Ինչպես ընտրել ամրագրման կարգավորումներ
Կարող եք հյուրերի ամրագրումներն ընդունել երկու եղանակներից մեկով. ավտոմատ կերպով՝ ակնթարթային ամրագրման միջոցով, կամ անձամբ՝ պատասխանելով ամրագրման հայտերին։ Շատ հյուրեր և հյուրընկալողներ սիրում են ակնթարթային ամրագրման՝ ժամանակ խնայող հարմարավետությունը։
Ի՞նչ է ակնթարթային ամրագրումը
Ակնթարթային ամրագրումը հյուրերին թույլ է տալիս անմիջապես ամրագրել ձեր օրացույցի ազատ ամսաթվերը։ Դուք ամրագրման հայտեր կստանաք միայն այն ամրագրումների համար, որոնցում առկա են ձեր հաստատումը պահանջող հատուկ հանգամանքներ, օրինակ՝ 31 գիշերից ավելի երկար այցերի համար։
Բոլոր հյուրերը պետք է համաձայնեն ձեր տան կանոններին և բավարարեն Airbnb-ի ամրագրման պահանջները։ Ձեր հայտարարությունը հրապարակելուց հետո կարող եք ավելացնել կարգավորումներ, որոնք ակնթարթային ամրագրում օգտագործող հյուրերից պահանջում են.
- Ամրագրումն ավարտել առանց վատ կարծիքի կամ Airbnb-ի աջակցման թիմին հաղորդված միջադեպի։
- Կարդալ ձեր ստեղծած և ավտոմատ ուղարկվող նախնական ամրագրման հաղորդագրության հարցերն ու պատասխանել դրանց
Ինչպե՞ս հաստատեմ իմ առաջին 5 ամրագրումները
Երբ հյուրը ցանկանա ամրագրել ձեր տարածքը, դուք կստանաք ամրագրման հայտ։ Դուք հայտը հաստատելու կամ մերժելու համար կունենաք 24 ժամ, որից հետո հայտի ժամկետը կավարտվի։ Կարող եք միացնել ծանուցումները, որպեսզի հնարավորինս շուտ ստանաք հայտերը։
Երբ հյուրն ամրագրման հայտ է ուղարկում, նշված ամսաթվերն ավտոմատ արգելափակվում են ձեր օրացույցում՝ հետագա հայտերի հետ համընկնումներ թույլ չտալու համար։ Այդ ամսաթվերը կմնան արգելափակված, եթե ընդունեք հայտը կամ թույլ տաք, որ հայտի ժամկետն ավարտվի, ուստի կարևոր է արագ պատասխանել յուրաքանչյուր հայտի։
Երբ հաստատեք 5 ամրագրում, ամրագրման կարգավորումները կփոխվեն ակնթարթային ամրագրման։ Կարող եք ցանկացած պահի թարմացնել կարգավորումները։
Ո՞ր տարբերակն է ձեզ հարմար
Ահա որոշ նկատառումներ, որոնք պետք է հաշվի առնել ամրագրման կարգավորումներն ընտրելիս.
Ակնթարթային ամրագրում
- Հյուրերը նախընտրում են ունենալ ամրագրումներն անմիջապես հաստատելու հնարավորություն, ինչը կարող է հանգեցնել ավելի շատ ամրագրումների։
- Ակնթարթային ամրագրումը ձեր փոխարեն ընդունում է ամրագրումներ՝ հիմնվելով սահմանված պարամետրերի վրա։
- Դուք պետք է մշտապես արդիական պահեք օրացույցն ու այն համաժամացնեք օգտագործվող այլ օրացույցների հետ։
Ամրագրման հայտեր
- Հյուրերը գնահատում են արագ պատասխանները, ուստի լավ կլինի այս տարբերակն օգտագործել միայն այն դեպքում, եթե կարող եք պատասխանել 24 ժամվա ընթացքում։
- Դուք ուզում եք ընդգծել ձեր տարածքի հատուկ կանոնները կամ առանձնահատկությունները, օրինակ՝ դեպի միակ մուտքը տանող զառիվեր սանդուղքը։
- Չի թույլատրվում հայտերը մերժել այնպիսի պատճառներով, որոնք խախտում են Airbnb-ի Խտրականության դեմ քաղաքականությունը։
Ընտրեք այն տարբերակը, որի դեպքում հյուրերի ամրագրումները չեք չեղարկի անթույլատրելի պատճառներով, այլապես չեղարկումը կարող է հանգեցնել վճարների և այլ հետևանքների։
Այս հոդվածում պարունակվող տեղեկությունները կարող են փոխված լինել հրապարակումից հետո։