Հատուկ կարիքներ ունեցող հյուրերի համար փորձառություններ կազմակերպելու վերաբերյալ խորհուրդներ
Airbnb-ն աշխատում է գտնել ավելի ներառական հարթակ դառնալու ուղիներ, որտեղ ամեն ոք կարող է հաճույքով մասնակցել որևէ փորձառության։ Հնարավոր է, որ հաշմանդամություն ունեցող անձինք պահանջեն ուղեկցող անհատի ներկայություն փորձառությանը, որպեսզի կարողանան լիարժեքորեն մասնակցել, օրինակ՝ թարգմանիչ խուլ կամ լսողության խնդիր ունեցող հյուրի համար կամ անձնական խնամող-օգնական՝ անվասայլակից օգտվողի համար։ Airbnb-ում մենք այդ անհատին կոչում ենք ուղեկից։
Ուղեկիցները կարող են տարբեր կերպ կոչվել աշխարհի տարբեր մասերում, բայց, Airbnb փորձառությունների նպատակների համար, մենք ուղեկից ենք համարում 18-ից բարձր տարիքի անձի, որը կանոնավորապես օգնում է հաշմանդամություն, հոգեկան հիվանդություն կամ ամենօրյա գործունեություն պահանջող երկարատև հիվանդություն ունեցող անձի։
Ուղեկիցները կարող են կատարել մի շարք առաջադրանքներ, այդ թվում՝ անձնական խնամքի ապահովում, առաջադրանքների կատարում տանը կամ դրսում և փոխադրման ու բժշկական օգնության կազմակերպում։ Ուղեկցի պարտականություններ կատարելու համար նշանակված անձինք պետք է կարողանան անհրաժեշտ օգնություն ցուցաբերել հաշմանդամություն ունեցող անձին։
Ուղեկիցները կարող են փորձառության ընթացքում աջակցություն տրամադրել հետևյալ կերպ (նշված դեպքերը սպառիչ չեն)․
- օգնել հյուրին տեղաշարժվել փորձառության անցկացման վայրում
- օգնել հյուրին հաղորդակցվել հյուրընկալողի կամ այլ հյուրերի հետ
- ուղեկցել հյուրին դեպի զուգարան և (կամ) զուգարաններից օգտվելիս
- օգնել հյուրին գնումներ կատարել
- օգնել հյուրին մասնակցել գործընթացներին սեմինարի կամ դասի ընթացքում
- օգնել հյուրին ուտել կամ խմել
Պարտադիր չէ, որ ուղեկիցները՝
- ապրեն խնամառուի հետ
- վճարվեն իրենց ժամանակի համար
- անցնեն հատուկ վերապատրաստում
Փորձառություններին մասնակցելու կանոններ ուղեկիցների համար
Airbnb փորձառություններ հյուրընկալողները կարող են ուղեկիցներին թույլ տալ առանց լրացուցիչ վճարների միանալ այն հյուրերին, որոնց օգնում են։
Երբ ուղեկցի կարիք ունեցող հյուրը փորձառություն է ամրագրում այս տարբերակը միացված լինելու դեպքում, ուղեկցից գումար չի գանձվի, և նրա մուտքը չի համարվի առանձին նստատեղ։
Հյուրին ուղեկցող օգնականները՝
- ամրագրող հյուրից առանձին ակտիվորեն չեն մասնակցում փորձառությանը, այսինքն՝ նրանց չեն տրամադրվում անձնական օգտագործման պարագաներ, սարքավորումներ և այլն
- ընկերներ կամ ընտանիքի անդամներ չեն, որոնք ցանկանում են հյուրի «պոչից կպած» մասնակցել փորձառությանը
- երեխաների խնամքի ծառայություններ մատուցողներ չեն, օրինակ՝ դաստիարակ, տնային աշխատող կամ դայակ
Հյուրընկալողների համար
Որպեսզի միացնեք այս կարգավորումը ֆիզիկական մասնակցությամբ փորձառության համար, բացեք Ձեր փորձառությունները, ընտրեք Փոփոխել, հետո գնացեք Գնի կարգավորումներ > Գներ հյուրերի համար։
Այս կարգավորումը միացված լինելու դեպքում փորձառություն ամրագրելիս հյուրերից կպահանջվի կապվել հյուրընկալողի հետ, որպեսզի տեղեկացնեն, որ փորձառությանը մասնակցելու են ուղեկցի հետ, և քննարկեն լրացուցիչ մանրամասներ։
Ուղեկցից գումար չի գանձվի, նրա մուտքը չի համարվի առանձին նստատեղ, և նրա մասնակցությունը չի ներառվի խմբի սահմանաչափի կամ գնագոյացման հաշվարկներում։ Եթե ձեր փորձառությունը ներառում է խմբի ընդհանուր չափը սահմանափակող գործոններ, օրինակ՝ փոխադրամիջոցներ կամ տոմսեր, գուցե անհրաժեշտ լինի այս մանրամասները հյուրի հետ քննարկել նախքան փորձառության մեկնարկը։
Հյուրերի համար
Կարող եք որոնել ֆիզիկական մասնակցությամբ փորձառություններ, որոնցում ուղեկիցներին տրամադրվում է անվճար մուտք։ Ըստ տեղադրության և ամսաթվի նախնական Airbnb փորձառությունների որոնում կատարելուց հետո ընտրեք Այլ զտիչներ և բացեք Ընտրել հարմարություններ հատուկ կարիքներով անձանց համար, որպեսզի ցուցադրվեն որոնման համար մատչելի զտիչները։
Ուղեկիցներին տրամադրվող անվճար մուտքով փորձառություն ամրագրելիս կապվեք հյուրընկալողի հետ, որպեսզի տեղեկացնեք, որ մասնակցելու եք ուղեկցի հետ, և քննարկեք լրացուցիչ մանրամասներ։ Ենթադրվում է հյուրի և ուղեկցի 1:1 հարաբերակցություն. խոսեք հյուրընկալողի հետ՝ որոշելու, թե ինչ է հնարավոր կոնկրետ փորձառության դեպքում։