Շրջակա միջավայրի համար ավելի անվնաս տուն ունենալու հեշտ ձևեր

Airbnb հյուրընկալողների գրեթե 80%-ը նշում է, որ կիրառել է էկոլոգիապես ավելի անվնաս առնվազն մեկ գործելակերպ։*

Ձեր տունն ու հյուրընկալման գործընթացը էկոլոգիապես ավելի անվնաս դարձնելը կարող է նվազեցնել ծախսերը, օգնել ձեր հայտարարությանը աչքի ընկնել և ոգեշնչել հյուրերին ձեր օրինակով։

Փորձեք հյուրընկալողների և մեր գործընկերների՝ Leave No Trace -ի և Բնության համաշխարհային հիմնադրամի խորհուրդները։

Փոքր փոփոխությունները կօգնեն էներգիա խնայել։

• Ավելացրեք երկարացման լարով բազմավարդակ բլոկ։ Հեռուստացույցները, DVD նվագարկիչները և ստերեո սարքերը սպասման ռեժիմում նույնպես էլեկտրաէներգիա են սպառում։ Միացրեք այս սարքերը երկարացման լարին, որպեսզի հեշտությամբ անջատեք դրանք՝ առանց վարդակից հանելու։** 
• Փոխեք լամպերը։ Ցածր հզորությամբ լամպերն ավելի քիչ ջերմություն են արտադրում և նվազեցնում են էներգիայի սպառումը։ Լուսադիոդային լամպերը սպառում են մինչև 90%-ով ավելի քիչ էներգիա և ծառայում են 25 անգամ ավելի երկար, քան ավանդական շիկացման լամպերը։**
• Պաշտպանեք ձեր տարածքը եղանակային պայմաններից։ Ջեռուցման և հովացման ծախսերը նվազեցնելու համար հերմետիկացրեք դռներն ու պատուհանները։
• Տեղադրեք խելացի թերմոստատ։ Wi-Fi-ի միջոցով կառավարվող թերմոստատները թույլ կտան սահմանել ջերմաստիճանը հեռակա կարգով և կարող են կարգավորվել՝ համապատասխանելու հյուրերի ժամանումներին ու մեկնումներին։ 
• Գնահատեք կենցաղային սարքերը։ Երբ գա դրանք փոխարինելու ժամանակը, ընտրեք բարձր էներգաարդյունավետության վարկանիշ ունեցողները։ Հին լվացքի մեքենան միջինում օգտագործում է մոտ 117 լիտր ջուր մեկ լվացքի համար, մինչդեռ ավելի նոր, բարձր արդյունավետության մոդելները օգտագործում են ընդամենը 49 լիտր մեկ անգամվա համար։**

Նախքան նոր բան գնելը փորձեք երկրորդ կյանք տալ առկա առարկաներին և իրերին։  

• Կահավորեք վերականգնված և օգտագործված իրերով։ Որոնեք որակյալ, վերականգնված կամ օգտագործված կահույք և պարագաներ տեղական անշարժ գույքի վաճառքներում, օգտագործված իրերի խանութներում և հնոտիքի շուկաներում։
• Վերանորոգեք նախքան փոխարինելը։ Նոր երեսքաշված աթոռը կամ թարմացված կոմոդը կարող են ավելի երկար ծառայել, քան նորերը, և ձեր տանն ավելի շատ ինքնատիպություն հաղորդել, քան խանութից գնված ստանդարտ իրերը։
• Նվիրաբերեք այն, ինչ ձեզ պետք չէ։ Եթե դուք թարմացնում եք սենյակը, սարքին վիճակում գտնվող կահույքը, սպիտակեղենը կամ էլեկտրոնային սարքերը հանձնեք վերաօգտագործման տեղական կազմակերպությանը։

Մաքուր քաղցրահամ ջուրը սահմանափակ ռեսուրս է։ Կարող եք ձեռնարկել պարզ գործողություններ՝ այն ավելի քիչ օգտագործելու համար։

• Ստուգեք՝ արդյոք չկա արտահոսք։ Արտահոսող ծորակի պատճառով տարեկան կարող է 11 356 լիտրից ավելի ջուր վատնվել։** Պարբերաբար ստուգեք զուգարանները, ծորակները և սարքերը։ Ջրի խելացի հաշվիչները կարող են հետևել ջրի օգտագործմանը և զգուշացնել հնարավոր արտահոսքերի մասին։
• Տեղադրեք ջրի հոսքը նվազեցնող հարմարանքներ։ Դրանք կարող են ներառել ջրի հոսքը նվազեցնող ծորակներ և ցածր հոսքով կամ երկռեժիմ ջրթողմամբ զուգարանակոնքեր։ 1992 թվականի կամ ավելի վաղ արտադրության զուգարանները մեկ ջրթողման համար օգտագործում են 13-ից 26 լիտր ջուր, մինչդեռ ավելի նոր, ավելի արդյունավետ մոդելները՝ 5 լիտրից պակաս։*
• Ընտրեք էներգաարդյունավետ կարգավորումներ։ Հյուրերին հորդորեք օգտագործել արագ լվացման կամ էկո կարգավորումները լվացքի և ամանալվաց մեքենաներում, եթե ձեր տունն ունի այդ հարմարությունները։
• Հիշեցումներ թողեք հյուրերի համար։ Պատրիսիան, որը սուպերտանտեր է Ֆիլիպինների Մանիլա քաղաքում, իր լոգասենյակում գրություն է փակցրել, որով հյուրերին խնդրում է խելամտորեն օգտագործել ջուրը և վերաօգտագործել սրբիչները։

*Հաշվարկը հիմնված է 2024 թվականի սեպտեմբերից մինչև 2025 թվականի մայիսն ընկած ժամանակահատվածում ամբողջ աշխարհում ավելի քան 77 000 հյուրընկալողների շրջանում Airbnb-ի անցկացրած հարցման վրա։

**Ըստ Բնության համաշխարհային հիմնադրամի Կանաչ խորհուրդների։ 

Այս հոդվածում պարունակվող տեղեկությունները կարող են փոխված լինել հրապարակումից հետո։