Ինչպես ընտրել և ավելացնել բարձրորակ լուսանկարներ
Հյուրերը հաճախ հիմնվում են լուսանկարների վրա, երբ որոշում են, թե ինչ ամրագրեն Airbnb-ում։ Փորձառության լուսանկարները պետք է գրավեն ուշադրություն, ձևավորեն հստակ ակնկալիքներ և առաջացնեն հուզմունք։
Կենտրոնացեք որակի վրա
Յուրաքանչյուր լուսանկար պետք է լինի բարձրորակ։ Յուրաքանչյուր պատկերի լուծաչափը պետք է լինի 800 x 1200 պիքսել, իսկ ֆայլի մեծությունը՝ մինչև 10 մեգաբայթ։ Այսպիսի արդյունքներ կարելի է ստանալ սմարթֆոններից շատերի տեսախցիկների միջոցով։
Ներկայացրեք լուսանկարներ, որոնք՝
- դուք եք նկարահանել կամ օգտագործում եք թույլտվությամբ
- գունավոր են, ոչ թե սև ու սպիտակ
- լավ լուսավորված են, նախընտրելի է՝ բնական լույսով
- ունեն պարզ կոմպոզիցիա և ֆոն
- կիզակետված են, գլխավոր սուբյեկտը՝ կենտրոնում
- համադրում են խոշոր պլանով նկարահանված տարրեր և ավելի լայն կոմպոզիցիաներ
Մի ներկայացրեք լուսանկարներ, որոնք՝
- մութ են, կամ օգտագործվել է ինտենսիվ լուսաբռնկում
- աղոտ, հատիկավոր կամ ցածր լուծաչափով են
- խիստ փոփոխված, ֆիլտրված կամ աղավաղված են
- սելֆիներ կամ անբնական կեցվածքով նկարներ են
- կոլաժներ են
- նույն լուսանկարի մի քանի տարբերակ են
- պատկերանշանների կամ ապրանքանիշերի պատկերներ են
Եթե անհրաժեշտ են այլ լուսանկարներ, ընկերներին կամ ընտանիքի անդամներին խնդրեք լուսանկարել՝ հաշվի առնելով այս խորհուրդները։ Կամ խնդրեք հյուրերին տրամադրել իրենց լավագույն լուսանկարները և թույլ տալ դրանք օգտագործել ձեր հայտարարությունում։
Ավելացրեք հիանալի պատկերներ
Ներկայացրեք 5 կամ ավելի շատ լուսանկարներ՝ այնքան, որքան անհրաժեշտ է հետաքրքրություն առաջացնելու և հստակ ակնկալիքներ ձևավորելու համար։
Լուսանկարները ցուցադրվում են փորձառության հայտարարությունների մեջ 3 տեղում՝ վանդակացանցում, ձեր ուղեպլանում և լուսանկարների պատկերասրահում։ Նաև կարող եք ընտրել շապիկի աչքի ընկնող լուսանկար, որը հյուրերը կտեսնեն Airbnb-ում որոնման արդյունքներում։
Մենք կուսումնասիրենք ձեր ներկայացրած լուսանկարները և կհաստատենք մեր ստանդարտներին համապատասխանող պատկերները։ Ահա թե ինչ պետք է ներկայացնեք յուրաքանչյուր բաժնի համար։
Վանդակացանց։Հայտարարության վերին մասում պատկերված չորս լուսանկարները կոչվում են վանդակացանց։ Լուսանկարներում պատկերեք՝
- գլխավոր միջոցառմանը մասնակցող հյուրերի
- ձեզ՝ որպես փորձառությունն անցկացնողի
- որևէ կարևոր տարր, օրինակ՝ խոշոր պլանով սարքավորում կամ բաղադրատարր
- տեղադրությունը, օրինակ՝ շրջակայքը ցույց տվող լայնանկյուն կադր
Ձեր ուղեպլանը։ Ուղեպլանը գործողությունների կարճ ծրագիր է, որը հյուրերին օգնում է որոշել՝ արդյոք փորձառությունը հարմար է իրենց։ Ուղեպլանի լուսանկարները փոքր են, ուստի ընտրեք պարզ ֆոնով հասարակ տեսարաններ։ Լուսանկարներում պատկերեք՝
- պահեր, որոնք համապատասխանում են ձեր գրած նկարագրություններին
- մարդկանց, առարկաներ և այլ դյուրըմբռնելի մանրամասներ
Լուսանկարների պատկերասրահ։ Հյուրերը կարող են ձեր տրամադրած բոլոր պատկերները դիտել պատկերասրահում։ Պատկերասրահը պետք է ցույց տա, թե ինչն է գրավիչ և հիշարժան դարձնում փորձառությունը։ Լուսանկարներում պատկերեք՝
- ձեզ հետ շփվող հյուրերի, համահյուրընկալողների և այլ հյուրերի
- տարբեր անկյուններից, նաև հյուրերի դիտանկյունից նկարահանված միջոցառումներ
- իրեր, որոնք հյուրերը կարող են տուն տանել որպես հուշանվեր
Անպայման ունեցեք ձեր ներկայացրած լուսանկարներն օգտագործելու թույլտվություն, և համոզվեք, որ պատկերները ճշգրտորեն են արտացոլում փորձառությունը։
Բոլոր հյուրընկալողները, լուսանկարները և տարածքի մանրամասները պետք է համապատասխանեն Airbnb փորձառությունների համար սահմանված ստանդարտներին և պահանջներին։
Այս հոդվածում պարունակվող տեղեկությունները կարող են հրապարակումից հետո փոխված լինել։