Հայտարարության վերնագիրը գրելու նոր ցուցումներ

Վերջերս մենք կատարեցինք տասնամյակի ընթացքում Airbnb-ի ամենամեծ փոփոխությունը և, այդ վերափոխման շրջանակներում, որոնման արդյունքներից հեռացրինք հյուրընկալողների՝ հայտարարությունների վերնագրեր գրելու հնարավորությունը։ Մտադիր էինք բոլոր վերնագրերը ներկայացնել միասնական ձևաչափով, որպեսզի հյուրերի համար ավելի հեշտ լիներ կարդալ՝ անկախ նրանց նախընտրած լեզվից կամ սարքից։

Վերջին թողարկումից հետո դուք շատ կարծիքներ և դիտողություններ եք հայտնել փոփոխությունների մասին, այդ թվում՝ խնդրել եք վերականգնել հայտարարությունների վերնագրերի ցուցադրումը հյուրերի որոնման արդյունքներում։ Մենք հասկանում ենք՝ ինչու եք այդքան շահագրգռված այս խնդրով. ձեր հայտարարության վերնագիրն առաջիններից է, որ հյուրերը կարդում են որոնման արդյունքներում, և հնարավորություն է ընդգծելու, թե ինչն է յուրահատուկ դարձնում ձեր տարածքը։

Հունիսի 30-ից սկսած՝ ձեր հայտարարությունների վերնագրերը կրկին կցուցադրվեն հյուրերի որոնման արդյունքներում։ Մենք նաև տրամադրում ենք արդյունավետ վերնագիր գրելու նոր ցուցումներ, որոնք կօգնեն որոնման արդյունքներում առանձնացնել ձեր հայտարարությունը, հյուրերի համար սահմանել ակնկալիքներ և առաջացնել ձեր տարածքն ամրագրելու հետաքրքրվածություն։

Հյուրերն Airbnb-ում որոնումներ են կատարում՝ օգտագործելով տարբեր չափերի էկրաններով ամեն տեսակի սարքեր։ Վերնագիրը, որը նորմալ է դիտվում վեբ դիտարկիչում, կարող է չափազանց երկար լինել բջջային հավելվածում հայտարարություններն աչքի անցկացնող հյուրերի համար։

Երկար վերնագրերն ավտոմատ կրճատվում են որոնման արդյունքներում, իսկ վերնագրի մնացած մասը փոխարինվում է կախման կետերով։ Օրինակ՝ «Գյուղական տնակ լճի տեսարանով, խարույկատեղով, նավակի կառանատեղով»-ը դառնում է «Գյուղական տնակ լճի տեսարանով...»

Նիշերի քանակի սահմանափակումներն օգնում են ապահովել վերնագրի ամբողջական ցուցադրումը սեղանադիր համակարգչում և շարժական սարքերում։ Անընդհատ շարժման մեջ գտնվող հյուրերը սովորաբար որոնում են կատարում շարժական հեռախոսների միջոցով, իսկ դա նշանակում է, որ ընդամենը 32 նիշ է ցուցադրվում։ Եթե ձեր վերնագիրը 32 նիշից ավելի երկար է, ամենակարևոր տեղեկությունները նշեք սկզբում։

Ահա հայտարարությունների կարճ վերնագրերի երեք լավ օրինակ.

• Քաղաքի կենտրոնին նայող մոդեռն լոֆթ
• Լեռնային անկյուն խոհարարների համար
• Լողափնյա վիլլա Անյո Նուևոյի մոտ

Նախադասության միայն առաջին բառի սկզբնատառը մեծատառով գրելու կանոնը նշանակում է, որ պետք է մեծատառ լինի վերնագրի միայն առաջին բառի առաջին տառը։ Նախադասության բոլոր բառերի սկզբնատառերը մեծատառերով գրելը չափազանց ձևական բնույթ է կրում, իսկ ԲՈԼՈՐԸ ՄԵԾԱՏԱՌԵՐՈՎ տարբերակը շատ ճչացող է։

Որպեսզի հյուրերի համար ապահովեք ավելի արդյունավետ որոնում, խուսափեք վերնագրի այլ բառերում մեծատառերի օգտագործումից, եթե դա հատուկ գոյական չէ, ինչպիսին քաղաքի անվանումն է։ Դուք կարող եք նաև բացառություններ անել հապավումների համար, օրինակ՝ ՄԹ (Միացյալ Թագավորության համար) կամ օդանավակայանի կոդ, ասենք՝ LHR։

Ահա մի օրինակ, որտեղ պետք չէ մեծատառեր օգտագործել հայտարարության վերնագրում․

• ՆՈՐ Կահույք ՀՍԿԱՅԱԿԱՆ ԼՈՂԱՎԱԶԱՆ Հիանալի Տեսարաններ

Ահա հայտարարությունների վերնագրերի երեք լավ օրինակ, որտեղ նախադասության միայն առաջին բառի սկզբնատառն է մեծատառով գրված.

• Ծովամերձ հյուղ՝ Բոնդի լողափում
• Վիկտորիանական ոճի ռոմանտիկ հյուրասենյակ
• Էկոլոգիապես անվնաս ստուդիա LAX-ի հարևանությամբ

Էմոջիներն ու սիմվոլները կարող են տարբեր բաներ նշանակել աշխարհի տարբեր մարդկանց համար, և դրանք օգտագործելը կարող է շփոթեցնող կամ մոլորեցնող լինել։ Օրինակ՝ բութ մատը կարող է մեկնաբանվել որպես հաստատման նշան, «մեկ» թիվը կամ վիրավորական ժեստ։

Որպեսզի ձեր հայտարարության վերնագիրը լինի ավելի ընկալելի և դյուրընթեռնելի, տարածքը ներկայացրեք պարզ և նկարագրական բառերով։ Հատուկ նշանների (օրինակ՝ !, # կամ *) օգտագործումը լավ է, բայց շեշտելու նպատակով դրանց կրկնությունը (!!! կամ ***)՝ ոչ։ Գաղափարները տարանջատելու համար փորձեք ստորակետեր բացատներով կամ մեկ շեղագիծ՝ առանց բացատների։

Ահա մի օրինակ, թե ինչ չպետք է անել.

• ****Դահուկավարության և գոլֆի հնարավորություններով շալե****!!!

Ավելի լավ է գրել այսպես.

• Դահուկավարության/գոլֆի շալե և մասնավոր բակ

Շատ դեպքերում պետք չէ կրկնել որոնման արդյունքներում հյուրերին արդեն իսկ տրամադրված որևէ տեղեկություն, օրինակ՝ քաղաքի կամ քաղաքատիպ ավանի անվանումը կամ մահճակալների ընդհանուր քանակը։ Փոխարենը՝ հայտարարության վերնագիրն օգտագործեք ուշադրություն գրավող ուրույն մանրամասներ ավելացնելու նպատակով։

Օրինակ, եթե ձեր տարածքը գտնվում է Բուենոս Այրեսում, կարելի է հայտարարության վերնագրում ներառել թաղամասը, ասենք՝ «Ռեկոլետա»։ Եթե այն գտնվում է Իտալիայի Ֆլորենցիա քաղաքում, կարող եք նշել «Ուֆֆիցիի մոտակայքում» կամ ձեր տարածքին մոտ գտնվող մեկ այլ տեսարժան վայր։ Սա օգնում է հյուրերի համար հստակեցնել ձեր տարածքի շրջակայքը։ Կամ, եթե դուք ունեք հատուկ գրասենյակային տարածք, կարող եք վերնագրում նշել «հարմար է գործնական ուղևորությունների համար»։

Նաև կարելի է նոր հայտարարության վերնագրից բաց թողնել «նոր» բառը, քանի որ այս տեղեկությունն արդեն հյուրերին ներկայացված է որոնման արդյունքներում նշանակի միջոցով։

Կարդալ Airbnb-ի՝ բովանդակության նկատմամբ կիրառվող քաղաքականությունը

Այս հոդվածում պարունակվող տեղեկությունները կարող են փոխված լինել հրապարակումից հետո։