադրի կենտրոնում, որպեսզի ոչ մի կարևոր բան չեզրատվի-հանվի։ «Եթե տանն ունեք հատկապես սիրելի տարրեր, փորձեք դրանք ակնառու դարձնել լուսանկարի մեջ»,- ասում է Ջեֆը։
- Նկարահանեք աչքերի մակարդակի վրա։ Բնական անկյան տակ լուսանկարելը՝ առանց աղավաղումների, վերև կամ ներքև թեքելու, օգնում է ապահովել պատկերի հավասարակշռությունը և հյուրերին թույլ է տալիս տարածքը զգալ ավելի մոտ այն վիճակին, ինչ կտեսնեին անձամբ տեղում ներկա լինելու դեպքում։
- Օգտագործեք երրորդների կանոնը։ «Եթե կադրը հորիզոնական և ուղղաձիգ գծերով բաժանեք երեք հավասար մասերի, կարող եք դրանք որպես կողմնորոշիչներ օգտագործել ձեր կոմպոզիցիայում տարրերը դասավորելու համար»,- ասում է Ջեֆը։
- Ներառեք բազմազան կադրեր։ Լայնանկյուն լուսանկարներն իդեալական տարբերակ են, որպեսզի մարդիկ պատկերացում կազմեն սենյակի չափի մասին, իսկ միջին պլանի լուսանկարները լավագույնն են որոշակի առարկաների, օրինակ՝ հեռուստացույցի կամ հեծանիվ-մարզասարքի վրա կենտրոնանալու համար։ Խոշոր պլանով լուսանկարեք ձեր տարածքի անհատականությունն ընդգծող փոքրիկ դետալներ։
- Ստեղծեք միացումներ։ Պատկերացրեք, որ ձեր պատկերասրահը զբոսավարով շրջայց է, և լուսանկարների միջոցով ցույց տվեք պոտենցիալ հյուրերին, թե ինչպես են իրար միանում սենյակները։
5. Ցուցադրեք ձեր տարածքը
Երբ որոշում եք, թե ինչը լուսանկարել և ինչը դուրս թողնել, փորձեք մտածել հյուրի պես։
«Խնամքով ընտրեք այնպիսի լուսանկարներ, որոնք լավագույնս կպատմեն ձեր պատմությունը»,- ասում է Քանդիդան։ «Ձեր տարածքում հատկապես ի՞նչը դուր կգա հյուրերին։ Ի՞նչ անակնկալների մասին պետք է տեղեկացված լինեն։ Ինչպե՞ս ներկայացնել մանրամասները՝ միաժամանակ ընդհանուր պատկերացում տալով սենյակների մասին»։
Ձեր պատմությունը պատմելիս մի մոռացեք ընդլայնել տեսադաշտը ը ներկայացնել շրջակա տարածքը։ «Պարտադիր չէ ցուցադրել միայն տան լուսանկարները»,- նշում է Ջեֆը։ Կարելի է ներառել մոտակա արշավային արահետը կամ, օրինակ, փողոցի անկյունում գտնվող հրապուրիչ սրճարանը։
Ամենից առաջ, երբ ներկայացնում եք ձեր տարածքը և թաղամասը, օգտագործեք բարձրորակ լուսանկարներ, որոնք պոտենցիալ հյուրերին կօգնեն պատկերացնել իրենց այցը և գուցե ամրագրել ձեր տարածքն այցի համար, որը միշտ կհիշեն։
Այս հոդվածում պարունակվող տեղեկությունները կարող են փոխված լինել հրապարակումից հետո։
Առանձնահատկություններ
Ընտրեք շապիկի պատկեր, որը ցույց է տալիս ձեր տարածքի անհատականությունը
Հեռացրեք ավելորդ իրերը, տեսախցիկը պահեք աչքերի մակարդակի վրա և ստեղծեք մտածված կոմպոզիցիաներ
Կարդացեք մեր ամբողջական ուղեցույցը, որպեսզի հավելյալ տեղեկություններ ստանաք այն մասին, թե ինչպես հյուրընկալությունը բարձրացնել հաջորդ մակարդակի