Ինչպես ընտրել չեղարկման կանոններ

Ճանապարհորդները ճկուն պայմաններ են ուզում։ Airbnb-ի հյուրերի 44%-ը նշում է, որ ամրագրումն անվճար չեղարկելու հնարավորությունը իրենց համար մնալու տեղի ընտրության հիմնական գործոններից մեկն է։* Ահա թե ինչու որոնման արդյունքներում առանձնացվում են այն հայտարարությունները, որոնց դեպքում ամրագրումից հետո անվճար չեղարկման ժամանակահատվածը 48 ժամից ավելի է։ 

Չեղարկման համապատասխան կանոնները կարող են նպաստել ձեր նպատակների իրագործմանը՝ միևնույն ժամանակ գրավելով ամրագրումներ։ Ընտրեք ստանդարտ կամ երկարաժամկետ ամրագրումների չեղարկման կանոններ, որոնք հարմար են ձեզ։ Կարող եք ցանկացած պահի թարմացնել ձեր կանոնները։**

Չեղարկման ստանդարտ կանոնները գործում են անընդմեջ 27 գիշեր կամ ավելի կարճ տևողությամբ ամրագրումների նկատմամբ։

• Ճկուն․ հյուրերը կարող են ամբողջ գումարի վերադարձով չեղարկել ժամանումից ոչ ուշ, քան 24 ժամ առաջ, և դուք վճարում չեք ստանա։ Եթե չեղարկման պահին 24 ժամից պակաս մնա ժամանմանը, կամ հյուրերն այդպես էլ չժամանեն, ապա ձեզ կվճարվի առաջին գիշերվա համար։ Եթե չեղարկեն ժամանումից հետո, ապա ձեզ կվճարվի նրանց անցկացրած յուրաքանչյուր գիշերվա համար՝ գումարած 1 լրացուցիչ գիշեր։
• Չափավոր․ հյուրերը կարող են ամբողջ գումարի վերադարձով չեղարկել ժամանումից ոչ ուշ, քան 5 օր առաջ, և դուք վճարում չեք ստանա։ Եթե չեղարկեն դրանից հետո, ապա ձեզ կվճարվի նրանց անցկացրած յուրաքանչյուր գիշերվա համար՝ գումարած 1 լրացուցիչ գիշեր և բոլոր չօգտագործված գիշերների 50%-ը։
• Սահմանափակ. հյուրերը կարող են ամբողջ գումարի վերադարձով չեղարկել ժամանումից ոչ ուշ, քան 14 օր առաջ, և դուք վճարում չեք ստանա։ Եթե չեղարկեն ժամանումից 7-ից 14 օր առաջ, ձեզ կվճարվի բոլոր գիշերների արժեքի 50%-ը։ Եթե չեղարկեն ժամանումից ավելի ուշ, քան 7 օր առաջ, ապա ձեզ կվճարվի բոլոր գիշերների արժեքի 100%-ը։
• Կոշտ. հյուրերը կարող են չեղարկել ժամանումից ոչ ուշ, քան 30 օր առաջ, և դուք վճարում չեք ստանա։ Եթե չեղարկեն ժամանումից 7-ից 30 օր առաջ, ձեզ կվճարվի բոլոր գիշերների արժեքի 50%-ը։ Եթե չեղարկեն ժամանումից ավելի ուշ, քան 7 օր առաջ, ապա ձեզ կվճարվի բոլոր գիշերների արժեքի 100%-ը։

Բոլոր ստանդարտ կանոնների դեպքում հյուրերը գումարն ամբողջությամբ հետ են ստանում ամրագրումից հետո 24 ժամվա ընթացքում, եթե չեղարկումը կատարվում է ժամանումից առնվազն 7 օր առաջ։

Որոշ հյուրընկալողներ ավելի շատ գումար են վաստակում՝ չեղարկման ստանդարտ կանոններում ավելացնելով առանց գումարի վերադարձի տարբերակ։ Դա հյուրերին թույլ է տալիս ընտրել ավելի խիստ կանոններ զեղչված գնով՝ սովորաբար ստանալով 10% զեղչ հիմնական գնից։ Եթե նրանք չեղարկեն ամրագրումը, դուք կստանաք ձեր ամբողջ վերջնավճարը բոլոր ամրագրված գիշերների համար։

Ձեր երկարաժամկետ ամրագրման չեղարկման կանոնները գործում են նվազագույնը մեկ ամիս (առնվազն 28 անընդմեջ գիշեր) տևողությամբ ամրագրումների դեպքում։

• Կոշտ. հյուրերը կարող են ամբողջ գումարի վերադարձով չեղարկել ժամանումից ամենաուշը 30 օր առաջ։ Եթե հյուրը չեղարկի դրանից հետո, ձեզ կվճարվի անցկացրած բոլոր գիշերների արժեքի 100%-ը՝ գումարած 30 լրացուցիչ գիշեր։ Եթե հյուրի կողմից չեղարկման պահին 30 գիշերից պակաս ժամանակ մնա ամրագրման ավարտին, ապա ձեզ կվճարվի մնացած բոլոր գիշերների արժեքի 100%-ը։
• Խիստ․ հյուրերը կարող են ամբողջ գումարի վերադարձով չեղարկել ամրագրումից հետո 48 ժամվա ընթացքում և ժամանումից առնվազն 28 օր առաջ։ Եթե հյուրը չեղարկի դրանից հետո, ձեզ կվճարվի բոլոր օգտագործված գիշերների արժեքի 100%-ը՝ գումարած 30 լրացուցիչ գիշեր՝ ամրագրման ամսաթվից հաշված։ Եթե հյուրի կողմից չեղարկման պահին 30 գիշերից պակաս ժամանակ մնա ամրագրման ավարտին, ապա ձեզ կվճարվի մնացած բոլոր գիշերների արժեքի 100%-ը։

Մաքրման վճարներն ամբողջությամբ վերադարձվում են, եթե հյուրը չեղարկում է անվճար չեղարկման ժամանակահատվածում։ Դրանից հետո չեղարկելու դեպքում մաքրման վճարը համարվում է մեկ գիշերվա գնի մաս, և որևէ գումարի վերադարձ կախված է ձեր չեղարկման կանոններից։***

Մտածեք ձեր կարիքների, նպատակների և իդեալական հյուրերի մասին և ընտրեք այդ ամենին լավագույնս համապատասխանող կանոններ։ Հյուրերին գրավելու համար սկսեք չեղարկման՝ ձեր հյուրընկալման բիզնեսի համար կիրառելի առավել ճկուն կանոններից։

Ճկուն կանոնները կարող են համապատասխան լինել, եթե՝

• Այդ պահին «մեռյալ» սեզոն է, և դուք ցանկանում եք գրավել ճամփորդական ճկուն պլաններ ունեցող հյուրերի։
• Այդ պահին պիկ սեզոն է, և դուք վստահ եք, որ հյուրի չեղարկելու դեպքում կստանաք ձեր տարածքի նոր ամրագրում։
• Ձեր տարածքը գտնվում է մրցունակ վայրում, և ուշ չեղարկումները չեն անհանգստացնում ձեզ։

Չափավոր կանոնները կարող են համապատասխան լինել, եթե՝

• Ուզում եք բացառել վերջին պահին չեղարկումները։
• Գերադասում եք ունենալ որոշ ժամանակ, որպեսզի ստանաք մեկ այլ ամրագրում, եթե հյուրը չեղարկի։
• Ուզում եք գրավել բիզնես ուղևորների և այլ հյուրերի, որոնց անհրաժեշտ է փոխհատուցելի ամրագրումներ անել։

Սահմանափակ կանոնները կարող են համապատասխան լինել, եթե՝

• Ուզում եք խուսափել չեղարկումներից, բայց դրանք խնդրահարույց չեն, եթե ծանուցումը ստացվում է առնվազն 2 շաբաթ առաջ։ 
• Ցանկանում եք ունենալ որոշ ժամանակ, որպեսզի ստանաք մեկ այլ ամրագրում, եթե հյուրը չեղարկի։
• Ձեր տարածքն ունի մեծ պահանջարկ, բայց դուք ցանկանում եք գրավել ճկուն պայմաններ փնտրող հյուրերի։

Կոշտ կանոնները կարող են համապատասխան լինել, եթե՝

• Ուզում եք խուսափել չեղարկումներից, բայց դրանք խնդրահարույց չեն, եթե ծանուցումը ստացվում է առնվազն 30 օր առաջ։ 
• Ձեզ անհրաժեշտ է ավելի շատ ժամանակ, որպեսզի ստանաք մեկ այլ ամրագրում, եթե հյուրը չեղարկի։
• Ձեր տարածքը պահանջված է կլոր տարի։

*Հաշվարկը հիմնված է 2024 թվականին աշխարհի 11 երկրներից ճանապարհորդների շրջանում Airbnb-ի անցկացրած հարցման վրա։

**Կարող են լինել հատուկ դեպքեր, երբ ձեր հայտարարության նկատմամբ կիրառվեն չեղարկման այլ կանոններ։ Իմանալ ավելին

***2025 թ. ապրիլի 21-ից առաջ կատարված ամրագրումների դեպքում մաքրման վճարներն ամբողջությամբ վերադարձվում են, եթե հյուրը չեղարկում է ժամանումից առաջ՝ անկախ չեղարկման կանոններից։

Այս հոդվածում պարունակվող տեղեկությունները կարող են փոխված լինել հրապարակումից հետո։