Ստացեք ավելի շատ 5 աստղանի կարծիքներ

Սուպերտանտերեր, ձեռնարկատերեր և ինտերիերի դիզայներներ Քեթրին և Բրայան Ուիլյամսոնները՝ Beginning in the Middle բլոգի հեղինակները, բիզնես են ստեղծել՝ ապահովելով 5 աստղանի այցեր։ Նրանք հյուրընկալել են ավելի քան 2000 մարդու և պատրաստ են կիսվելու իրենց պատմությամբ ու փորձագիտական խորհուրդներով, թե ինչպես կարելի է ձեր տունն ավելի հիշարժան դարձնել։

Քեթրին. «Մեզ համար Airbnb բիզնես և դիզայներական ընկերություն հիմնելը երջանիկ դիպված էր։ 2013 թ. Նյու Յորքից տեղափոխվեցինք Օհայո նահանգի Կոլումբուս քաղաք, որտեղ մեծացել էր Բրայանը։ Մենք ուզում էինք ավելի մեծ տուն ունենալ, ինչպես նաև փնտրում էինք մի տեղ, որտեղ կկարողանայինք հիմնվել և ստեղծել մեր սեփական գործը»։

Բրայան. «Մենք գնեցինք երեք ննջասենյակով տուն և հայտնվեցինք այնպիսի իրավիճակում, երբ պետք է մարեինք մնացած պարտքը։ Բայց մեզ այդքան էլ դուր չէր գալիս մշտական սենյակակից ունենալու գաղափարը»։

Քեթրին. «Ընկերներիցս մեկը ճանաչում էր մի մարդու, որն Airbnb-ում վարձով էր տալիս իր հյուրերի ննջասենյակը, և առաջարկեց փորձել։ Այն ժամանակ մենք գաղափար չունեինք, թե ինչ է Airbnb-ն։ Ես և Բրայանը մտածեցինք. «Լավ, եթե կարողանանք այս տարի ընդամենը 10 գիշեր վարձակալությամբ տրամադրել, դա իսկապես հիանալի կլինի»։

Բրայան. «Մենք հրապարակեցինք մեր հայտարարությունը, և այն ահռելի պահանջարկ ունեցավ։ Շուտով անցանք ամբողջ տունն առաջարկելուն։ Մենք հերթով մնում էինք Կոլումբուսի տարբեր մոթելներում, մինչև գտանք այն մեկը, որը քիչ թե շատ տանելի էր։ Երբեմն մի քանի շաբաթ այնտեղ էինք մնում։ Արդեն ծանոթ էինք հյուրանոցի ողջ անձնակազմին։ Բայց, իհարկե, այդպես չէր կարող անվերջ շարունակվել»։

Քեթրին. «Մենք մարեցինք պարտքը և հետագայում գնեցինք մեկ այլ տուն։ Մի քանի տարվա ընթացքում գնեցինք և վաճառեցինք մի շարք տներ, իսկ մեր նախընտրածները պահեցինք Airbnb-ում։ Մենք դուրս եկանք մեր աշխատանքի վայրերից, ստեղծեցինք ինտերիերի դիզայնի մեր ստուդիան (Mix Design Collective), մեր վարձով հանգստի տների ապրանքանիշը (The Village Host) և սկսեցինք բլոգ վարել (Beginning in the Middle)»։

Բրայան «Մենք իսկապես հոգ ենք տանում մեր յուրաքանչյուր հյուրի համար հատուկ փորձառություն ստեղծելու մասին։ Եվ հյուրընկալության նկատմամբ տածած մեր սերն օգնեց ապրել այնպես, ինչպես մեզ դուր է գալիս։ Անկախ ձեր տրամադրած տան տեսակից՝ եթե կարողանաք, որպես հյուրընկալող, բացառիկ այցեր ապահովել, կտեսնեք, որ ձեր գնահատականներն ու զբաղվածության ցուցանիշները կտրուկ բարձրանում են»։

Քեթրին. «5 աստղանի կարծիք ստանալու գաղտնիքներից մեկն այն է, որ հյուրերի ակնկալիքները սահմանված լինեն նախքան «Ամրագրել» կոճակը սեղմելը։ Մեր տները հին են, և մենք ջանացել ենք, որ դրանք հարմարավետ և գեղեցիկ լինեն։ Բայց դրանք կատարյալ չեն, ուստի փորձում ենք հնարավորինս շատ տեղեկություններ տալ նախապես։ Օրինակ՝ մեր հատակներն ու դռները ճռճռում են»։

Բրայան «Մեր լոգասենյակները մեծ չեն։ Հարկաբաժիններից մեկը հարևանի հետ ընդհանուր պատ ունի։ Մենք այդ մասին ասում ենք, որպեսզի մարդիկ բարեկիրթ ու անաղմուկ լինեն։ Երեկույթներ ՉԵՆ թույլատրվում»։

Քեթրին. «Մենք ունենք դեկորատիվ ոտնակներով լոգարան, որը մի փոքր ավելի բարձր է, քան սովորական լոգարանը։ Այս տեղեկությունը կարող է կարևոր լինել, եթե հյուրերը հատուկ կարիքներ ունեն։ Այս տարօրինակությունները գուցե դուր չգան որոշ մարդկանց։ Ուրիշների համար կարող է միևնույնը լինել։ Բայց մենք փորձում ենք գտնել մեր հասցեատերերին՝ այն մարդկանց, որոնց դուր կգա թաղամասն ու տունը»։

Բրայան. «Հյուրերի հետ արագ և հստակ շփվելը 5 աստղանի փորձառության կարևոր պայման է։ Դա օգնում է ցույց տալ հյուրերին, որ դուք մշտապես հոգում եք նրանց մասին»։

Քեթրին. «Մարդիկ կարճաժամկետ են մնում ձեզ մոտ, և դա սովորաբար տեղի է ունենում ինչ-որ կարևոր բանի համար, այնպես որ դուք չեք ուզում, որ նրանք իրենց այցի կեսն անցկացնեն սպասելով՝ առանց ձեզանից պատասխան ստանալու կամ ձեր կողմից ինչ-որ խնդիր շտկելու։ Ես հաղորդագրություններին պատասխանում եմ 5 րոպեի ընթացքում, բայց եթե չեք կարծում, որ ողջամիտ ժամկետներում կկարողանաք պատասխանել, ապա մտածեք համահյուրընկալող գտնելու մասին, որը ձեզ կօգնի էլեկտրոնային նամակների և հաղորդագրությունների հարցերում։ Մենք ամեն ինչ անում ենք, որպեսզի նրանց ցույց տանք, որ մենք այստեղ ենք և հոգ ենք տանում։ Երբեմն դա նշանակում է հրաժարվել այն ամենից, ինչ անում եք 5 աստղանի փորձառություն ապահովելու համար»։

Ավելին իմանալ համահյուրընկալողի հետ աշխատելու մասին

Քեթրին. «Դեկորի և տարածքի ձևավորման հարցում ամենակարևորն այն է, որ հյուրերն այնտեղ գտնվելիս իրենց զգան ինչպես տանը։ Ժամանակ և ջանք ծախսեք յուրօրինակ կահավորման վրա՝ այն դարձնելով ավարտուն և մտածված»։

Բրայան. «Դա չի նշանակում, որ պետք է ամբողջ խոհանոցը մարմարապատեք կամ ընտրեք ամեն ինչի ամենաբարձրակարգը։ Կարծում եմ՝ ամենակարևորն այն է, որ տունը լինի մաքուր, հարմարավետ և առանց ավելորդ իրերի»։

Քեթրին. «Հյուրերը պետք է զգան, որ տունը նախապատրաստված է հենց իրենց համար։ Ժամանակ հատկացրեք՝ հավաքելու անձնական լուսանկարները, ընտանեկան հուշանվերները, մանր-մունր բաները, աղբը և այն ամենը, ինչի պատճառով հյուրերը կարող են զգալ, որ գտնվում են ուրիշի տանը»։

Բրայան․ «Եթե կա մի բան, որի վրա չարժե խնայել, դա լավ մահճակալն է։ Պարտադիր չէ, որ թանկ ներքնակ լինի, բայց ավելացնում ենք ներքնակի ծածկոց և ներառում երկու տեսակի բարձ՝ փետուրներով և առանց փետուրների»։

Քեթրին. «Սավանների դեպքում նախընտրում ենք առնվազն 300 թել ամրություն ունեցողները, ինչպես ընդունված է շատ հյուրանոցներում։ Դրանք պետք է հաճելի լինեն մաշկին, կոշտ չլինեն, քանի որ մարդիկ ամրագրում են ձեր տարածքը հիմնականում այնտեղ գիշերելու համար։ Հատկապես ծնող հանդիսանալով՝ գիտենք, որ լավ քունը շքեղություն է»։

Քեթրին. «Երբ մարդիկ գալիս են ձեր տարածքում մնալու, հիշեք, որ դուք կիսվում եք ոչ միայն ձեր տնով, այլև՝ քաղաքով։ Մենք սիրում ենք հնարավորինս անհատական մոտեցում ցուցաբերել։ Փոքր բիզնեսների զարգացումը կենսական նշանակություն ունի Կոլումբուսի համար, ուստի մենք ուրախությամբ ներգրավում ենք բոլորին»։

Բրայան. «Երբեմն հյուրերին թողնում ենք մեր սիրած տեղական ապրանքների նմուշներ, օրինակ՝ տեղական սուրճի խանութի նվեր-քարտեր, որպեսզի նրանց շահագրգռենք ուսումնասիրել թաղամասը։ Մեր տունը համալրում ենք տեղական Cliff Original ընկերության շամպունով, բալզամով և դեմք լվանալու միջոցով։ Ձեռքի բնական օճառը տեղական Glenn Avenue ապրանքանիշի է։ Ունենք The Columbus Book Project շարքի գրքեր, որոնք պատրաստվել են տեղացի ձեռնարկատիրոջ կողմից և ներկայացնում են տեղացի նկարիչներին։ Կոլումբուսն այդքան էլ հայտնի նպատակակետ չէ, բայց հիանալի տեղ է ապրելու, մեծանալու, այցելելու համար և այնքան բան ունի առաջարկելու»։

Քեթրին. «Մենք սիրում ենք ցույց տալ Կոլումբուսը մեր դիտանկյունից, և մեզ դուր է գալիս, երբ կարողանում ենք այնպիսի տպավորություն գործել, որ մարդիկ ասեն. «Ես կցանկանայի տեղափոխվել Կոլումբուս»։

Բրայան. «Դեպի Կոլումբուս մարդկանց ավելի մեծ ներհոսք ապահովելու համար մեկ այլ գաղափար ենք մտմտում. ուզում ենք մեր տներն օգտագործել որպես արվեստի պատկերասրահ կամ ընթրիքի ակումբ՝ ցուցադրելու տեղական նկարիչների աշխատանքները, որոնք գուցե չունենան իրենց գործերը ներկայացնելու այլ հնարավորություն։ Ուզում ենք յուրաքանչյուր տանը մի քանի կտավ ցուցադրել և մի քանի ամիսը մեկ փոխել։ Գործի դրեք երևակայությունը և մտածեք, թե ինչպես կարող է ձեր տունն արտացոլել տեղական համն ու հոտը»։

Բրայան. «Անկախ ձեր լավագույն մտադրություններից և 5 աստղանի փորձառություն պարգևելու ջանքերից՝ իմացեք, որ բախվելու եք արտակարգ իրավիճակների, և պետք է կարողանաք լուծում գտնել՝ լինի փչացած օդորակիչ, թե՝ հիասթափված հյուրեր։ Մի անգամ մեզ մոտ մեծ խողովակ էր պայթել․ դա մեզ հետ պատահած ամենավատ բանն էր։ Տունը հեղեղվել էր հյուրերի այցի ընթացքում։ Նրանք անընդհատ զանգում էին մեզ․․․»

Քեթրին. «... Բայց հեռախոսս նստած էր»։

Բրայան. «... Իսկ դա նրանց հարսանեկան գիշերն էր»։

Քեթրին. «Իրավիճակն իսկապես տհաճ էր։ Այն մեզ շատ բան սովորեցրեց։ Երբ նման բաներ պատահեն, ներողություն խնդրեք և գտեք լավագույն տարբերակը. արդյո՞ք դա հյուրին փոխհատուցելն է, թե՞ նվերները՝ թխվածքաբլիթներ, մեկ շիշ գինի կամ ընթրիքի համար նվեր-վկայական։ Եթե հյուրերն իսկապես վատ փորձառություն են ունեցել, մենք վերադարձնում ենք նրանց գումարը, բայց սովորաբար այդպես չի լինում»։

Բրայան «Մենք փորձում ենք մատուցել այնպիսի հյուրընկալության փորձառություն, ինչպիսին ինքներս կուզենայինք ունենալ մեր տարածքում մնալիս։ Հյուրընկալումը մեզ համար գեղարվեստական և ստեղծագործական արտահայտման ձև է։ Մենք մեր սիրտն ենք դնում այս տարածքների մեջ, հետո տալիս աշխարհին, որպեսզի մարդիկ օգտվեն դրանցից։ Մեզ համար այնքան մեծ նշանակություն ունի մեր հյուրերի կողմից գնահատանքի արժանանալը»։

Քեթրին. «5 աստղանի կարծիք ստանալը պարզապես հաստատում է, որ մեր ջանքերը զուր չեն։ Վերանորոգելիս հույս ենք ունենում, որ ինչ-որ մեկը կգնահատի մեր ներդրած լրացուցիչ ջանքերը։ Կարծում եմ՝ բացառապես անշարժ գույքի ներդրման թվերի վրա կենտրոնանալու դեպքում բաց կթողնեինք այս լրացուցիչ մանրամասները»։

Բրայան. «Հյուրընկալելը հեշտ չէ։ Դա մեծ ջանքեր է պահանջում»։

Քեթրին. «Բայց դա, միևնույն ժամանակ, հաճելի և շրջադարձային փուլ էր մեր կյանքում։ Դա մեզ թույլ տվեց խորանալ ինտերիերի դիզայնի ոլորտում և բացահայտել հյուրընկալության նկատմամբ մեր սերը։ Մենք հնարավորություն ունեցանք սկսելու մեր բիզնեսը և շարունակաբար աճելու։ Կարծում եմ, որ եթե չլիներ Airbnb-ն, մեզ համար շատ ավելի դժվար կլիներ փոքր բիզնես սկսելը և ոտքի կանգնելը։ Այն մեզ օգնեց գտնել մեր տեղը, գիտակցել, որ իսկապես սիրում ենք վերանորոգել տարածքները, որպեսզի ուրիշ մարդիկ վայելեն դրանք»։

Բրայան. «Մենք կարողացել ենք գործի գցել մեր ձեռնարկատիրական ոգին և նյութականացնել ստեղծագործական ունակությունները։ Հրաշալի է, երբ կարողանում ես անել մի բան, որը սիրում ես, և դրանից հաճույք ստանալ»։

Քեթրին. «Հուսով ենք, որ այս խորհուրդները կօգնեն ձեզ ավելի շատ 5 աստղանի կարծիք ստանալ»։

Մաղթում ենք հաջող հյուրընկալում։
Քեթրին, Բրայան + Բիանկա