Առաջարկները կցուցադրվեն որոնման հարցումը մուտքագրելուց հետո։ Առաջարկներին ծանոթանալու համար օգտագործեք վեր և վար սլաքները։ Ընտրելու համար սեղմեք Enter։ Եթե ընտրել եք բառակապակցություն, ապա որոնման կներկայացվի այդ բառակապակցությունը։ Եթե առաջարկը հղում է, դիտարկիչում կբացվի այդ էջը։
Համայնքի քաղաքականությունը

Խոշոր կործանարար իրադարձությունների վերաբերյալ քաղաքականություն

Այս քաղաքականությունը թարմացվում է։ Նոր քաղաքականությունը ցուցադրվում է այս էջի վերևում և կիրառվելու է բոլոր ամրագրումների նկատմամբ, որոնք կկատարվեն 2024 թ․ հունիսի 6-ին կամ դրանից հետո՝ բացառությամբ այն դեպքերի, երբ Airbnb-ն այլ բանի մասին է տեղեկացրել օգտատերերին։ Գործող քաղաքականությունը ցուցադրվում է էջի ներքևում և կիրառվում է ավելի վաղ ամրագրումների նկատմամբ։

Ուժի մեջ մտնելու ամսաթիվը՝ 2024 թ․ հունիսի 6

Ընդհանուր տեղեկություններ

Airbnb-ի ամրագրումների չեղարկումներն ու գումարի վերադարձը հիմնականում կարգավորվում են հայտարարության չեղարկման կանոններով։ Հազվադեպ հանգամանքներում, երբ լայնամասշտաբ իրադարձությունները անհնար են դարձնում կամ օրենքով արգելում են ամրագրման ավարտումը, կարող է կիրառվել Խոշոր կործանարար իրադարձությունների վերաբերյալ քաղաքականությունը («Քաղաքականություն»)։ Այս քաղաքականության կիրառման դեպքում հյուրերը կարող են չեղարկել իրենց ամրագրումը և ստանալ գումարի վերադարձ, ճամփորդական բոնուս և (կամ) այլ տեսակի հատուցում՝ անկախ ամրագրման չեղարկման կանոններից, իսկ հյուրընկալողները կարող են չեղարկել առանց վճարների և այլ բացասական հետևանքների, թեև չեղարկված ամրագրման ամսաթվերը տարածքի օրացույցում կարգելափակվեն։

Այս քաղաքականությունը վերաբերում է և՛ կացարանների, և՛ փորձառությունների ամրագրումներին, և կիրառվում է ընթացիկ կամ ուժի մեջ մտնելու ամսաթվին կամ դրանից հետո ժամանմամբ ամրագրումների նկատմամբ՝ բացառությամբ այն դեպքերի, երբ Airbnb-ն այլ բանի մասին է տեղեկացրել օգտատերերին։ Խոշոր կործանարար իրադարձությունների վերաբերյալ քաղաքականությունը ապահովագրություն չէ։

Ինչ իրադարձություններ են ընդգրկված

Քաղաքականությունը գործում է հետևյալ իրադարձությունների դեպքում, եթե դրանք ազդում են ձեր ամրագրած տարածքի գտնվելու վայրի վրա, տեղի են ունենում ամրագրումից հետո և անհնար կամ անօրինական են դարձնում ապագա կամ ընթացիկ ամրագրման ավարտումը (այս քաղաքականության մեջ նշվում է որպես «իրադարձություններ»)՝

Առողջապահության ոլորտում հայտարարված արտակարգ իրավիճակներ և համաճարակներ։ Կառավարության կողմից հայտարարված համաճարակներ, համավարակներ և առողջապահության ոլորտում արտակարգ իրավիճակներ։ Դա չի ներառում էնդեմիկ հիվանդությունները (օրինակ՝ գրիպը) կամ սովորաբար որևէ տարածաշրջանի հատուկ հիվանդությունները (օրինակ՝ մալարիան Թաիլանդում)։ Խոշոր կործանարար իրադարձությունների վերաբերյալ քաղաքականությունը չի տարածվում COVID-19-ի վրա։

Կառավարության կողմից սահմանված ճամփորդական սահմանափակումներ։ Պետական մարմնի կողմից սահմանված պարտադիր սահմանափակումներ, օրինակ՝ տարհանման վերաբերյալ կարգադրություն։ Դա չի ներառում ոչ պարտադիր ճամփորդական նախազգուշացումները և պետական մարմինների նմանատիպ ցուցումները։

Ռազմական և այլ թշնամական գործողություններ։ Ռազմական գործողություններ, թշնամական գործողություններ, արշավանքներ, քաղաքացիական պատերազմ, ահաբեկչություն, պայթյուններ, ռմբակոծություններ, ապստամբություններ, զանգվածային անկարգություններ և խռովություններ։

Կենսապահովման հիմնական համակարգերի խոշորամասշտաբ խափանումներ։ Հիմնական կոմունալ ծառայությունների, օրինակ՝ ջեռուցման, ջրամատակարարման և էլեկտրամատակարարման երկարատև անջատումներ, որոնք ազդում են տվյալ վայրում գտնվող տների ճնշող մեծամասնության վրա։

Բնական աղետներ։ Բնական աղետներ և այլ վտանգավոր եղանակային երևույթներ։ Եղանակային կամ բնական պայմանները, որոնք կանխատեսելի լինելու համար բավականաչափ սովորական են այդ վայրում, օրինակ՝ Ֆլորիդայում փոթորիկների սեզոնում տեղի ունեցող փոթորիկները, ընդգրկվում են միայն այն դեպքում, երբ դրանք առաջացնում են այս քաղաքականության մեջ ընդգրկված մեկ այլ իրադարձություն, որն անհնար է դարձնում ամրագրման ավարտումը, օրինակ, պարտադիր տարհանման վերաբերյալ կարգադրության կամ կենսապահովման հիմնական համակարգերի խոշորամասշտաբ խափանումների դեպքում։

Ինչ է տեղի ունենում, եթե ամրագրման վրա ազդում է ընդգրկված իրադարձությունը

Երբ տեղի է ունենում խոշորամասշտաբ իրադարձություն, մենք գնահատում ենք իրավիճակը՝ պարզելու, թե արդյոք կիրառվում է Խոշոր կործանարար իրադարձությունների վերաբերյալ քաղաքականությունը։ Այդ դեպքում մենք ակտիվացնում ենք քաղաքականությունը ազդեցության ենթարկված տարածքի և ժամկետների համար՝ ակնկալելով, որ իրադարձության հետևանքով ամրագրումների ավարտումը օրենքով կարգելվի կամ անհնարին կդառնա։ Սահմանված տարածքից և ժամկետներից դուրս ամրագրումները կարող են պահանջներին չհամապատասխանել, թեև հյուրընկալողները առանց բացասական հետևանքների կարող են չեղարկել, եթե չկարողանան հյուրընկալել։ Մենք շարունակաբար հետևում ենք այս իրավիճակներին և անհրաժեշտության դեպքում կարգավորում ենք ընդգրկույթը՝ փոփոխվող պայմաններն արտացոլելու համար։ Եթե կարծում եք, որ այս քաղաքականությունը վերաբերում է ձեր ամրագրմանը, դիմեք մեզ՝ պահանջներին համապատասխանելու վերաբերյալ տեղեկություններ ստանալու համար։

Ինչն ընդգրկված չէ

Մենք հասկանում ենք, որ ձեր վերահսկողությունից դուրս գտնվող այլ հանգամանքներ կարող են խաթարել ձեր ծրագրերը։ Այստեղ չնշված ցանկացած այլ իրավիճակում ձեր ամրագրումը կարգավորվում է հյուրընկալողի հայտարարության չեղարկման կանոններով։

Սույն քաղաքականության մեջ չընդգրկված իրադարձությունների ընդհանուր օրինակներ են՝

  • Իրադարձություններ, որոնք ազդում են հյուրի կամ նրա ճանապարհորդելու հնարավորության, բայց ոչ ամրագրած տարածքի գտնվելու վայրի վրա
  • Չնախատեսված վնասվածք կամ հիվանդություն
  • Պետական օրենքներով պայմանավորված պարտավորությունները, օրինակ՝ երդվյալ ատենակալի պարտականությունները կամ դատարան ներկայանալը
  • Ոչ պարտադիր ճամփորդական նախազգուշացումներ կամ պետական այլ ցուցումներ, որոնք չեն համարվում ճամփորդության արգելք կամ կանխում
  • Միջոցառման չեղարկում կամ ամսաթվի փոփոխություն, որի համար կատարվել է ամրագրումը
  • Տրանսպորտի աշխատանքի խափանումներ, որոնք կապված չեն ընդգրկված իրադարձությունների հետ, օրինակ՝ ավիաընկերության սնանկացում, տրանսպորտային գործադուլներ և ճանապարհների փակում տեխնիկական սպասարկման պատճառով

Այն ամրագրումների համար, որոնք ընդգրկված չեն քաղաքականության մեջ, հյուրերին և հյուրընկալողներին հորդորում ենք գտնել փոխադարձաբար ընդունելի պայմանավորվածություն, օրինակ՝ գումարի լրիվ կամ մասնակի վերադարձ կամ ամրագրման ամսաթվերի փոփոխություն։ Նկատի ունեցեք, որ ամրագրման չեղարկման կանոններից դուրս ցանկացած գումարի վերադարձ կատարվում է հյուրընկալողի հայեցողությամբ։ Airbnb-ն այդպիսի դեպքերում չի միջամտում և չի երաշխավորում գումարի վերադարձ։

Ինչպես է այս քաղաքականությունն ազդում հյուրընկալողների վրա

Եթե ամրագրման նկատմամբ կիրառվում է Խոշոր կործանարար իրադարձությունների քաղաքականությունը, հյուրընկալողները կարող են չեղարկել առանց վճարների և այլ բացասական հետևանքների։ Եթե հյուրընկալողը չեղարկի այս քաղաքականության համաձայն, չեղարկված ամրագրման ամսաթվերը նրա հայտարարության օրացույցում կարգելափակվեն։ Եթե ամրագրումը չեղարկվում է սույն քաղաքականության համաձայն, ապա հյուրընկալողը վերջնավճար չի ստանում ամրագրման չեղարկված ամսաթվերի համար, կամ, եթե վերջնավճարն արդեն կատարվել է, վերադարձվող գումարը պահվում է հաջորդ վերջնավճարից (վերջնավճարներից)։

Անկախ այն բանից, թե արդյոք ամրագրման համար կիրառվում է այս քաղաքականությունը, հյուրընկալողներն առանց վճարների և այլ բացասական հետևանքների կարող են չեղարկել որոշակի հիմնավոր պատճառներով, օրինակ՝ տարածքին հասցված խոշոր վնասի պատճառով։ Հյուրընկալողները պարտավոր են չեղարկել, եթե իրենց տարածքը պիտանի չէ բնակության համար կամ չի համապատասխանում հյուրի ամրագրածին։ Դա չանելը կարող է հանգեցնել հայտարարության հեռացմանը, առկա ամրագրումների չեղարկմանը և հյուրերին գումարի վերադարձին, քանի դեռ տարածքը պիտանի չէ բնակության համար և չի համապատասխանում տարածքի նկարագրությանը։ Դա չանելը նաև խախտում է հյուրընկալողների համար սահմանված հիմնական կանոնները և կարող է հանգեցնել հետևանքների, ընդհուպ մինչև հաշվի հեռացմանը։

Այլ տեղեկություններ

Այս քաղաքականությունը չի սահմանափակում հյուրընկալողների և հյուրերի՝ տեղական կանոնակարգերով սահմանված իրավունքները, և այս քաղաքականության շրջանակներում Airbnb-ի ցանկացած որոշում չի ազդում նրանց օրինական իրավունքների վրա։

Հարգելի պատճառների կիրառման քաղաքականություն

Ուժի մեջ մտնելու ամսաթիվը՝ 2021 թ․ հունվարի 20

Ընդհանուր տեղեկություններ

Սույն Հարգելի պատճառների կիրառման քաղաքականությունը բացատրում է, թե ինչպես են կատարվում չեղարկումները, երբ ամրագրումից հետո ծագում են անկանխատեսելի իրադարձություններ, որոնք անվերահսկելի և անիրագործելի են կամ անօրինական են դարձնում ամրագրումն ավարտին հասցնելը։ Այս քաղաքականությունը վերաբերում է և՛ կացարանների, և՛ փորձառությունների ամրագրմանը։

Երբ քաղաքականությունը թույլ է տալիս չեղարկում, այն կարգավորում է ամրագրման չեղարկման կանոնները և գերակայություն է ստանում դրանց նկատմամբ։ Սույն քաղաքականության մեջ ընդգրկված իրադարձությունից տուժած հյուրերը կարող են չեղարկել իրենց ամրագրումը և, հանգամանքներից կախված, հետ ստանալ գումարը, ստանալ ճամփորդական բոնուս և (կամ) այլ հատուցում։ Սույն քաղաքականության մեջ ընդգրկված իրադարձությունից տուժած հյուրընկալողները կարող են չեղարկել առանց հետևանքների, բայց, հանգամանքներից կախված, հնարավոր է, որ չեղարկված ամրագրման ամսաթվերն արգելափակվեն նրանց օրացույցներում։

Ինչ իրադարձություններ են ընդգրկված

Այս քաղաքականության մեջ օգտագործվում է «իրադարձություն» եզրույթը, որը վերաբերում է այն իրավիճակներին, որոնք առաջանում են ամրագրումից հետո, անկանխատեսելի են ամրագրման պահին և անհնար են դարձնում կամ օրենքով արգելում են ամրագրման ավարտումը։

Կառավարության կողմից ճանապարհորդությունների նկատմամբ սահմանված պահանջների փոփոխություններ։ Պետական գործակալության կողմից սահմանված վիզային կամ անձնագրային պահանջների անսպասելի փոփոխություններ, որոնք թույլ չեն տալիս ճանապարհորդել դեպի նպատակակետ։ Դա չի ներառում կորած կամ ժամկետանց ճանապարհորդական փաստաթղթերը կամ հյուրի ճանապարհորդելու թույլտվությանն առնչվող այլ անձնական հանգամանքներ։

Հայտարարված արտակարգ իրավիճակներ և համաճարակներ։ Կառավարության կողմից հայտարարված տեղական կամ համերկրային մասշտաբի արտակարգ իրավիճակներ, համաճարակներ, համավարակներ և առողջապահության ոլորտում արտակարգ իրավիճակներ։ Դա չի ներառում էնդեմիկ կամ սովորաբար որևէ տարածաշրջանի հատուկ հիվանդությունները, օրինակ՝ մալարիան Թաիլանդում կամ մլակային տենդը Հավայան կղզիներում։

Կառավարության կողմից սահմանված ճամփորդական սահմանափակումներ։ Պետական գործակալության կողմից սահմանված ճամփորդական սահմանափակումներ, որոնք թույլ չեն տալիս կամ արգելում են ճանապարհորդել դեպի տարածքի գտնվելու վայրը, մնալ այդ վայրում կամ վերադառնալ այնտեղից։ Դա չի ներառում ոչ պարտադիր ճամփորդական նախազգուշացումները և պետական մարմինների նմանատիպ ցուցումները։

Ռազմական և այլ թշնամական գործողություններ։ Ռազմական գործողություններ, թշնամական գործողություններ, արշավանքներ, քաղաքացիական պատերազմ, ահաբեկչություն, պայթյուններ, ռմբակոծություններ, ապստամբություններ, զանգվածային անկարգություններ և քաղաքացիական հուզումներ ու խռովություններ։

Բնական աղետներ։ Բնական աղետներ, տարերային աղետներ, կենսապահովման հիմնական համակարգերի խոշորամասշտաբ խափանումներ, հրաբխային ժայթքումներ, ցունամիներ և եղանակային այլ ծանր և ոչ բնականոն երևույթներ։ Սա չի ներառում եղանակային կամ բնական պայմաններ, որոնք կանխատեսելի լինելու համար բավականաչափ սովորական են այդ վայրում, օրինակ՝ Ֆլորիդայում փոթորիկների սեզոնում տեղի ունեցող փոթորիկները։

Ինչն ընդգրկված չէ

Մնացած ամեն ինչ։ Այս քաղաքականությունը թույլ է տալիս միայն վերը նկարագրված իրադարձություններին վերաբերող չեղարկումներ։ Մնացած ամեն ինչ բացառվում է։ Իրավիճակների օրինակները, որոնց համար սույն քաղաքականությունը թույլ չի տալիս չեղարկում կատարել, ներառում են՝ անսպասելի հիվանդություն, վատառողջություն կամ մարմնական վնասվածք․ պետական պարտավորություններ, ինչպիսիք են երդվյալ ատենակալի պարտականությունները, դատարան ներկայանալը կամ զինվորական պարտականությունները․ ճամփորդական նախազգուշացումներ կամ պետական մարմինների այլ ցուցումներ (որոնք չեն նախատեսում ճանապարհորդության արգելք կամ կանխում)․ ամրագրված իրադարձության չեղարկում կամ ժամկետի տեղափոխում․ տրանսպորտի աշխատանքի խափանումներ, որոնք չեն առնչվում քաղաքականության մեջ ընդգրկված իրադարձությանը, օրինակ՝ ճանապարհների փակում, թռիչքի, գնացքի, ավտոբուսի և լաստանավի չվերթերի չեղարկումներ։ Եթե ամրագրում չեղարկեք այս դեպքերում, վերադարձված գումարի չափը կորոշվի ամրագրմանը վերաբերող չեղարկման կանոններով։

Ինչ անել հետո

Եթե ձեզ ծանուցենք կամ հրապարակենք տեղեկություններ, որոնք հաստատում են, որ այս քաղաքականությունը կիրառելի է ձեր ամրագրման նկատմամբ, խնդրում ենք հետևել մեր տրամադրած չեղարկման ցուցումներին։ Եթե արդեն ծանուցել ենք ձեզ կամ տեղեկություններ ենք հրապարակել այս քաղաքականության կիրառման կարգի վերաբերյալ, դուք պետք է որ հնարավորություն ունենաք չեղարկելու ազդեցություն կրած ամրագրումը սույն քաղաքականության համաձայն՝ այցելելով ձեր «Ուղևորություններ» էջը։ Եթե կարծում եք, որ այս քաղաքականությունը վերաբերում է ձեր ամրագրմանը, բայց մենք չենք ծանուցել ձեզ կամ իրադարձության վերաբերյալ տեղեկատվություն չենք հրապարակել, դիմեք մեզ՝ ամրագրումը չեղարկելու համար։ Բոլոր դեպքերում պետք է պատրաստ լինեք տրամադրելու փաստաթղթեր, որոնք ցույց են տալիս, թե ինչպես է իրադարձությունն ազդել ձեզ կամ ձեր ամրագրման վրա։

Եթե հարցեր ունեք, դիմեք մեզ։

Այլ տեղեկություններ

Սույն քաղաքականությունը վերաբերում է բոլոր ամրագրումներին, որոնց ժամանման ամսաթիվը համընկնում է ուժի մեջ մտնելու ամսաթվին կամ դրանից հետո է։

Այս հոդվածն օգնե՞ց

Առնչվող հոդվածներ

Օգնություն ստացեք ձեր ամրագրումների, հաշվի վերաբերյալ և այլ հարցերով։
Մուտք կամ գրանցում